Molimau Atu Mai Lea Fale i Lea Fale
1. O le ā le fesili ua tulaʻi mai e tusa ai ma le faiva mai lea fale i lea fale, ma aiseā?
1 “O i latou ua maua le poto masani i auala eseese e talaʻi atu ai le Upu Moni, e latou te ioe o le talaʻiga mai lea fale i lea fale lea na faaaogā ai le MILLENNIAL DAWN, o le auala foʻi lenā ua sili ona aogā i le talaʻia o le Upu Moni i le taimi nei.” O le faaupuga lenā mai le lomiga o le Zion’s Watch Tower o Iulai 1, 1893 o loo faamatilatila mai ai le tāua o le faiva mai lea fale i lea fale. Ua iloa e tagata i le lalolagi atoa lenā tulaga faapea, o se faailoga e iloa ai Molimau a Ieova. Po o aogā pea lenā auala, ona ua oo ina matuā faigatā tele ona maua tagata i o latou fale i nisi o atunuu?
2. O le ā le faavae faale-Tusi Paia mo le talaʻiga mai lea fale i lea fale?
2 E Faale-Tusi Paia ma e Tāua: O le talaʻiga mai lea fale i lea fale e iai lona faavae faale-Tusi Paia. Na faatonu e Iesu ona soo e toʻa 70 e ō taʻitoʻalua i fale o tagata. (Luka 10:5-7) Ina ua faatoʻā mavae lava le maliu o Iesu, na faapea mai le Tusi Paia e faatatau i ona soo: “Ua lē mapu foʻi i latou i aso uma ona aʻoaʻo atu, ma talaʻi atu i le malumalu, ma lea fale ma lea fale le tala lelei.” (Galu. 5:42) Na talaʻi foʻi ma le maelega le aposetolo o Paulo mai lea fale i lea fale.—Galu. 20:20.
3. O ā nisi o aogā o le talaʻi mai lea fale i lea fale?
3 O le talaʻi mai lea fale i lea fale, o loo faaauau ona avea ma auala tāua i le faalauiloa atu o le tala lelei i aso nei. O loo mafai ai ona tatou “fesili” atu po o le saʻilia o ē ua tatau i ai le galuega i se auala maopoopo. (Mata. 10:11) E masani ona sili atu ona toʻafimālie tagata i o latou aiga. O le talanoa faafesagaʻi ma i latou—faalogo atu i o latou leo, vaai atu i o latou foliga lea e iloa mai ai o latou lagona, ma mātau lo latou siʻomaga—e mafai ai ona tatou iloa mea e fiafia i ai, ma mea o loo atugalu i ai o latou mafaufau. E masani ona tatou maua ai le avanoa e sili ona lelei e faalautele atu ai le talanoaga.
4. E faapefea ona fai la tatou galuega talaʻi mai lea fale i lea fale, ina ia maua ai ni iʻuga lelei?
4 Fai ni Au Lava Fetuutuunaʻiga: Na loto malie le aposetolo o Paulo e faia ni ana lava fetuutuunaʻiga “ona o le tala lelei.” (1 Kori. 9:23) Atonu e tatou te fetuunaʻi la tatou faasologa e talaʻi i le taimi e ono toʻatele ai tagata e maua i le fale, e pei o le afiafi, faaiʻuga o vaiaso, po o taimi o aso mālōlō. Ia teu lelei faamaumauga o aiga e lē o maua i ai tagata, ma toe taumafai i se isi aso o le vaiaso, po o se isi taimi o le aso.
5. E faapefea ona faaaofia i latou e lē atoatoa le malosi i le galuega mai lea fale i lea fale?
5 E oo lava iā i latou e lē atoatoa le malosi e mafai ona auai i le talaʻiga i lea fale i lea fale. E tatou te ono faia ni fuafuaga e ō faatasi ma i latou i fale e faigofie ona oo i ai, ma galulue ma i latou i se auala e fetaui ma lo latou malosi. O se tasi o tuafafine e pei e sela pe a savali, e na te faia se fale se tasi i ʻafa itula taʻitasi. Ae maʻeu lona fiafia ma le faamalieina ina ua fai sona sao i le talaʻiga faatasi ma le ʻautalaʻi!
6. Aiseā e ao ai ona avea le talaʻiga mai lea fale i lea fale ma vala masani o la tatou faiva?
6 E toʻatele i latou pei o ni mamoe o loo faaauau ona maua i le galuega mai lea fale i lea fale. Na tuʻituʻi atu se tasi o tagata talaʻi i se faitotoʻa, ma na faapea mai le tagata: “Sau i totonu, o lea ou te iloa oe. Sa ou tatalo i le Atua e auina mai se tasi e fesoasoani iā te aʻu, ae ou faalogoina loa le tuʻituʻi mai o le faitotoʻa. Sa ia lagona mai laʻu tatalo ma auina mai ai oe.” O mea o loo tutupu, e iloa ai o loo lagolagoina e Ieova lenei auala e fai ai le talaʻiga. (Mata. 11:19) Ia maumauaʻi e avea le talaʻiga mai lea fale i lea fale, ma vala masani o lau faiva.