Pusa Fesili

◼ E ao faapefea ona taulimaina mataupu pe afai e maumaututu le taofi o le tagata e ona le fale ia aua neʻi toe asiasi atu Molimau a Ieova i lona fale?

Pe afai tatou te tau atu i se faaaliga i se faitotoa o loo matuā faasaina ai ni asiasiga faalelotu po o patino ai le taʻua o Molimau a Ieova, atonu o se mea lelei le aloaia o manaoga o le tagata e ona le fale ma alofia ai le asiasi atu i fale.

I nisi taimi tatou te tau ai i se faaaliga e faasa ai tagata faatauoloa po o loia. Ae talu ai o loo tatou faia se galuega agalelei faalelotu e lē totogia i ni tupe, e lē o faasino ai la ia i tatou lena sa. Atonu e talafeagai ona afea pea le fale ma tuʻituʻi atu i le faitotoa. Afai e tetee mai le tagata e ona le fale, e mafai ona tatou faamatala i ai ma le faautauta le pogai ua tatou manatu ai e lē talafeagai lena faaaliga ma lo tatou tulaga. Ae afai e faamanino mai e le tagata e ona le fale le aofia ai o Molimau a Ieova i lena sa, e ao la ona tatou aloaia ona manaoga.

I nisi tulaga, pe afai tatou te asiasi atu i lona fale, atonu e manino mai lava le lē fiafia o lē ona le fale ma le musu tatou te toe oo atu i lona fale. E ao ona tatou usitaia lenei talosaga. E tatau ona tuuina atu se faamatalaga faatasi ma le aso na faamauina ai lea faamatalaga, i le teutusi o loo iai le oganuu, ina ia lē toe afea ai e tagata talaʻi o ē o le a latou galueaiina lena oganuu, lea fale i le lumanai.

E ui i lea, e ao ona teu i o tatou mafaufau, o na fale e lē faapea o le a tatou matuā lē toe afea lava. Atonu o ē o nonofo ai i lena taimi e ono siitia i se isi nofoaga. Atonu tatou te fetaui i se tasi o le aiga e tali lelei mai. Atonu e iai i lena tagata le avanoa e suia ai lona loto ma talia aloaia i tatou e asiasi atu. Pe a mavae la sina taimi, e ao ona e fesiligia ma le faautauta tagata o le aiga e faamautinoa ai o latou lagona i lea taimi.

E ao ona toe tilofaia le faila o oganuu pe faatasi i le tausaga, ina ia faia ai le lisi o aiga o loo faasaina ai le galuega. E mafai ona tofia e le ovasia o le auaunaga ni tagata talaʻi ua lava le faautauta ma le tomai ina ia asiasi atu i ia aiga. E mafai ona faamatala atu i ai e faapea, ua tatou toe asiasi atu ina ia fesiligia po o iai lava le tagata lea i inā. E tatau i le tagata talaʻi ona masani lelei i mataupu o loo i le tusi o le Reasoning, i itulau e 15-24, ua faaulutalaina e faapea, “E Faapefea ona E Tali atu ia i Latou e Tetee Mai.” Pe afai e talafeagai le tali mai a le tagata, atonu e ao ona faia se isi asiasiga i le lumanai i le auala e masani ai. Ae afai e tetee pea le tagata e ona le fale, e lē tatau loa ona toe faia nisi asiasiga seia oo i le isi tausaga e sosoo ai. E mafai e le au toeaina a le faapotopotoga lava latou ona filifili, pe e iai se itu patino i nei tulaga, e manaomia ai ona ese se faiga e taulimaina ai.