Atiina aʻe se Aiga Fiafia
1 O le toatele o tagata o loo iai ni faafitauli i o latou olaga faaleaiga. E faanoanoa e faapea atu, o le toatele ua taaina sese i manatu faalelalolagi ae ua lē iloa le fautuaga i le Afioga a Ieova, le Tusi Paia. Ua iai i le tusi o le Olaga Faaleaiga se vaaiga loloto i le auala e mafai ona fesoasoani ai le Tusi Paia i se tagata ia maua se olaga fiafia faaleaiga. E mafai faapefea ona tatou fesoasoani i tagata loto fiafia moni na faaalia se naunau e faalogo? E ala lea i le faia o toe asiga. Pe a tatou toe foi atu, e masani lava ona lelei le iai o se mataupu patino i lou mafaufau e fai atu o le a fesoasoani ia i latou e atiina aʻe ai se aiga fiafia.
2 Afai o le tagata e leʻi faaipoipo, atonu o le a uigā lenei faafeiloaiga mo le amataina o lau talanoaga:
◼ “Ua fesiligia e le toatele le fesili, o le ā se faavae lelei mo se faaipoipoga? Mātau le manatu ua fai mai ai le Faataoto e 31:30 e faatatau i le filifiliga o se avā lelei. [Faitau ma faatali mo se tali.] E ui lava o le toatele o talavou ua tosina i foliga mai i fafo, ae mātau le manatu o lenei tusi o le Faia o Lou Olaga Faaleaiga ia Fiafia e uiga i lena tulaga. [Faitau palakalafa e 33 ma le 34 i le itulau e 23.] Pe e te manatu faapea e tāua lenei fautuaga?” Tatai atu i isi tamai ulutala i le mataupu e 2 o le tusi Olaga Faaleaiga, ma faasino atu nisi manatu tāua mo le faataatiaina o se faavae lelei mo le faaipoipoga.
3 Afai o se tane e te feiloai i ai, e mafai ona amata lau talanoaga i se faaupuga e pei o lenei:
◼ “I laʻu asiasiga talu ai, sa ta talanoaina le auala e mafai ai ona fesoasoani le Tusi Paia i le mauaina o se olaga fiafia faaleaiga. O ai e te lagona e ao ona avea ma ulu o le aiga? [Faatali i se tali.] Ua faaalia e le Tusi Paia e faapea o le tamaloa e ao ona avea ma ulu o le aiga. Peitai, e ao faapefea ona ia faatinoina lona tulaga ulu? Mātau le mea ua fai mai ai le Efeso e 5:25-29, 33. [Faitau.] Ua tusia lenei faamatalaga i le tusi Faia o Lou Olaga Faaleaiga ia Fiafia e uiga i lenei mau.” Suʻe i le itulau e 41 ma faitau mai nisi o manatu autū mai le palakalafa e 6-8. Afai e faaalia atili le naunau, atonu e te ono fesili atu: “Ae mafai faapefea ona faaalia e le tane le faaaloalo i lana avā?” Afai e talafeagai, e mafai ona talanoaina lenei manatu i lena lava taimi po o lau asiasiga e sosoo ai e ala i le faaauauina i le palakalafa e 17-22 i le mataupu lava lenei o le tusi Olaga Faaleaiga.
4 Afai o se avā e te fetaui i ai, atonu e te fesili atu faapea:
◼ “O le toatele o avā ua toatamai i a latou tane pe a lē taimua i le tausia o mataupufai a le aiga. Po o e matauina le toatele o avā e faaʻonoʻono i a latou tane ina ia faia le mea e mananao latou i ai? [Faatali mo se tali.] E ui i lea, mātau le mea ua taʻua i le Tusi Paia e uiga i lenei.” Faitau le Faataoto 19:13. Atonu e faamatala mai e le avā ona lagona pe a uma ona faitau le mau. Ona e tatai loa lea i se manatu patino e tasi pe lua mai itulau e 62-65 o le tusi Olaga Faaleaiga ma atonu e te faamatilatila atu le manatu ua aumaia i le ata i le itulau e 64.
5 Ua iloa e tagata talaʻi ua lava le tomai le sili ona lelei o le faia o se faasologa mo taimi ua faatulagaina mo asiga. O le iai o ni fuafuaga maoti mo lenei galuega, o le a fesoasoani ia i tatou ina ia vave tuliloa ē na faaalia se naunau. Ia iloilo le taimi e sili ona lelei mo oe ma le tagata i le oganuu. E ala i lou auai pea i lenei galuega, o le a e maua ai le olioli i le faataunuuina o le faatonuga ia “faia soo.”—Mata. 28:19, 20.