Mai Lea Fale i Lea Fale ma le Lē Faavaivai
1 I Isaraelu anamua, sa ofoina ai taulaga i aso taitasi. (Eso. 29:38-42) Sa faaolaolaina pea le afi sa i le fata faitaulaga; o le alu aʻe o le asu sa o se “manogi lelei” lea sa faafiafiaina ai Ieova. (Eso. 29:18) I aso nei, ua uunaia i tatou e “avatu . . . le taulaga o le viiga i le Atua, o le fua lea o tatou laugutu, o loo faafetai atu i lona suafa.” (Epe.13:15) Na i lo o le faaaogāina o taulaga ia na muai tusia i le Tulafono, ua tatou tapuai atu nei ia Ieova e ala lea i le toe taʻutaʻu atu o ona viiga ma le lē faavaivai.—Isa. 43:21; Galu. 5:42.
2 O Iesu Keriso, le Molimau silisili o lē na soifua i lenei lalolagi, na ia aʻoaʻoina i tatou i le pe faapefea ona avatu la tatou tapuaiga mamā e ala lea i le ofoina atu o taulaga o viiga. Sa ia aʻoaʻoina ona soʻo i le iai o le faanatinati i le feau sa latou talaʻia. Sa ia silafia o le auala pito sili ona uigā ina ia oo ai i tagata le tala lelei o le talanoa totino lea ia i latou i o latou aiga. (Mata. 10:7, 12) O lea ua tatou iloaina ai na mulimuli ona aposetolo i lana taʻitaʻiga faagaeeina mai le Atua, i le talaʻi lea mai lea fale i lea fale.—Galu. 20:20.
3 Ua leai se eseesega ma aso nei. I le avea ma soʻo o Iesu, ua mulimuli atu Kerisiano moni i lana faataitaiga i le talaʻia lea o le tala lelei mai lea fale i lea fale. E ui lava atonu e tauemua ma sauaina i tatou ona o lena, ae e faitau miliona i latou ua aʻoaʻoina le upu moni ma le faitau selauafe o soʻo fou o loo faaopoopo atu i muaʻau o le motu o tagata e toatele i tausaga taitasi, ua faamaonia ai o le auala lea a Ieova mo le faataunuuina o lona finagalo. O le pogai lea ua tatou filigā ai i la tatou faiva.
4 Aogā e Maua mai i le Talaʻi Mai Lea Fale i Lea Fale: “E le faailogaina tagata e le Atua . . . o le mataʻu ia te ia . . . ma fai le amiotonu ua talia i latou e ia.” (Galu. 10:34, 35) O le alu atu saʻo i fale taitasi i la tatou oganuu ua manino ai le faaalia o le lē faailoga tagata, ma avatu ai i tagata uma le avanoa e faalogo ai e lē aunoa i le feau o le Malo. O le iuga, o le a maua ai e ē loto talisapaia, fesoasoani patino e faatatau i o latou manaoga taitoatasi.
5 Toetoe lava o tagata talaʻi uma, e aofia ai ē laiti, o tagata matutua, e oo lava i ē fou, e mafai ona auai atu i le galuega mai lea fale i lea fale. I lenei auala ua mafai ai e tagata taitoatasi uma ona faia se “faalauiloaga i le lautele mo le faaolataga.” (Roma 10:10, NW) O le auai ma isi i le faiva mai lea fale i lea fale ua tuufaatasia ai i tatou i fusi o le alofa ma le autasi. I le taimi lava e tasi, ua tuu mai ai ia i tatou le avanoa e faataitaia ai lo tatou tumau pe a fetaiai ma ni uiga lē fiafia po o teteega. O le faataitaia faapenei o lo tatou faatuatua i se tulaga lautele ua avea ai i tatou ma “mataaga i le lalolagi” ua fesoasoani atu ai i ē loto faamaoni e iloatino e faapea e iai se tatou faatulagaga maopoopo mo le aʻoaʻoina atu o le Tusi Paia ma e mafai ona latou maua mai ai ni aogā. (1 Kori. 4:9) O nei mea uma ua faaali manino mai ai faamanuiaga a Ieova i le galuega mai lea fale i lea fale ma o lana meafaigaluega lea o loo aoao mai ai le motu o tagata e toatele i lona “fale” o le tapuaiga mamā.—Isa. 2:2-4.
6 I le taimi nei e sili atu i lo o se isi lava taimi i le talafaasolopito, o loo fia faalogo ai tagata i le feau o le Malo. O lea seʻi faaauau pea ona tatou talaʻi mai lea fale i lea fale ma le lē faavaivai seia fetalai mai Ieova ua lava. (Isa. 6:11) I le faia faapea, o le a tauia ai i tatou i le olioli e maua mai i le auai i lenei faiva tāua ma le aogā mai lea fale i lea fale i lenei taimi o le iuga.—1 Kori. 15:58.