Faaalia o le Talisapaia mo Faailoaga Aupito Sili e Lua o le Alofa

“O i tatou, ua tatou alolofa ia te ia, auā na ia muai alofa mai ia te i tatou.”—1 IOANE 4:19.

1. O le ā le faaaʻoaʻoga na faataatia e Iesu mo i tatou?

E MAFAI faapefea ona tatou faaalia i se auala sili lo tatou talisapaia mo le alofa tele na faailoa mai e Ieova le Atua ma Iesu Keriso ia i tatou? O se auala faigofie o le faataʻitaʻi ia Iesu, o lē na molimau atu ma le lē faavaivai i le suafa o lona Tamā atoa ma le Malo. (1 Peteru 2:21) Na ia faia faapena i aiga, i sunako, i le malumalu, i auvae mauga, ma le matafaga. Seʻi o tatou manatunatu i ni auala eseese se iva atonu o le a matala mo i tatou.

Le Galuega mai lea Fale i lea Fale

2. E mafai faapefea ona e tumau i le galuega mai lea fale i lea fale?

² O le uluaʻi auala, ma atonu o se auala aupito sili lea ona ese, e mafai ona faaalia ai lo tatou alofa ma le talisapaia o le alu atu lea mai lea fale i lea fale ma le tala lelei o le Malo o le Atua. O le faia o lena mea e manaomia ona saʻoloto e tautala auā e faaauau pea ona aafia ai ni fetaiaʻiga tuusaʻo mai isi, o le toatele o i latou o le a vaai mai ia i tatou o ni ē faasoesa. E manaomia ai le alofa moni i le Atua ma tuaoi i le alu atu pea mai lea fale i lea fale, e ui lava atonu tatou te fetaiaʻi ma ni feeseeseaiga, ita mai, inoino mai, po o ni teteega tuusaʻo.—Faatusatusa le Esekielu 3:7-9.

3. O ā faavae faale-Tusi Paia o ia te oe mo le galuega mai lea fale i lea fale?

³ O faanaunauga a le Tala Lelei o faatonuga a Iesu i ona aposetolo e toa 12, ma mulimuli anei le aufaievagelia e toa 70, ua faaalia manino ai e tatau ona latou ō atu mai lea fale i lea fale ma talaʻi atu le tala lelei o le Malo o le Atua. (Mataio 10:5-14; Luka 10:1-7) I le Galuega 20:20 o loo taʻu mai ai e Paulo lona alu atu mai lea fale i lea fale. O na upu sa faatatauina i lona faia o asiasiaga faaleoleo mamoe, a e i le fuaiupu e 21 ua leai ai ni masalosaloga i le uiga o le galuega, auā ua faaopoopo mai Paulo: “Ua ou molitino ia Iutaia atoa ma Eleni—”le salamo i le Atua, ma le faatuatua i lo tatou Alii o Iesu Keriso.” Ina o faia asiasiga faaleoleo mamoe, e lē o se mea e masani ai ona uunaia e se toeaina le ‘salamo i le Atua ma le faatuatua ia Iesu.’ Na i lo o lena, na te faamalosiau i uso Kerisiano ina ia faateleina le talisapaia o sauniga po o le faiva, po o lona fesoasoani atu foʻi ia i latou i ni faafitauli totino.

4. O le ā ua faamalosiau ia i tatou ina ia auai i le galuega talaʻi mai lea fale i lea fale?

⁴ E lē gata o loo i ai se faavae maumaututū faale-Tusi Paia o lo tatou o atu mai lea fale i lea fale a o fua o lena galuega e faaalia ai o loo i a i le faamanuia a Ieova i luga o lena lava galuega. Ioe, “a e taʻuamiotonuina le poto e ana galuega.” (Mataio 11:19, N.W.) O i latou e ō atu pea mai lea fale i lea fale, na latou vaaia le faamaoniga o taʻitaʻiga a agelu e taʻitaʻiina atu ai i latou i ē fia aai ma fia inu mo le amiotonu. Na faapea mai sē ona le aiga sa tatalo o ia mo se fesoasoani ma o le asiasiga a le Molimau o le tali lea i lena tatalo.

5. O le ā le fesoasoani lelei ua tatou maua mo la tatou faiva mai lea fale i lea fale, ma o ā auala eseese e mafai ona ia fesoasoani ai ia i tatou?

⁵ Maeu se tele o le fesoasoani o loo i ai i le tusi Reasoning From the Scriptures mo le auaunaga i le fanua. O loo i ai le tele o faatomuaga fetaui mo mataupu mo talanoaga faapea foʻi ma faamatalaga aogā i le tele o mataupu faale-Tusi Paia pe faalelotu foʻi. O lea, ia lē na ona aveina o lena tusi a e ia tausia pea ona toe suʻe atu i ai. Ua faaalia faapitoa lava e paeonia le talisapaia loloto mo lenei fesoasoani tāua mo le auaunaga i le fanua. E mafai ona e faaalia lou talisapaia mo le alofa o Ieova e ala i le faaaogāina atoatoa o lenei tusi i se auala e sili atu ona uigā?

6. O le ā le aogā totino o le a tatou maua mai le alu atu mai lea fale i lea fale ma le feau o le Malo?

⁶ E lē tatau ona tatou faagaloina le mea moni faapea ua tatou tutū totino ina ia maua ni aogā se tele mai le auai i le faiva mai lea fale i lea fale. A o tatou gaoioi o ni Kerisiano i lo tatou faatuatua, o le a oo ina matuā sili atu ona mauaa; a o tatou tautala atu ma le mautinoa, ua faamalosia. E lē mafai ona tatou taʻu atu i isi e uiga i lo tatou faamoemoe pe afai e lē sili ona faapupulaina atu lo tatou lava faaamoemoe. E leai se mea e tusa ma le auai e lē aunoa i le faiva mai lea fale i lea fale ina ia atiina aʻe fua o le agaga e pei ona taʻua i le Kalatia 5:22,23. E tatau lava ona faapena, auā ua faamautinoa mai i tatou i le Tusi Paia: “E faatamaoaigaina le tagata matamau; o ia foi le faasusū i isi, e faasusuina lava ia.”—Faataoto 11:25, New International Version.

Faia o Toe Asiga

7, 8. O ā mafuaaga mautinoa ma le aogā e tatau ai ona tatou faia toe asiga?

⁷ O le auala lona lua mo i tatou e tali atu ai i le alofa ua faaalia e le Atua ma Keriso ia i tatou o le faia o toe asiga i tagata o ē na muaʻi faaalia moni so latou naunau i le feau o le Malo. Sa manatu mamafa Paulo ma Panapa ia i latou o ē na la talaʻi atu i ai. (Galuega 15:36) O le mea moni, o le tausisi e manaomia ai ona tatou faia ni toe asiga. Ao molimau atu lē fuafuaina mai lea fale i lea fale, po o luga o le ala tele, o loo tatou saili mo i latou “ua iloa o latou manoga faaleagaga.” (Mataio 5:3, N.W.) E mautinoa lava, i le na ona avatu ia i latou e pei ona sa i isi, o se ipu vai e tasi po o sina fasi areto e tasi faaleagaga o lona uiga e lē lava. Ina ia latou ō atu i le ala i le ola, latou te manaomia se fesoasoani atili.

⁸ O a tatou uluaʻi taumafaiga atonu o loo faatusaina i le totoina o fatu o le upu moni. A e pei ona faaalia e le aposetolo o Paulo i le 1 Korinito 3:6, 7, e tele mea e manaomia. Sa lē lava na o lona totoina. A e manaomia foʻi e fatu ni vai, e pei ona sa aumaia e Apolo. Ona tatau lea ona faatalitalia e faatupu e le Atua. Ua melea e nisi lenei taualumaga o le galuega, ma i lea o le toatele lava ua manatu i ai o se taualumaga aupito faigofie lea o le faiva faa-Kerisiano. Ai se ā? Auā o tagata o loo tatou asia ua uma ona faaalia sina naunau.

Faia o Suʻesuʻega Faale-Tusi Paia i Aiga

9. Ai se a ia avea ai o sou sini le faia o se suʻesuʻega faale-Tusi Paia?

⁹ Pe a faia e lē aunoa toe asiga i tagata na faaalia so latou naunau i le feau o le Malo, e masani lava ona iʻu i le faia o se suʻesuʻega faale-Tusi Paia o se auala lona tolu lea e mafai ona faaali ai lo tatou talisapaia. E moni e mafai lava ona avea o se taualumaga e aupito sili ona olioli ai ma sili ona tauia o la tatou faiva. Ai se ā? Auā, maeu se olioli i le vaai atu o tuputupu aʻe tagata i le poto ma le talisapaia o upu moni o le Tusi Paia, i le vaai atu ua faia suiga i o latou olaga, ma fesoasoani atu ia i latou seʻia oo ina tuuina atu i latou e faia le finagalo o le Atua ma papatisoina! O i latou na e tatau moni lava ona vaai i ai o a tatou fanau faaleagaga a o i tatou o ō latou mātua faaleagaga.—Faatusatusa le 1 Korinito 4:14, 15; 1 Peteru 5:13.

10. O le ā se faaataʻitaʻiga faapitoa ua faaalia ai le tāua o le faia o suʻesuʻega faale-Tusi Paia i aiga?

¹⁰ Manatu i se faaaʻoaʻoga patino. O se misionare e alu atu mai i lea fale i lea fale i le motu Karipeane na feiloaʻi ma se ulugalii maumausolo o lo la aiga e lē mamā ma maopoopo. Peitaʻi na la faaalia le fiafia. Na tuu ai se fesoasoani faale-Tusi Paia e faia ai suʻesuʻega, ma sa amataina ai loa suʻesuʻega faale-Tusi Paia i le aiga ma le ulugalii, a e leʻi faaipoipo e ui lava ua i ai ni a la fanau. A o agaʻigaʻi i luma le suʻesuʻega, sa faagasolo lava ina sili atu ona manaia le aiga i le vaai ma sa faapena foʻi le ulugalii ma la laua fanau. E leʻi umi lava a e fesili atu le ulugalii i le misionare ina ia faafaaipoipo i laua, tatala ai le auala i lo la papatisoga. O lea i le tasi aso na faaalia ma le fiafia ai e le uso fou lona laisene ave taavale, o se laisene muamua lea na ia maua. Ioe, a o leʻi avea o ia ma se tasi o Molimau a Ieova, sa ia leʻi iloa lava le manaomia ona fai o se laisene faaipoipo po o se laisene ave taavale, a e nei la, ua ia usiusitaʻi nei i tulafono a le Atua ma tulafono a kaisara.

Molimau Atu i le Auala

11, 12. (a) Ia ia i tatou le ā le faalaeʻiauga faale-Tusi Paia ma ia auai i le molimau atu i auala? (e) O ā ni mafuaaga o i ai i inā mo lo tatou faia faapea?

¹¹ O le auala lona fa e mafai ai ona tatou faaalia lo tatou talisapaia mo le mea na faia e le Atua ma Keriso mo i tatou o le molimau atu i auala. A faia sa tatou vaega, ua tatou fesoasoni atu e faataunuuina le Faataoto 1: 20, 21 i se auala moni faapena: “O loo alaga le poto i fafo; ua leo tele i malae [po o ala, NWT]. Ua valaau o ia i le mea sili ona taalili ai o tagata, o faitotoa o le aai; ua fai atu ana upu i le aai.”

¹² E i ai pea le tele o mafuaaga lelei mo i tatou ina ia auai e lē aunoa i lenei taualumaga o le talaʻiga o le Malo. I le tele o vaipanoa, ua agaʻi ina sili atu ona faigata ona maua tagata i aiga. Atonu po o latou auai i ni fale mautotogi faapitoa pe pulea tele, a e lē taʻua ai i latou o loo nonofo i faletalimalo. A e masani lava ona vaaia tagata i luga o auala.

13. O a ni iʻuga e mafai ona maua i le molimau atu i auala? Faataʻitaʻi.

¹³ O se toeaina i le Iunaite Setete o loo ia faia nei ni suʻesuʻega faale-Tusi Paia i aiga se fa ma i latou na ia muaʻi feiloaʻi atu i ai i le galuega molimau atu i le auala. Ioe, e leʻi na ona ia tūtū gūgū ai (e ui lava o nisi atunuu ona pau lena o le mea e faatagaina e le tulafono). Na i lo o lena, na te faalatalata atu ma se leo fiafia ma se ʻataʻata faauō ia i latou o tutū, faatali pasi, po o savavali solo. O ana ʻupu e mafana ma faaaloalo e faamāi i le masima,’ ma e ia te ia le faautaga poto i le pe faapefea ona faafeiloaʻi atu i tagata taitoatasi. (Kolose 4:5, 6; 1 Peteru 3:15) E lē gata ua ia maua ai se suʻesuʻega faale-Tusi Paia i len^a molimau atu i auala a e manuia foʻi i le tufaina atu ai o lomiga i le toatele. Ioe, o le teuteu mamā ma le ʻataʻata faauō faatasi ai ma le saoʻloto e tautala atu, o le a mafai ai ona e uigā i lau molimau atu i auala. O le mea moni, e toalima Molimau na tuuina atu le sili i le 30 kopi o le Life—How Did It Get Here? By Evolution or by Creation? talu ai nei i nofoaga e fai ai faatauga. O le tele lava o tusi na ave e tagata sa nofonofo i totonu o a latou taavale.

Molimau Atu Lē Fuafuaina

14. E faapefea ona faaalia le tāua o molimau lē faufuaina?

14 O le auala lona lima mo i tatou e faaalia ai le talisapaia mo le alofa uiga ese na faaalia e le Atua ma Keriso ia i tatou e auala lea i le molimau atu lē fuafuaina. Maeu se uigā e masani ona i ai lenei mea, e lē gata i le sailia o tagata o matelaina ma galala mo le amiotonu, a e faapea foʻi ma le tufaina atu o lomiga! E mautinoa lava o le auala lea e tasi e mafai ai ona tatou utagia le fautuaga o loo maua i le Efeso 5:15, 16, ina ia ‘faaaogā aso o lenei olaga mo i tatou.’ Na amata e se misionare se talanoaga ma se tagata o se pasese i se tamaʻi taavale. Na faaalia le fiafia o le tamaloa. Na faia ni toe asiga ma na faia ai loa se suʻesuʻega faale-Tusi Paia. I aso nei ua avea ai nei lea tamaloa ma toeaina Kerisiano. I se isi foʻi mea na amata ai e se toeaina se talanoaga ma se fafine o lē na iʻu ina sui lana lotu ina ia faaipoipo atu i se tagata Siu. Sa ia fia iloa po o ai na muamua sau, po o Mose, Noa, Tavita, ma isi. Na taʻu atu e le toeaina ia te ia e manaomia ona ia maua le tusi Tala o le Tusi Paia, o loo aumaia ai mea tutupu i le Tusi Paia i se faasologa o tupulaga. E ui lava o se tagata ese le toeaina i le fafine, a e na sauni lava e taʻu atu lona igoa ma le tuatusi faapea foʻi ma le meaalofa manaomia ina ia mafai ai ona ia lafo atu le tusi a le fafine i le meli.

15. O le ā o le a fesoasoani ia i tatou ia mataala mo avanoa mo molimau atu lē fuafuaina?

¹⁵ I nisi taimi, atonu o le fefe e taofia ai, pe faatalatū ai foʻi e amata se talanoaga ma se tasi o loo nofo i ou tafatafa a o faimalaga. O lea, e masani lava ona faaʻoaina i tatou i le taui pe a tatou maua le lototele e faia ai faapea! O le talisapaia o le lelei o le Atua ma manaoga o tagata o le a fesoasoani ia i tatou e maua le loto tele e tatau ai. Ioe, ia manatua “ua lei foaiina mai e le Atua ia te i tatou le agaga e mataʻu ai, a o le agaga e faamalosi ai, ma alofa ai, ma aoaʻi ai i tatou.”—2 Timoteo 1:7, NIV.

Ia Talia Tagata Ese

16. Ai se a e tatau ai ona tatou mataala ia iloa tagata ese e ō mai i lo tatou Maota o le Malo?

¹⁶ O le auala lona ono e faaalia ai lo tatou loto faafetai i le Atua ma Keriso e ala i lo tatou talia o tagata ese e ō mai i lo tatou Maota o le Malo. O le alofa i tuaoi e tatau ona faama taalaina i tatou e matau so o se tagata ese e asiasi mai i lo tatou nofoaga o le tapuaʻiga. Seʻi tatou taumafai ai ona maua se faalogona saʻoloto, ia lagona o loo i ai o ia i totonu o uō o ē naunau moni mo lona lelei faaleagaga. Ia sili atu, na i lo o le na ona fia maimoa na alai ona sau i inā. Atonu po o loo ia matelaina po o galala moni mo le amiotonu. O lo tatou manatu mamafa faamaoni ia te ia atonu o le a iʻu ai i lo tatou amataina o se suʻesuʻega faale-Tusi Paia a le Olomatamata i Kiliata na matauina faapea o ana tagata aʻoga faale-Tusi Paia aupito sii ona manuia i le agaʻigaʻi i luma o i latou na ia muaʻi feiloaʻi atu i ai i le Maota o le Malo.

Molimau Atu e Ala i le Tusia o ni Tusi

17. O ā ni iʻuga e mafai ona maua pe a molimau e ala i le tusia o ni tusi?

¹⁷ O le auala lona fitu mo i tatou o le molimau atu, e tali atu ai i le alofa na faaalia e le Atua ma Keriso ia i tatou, o le tusia lea o ni tusi. E masni lava, o i latou o faaaogāina lenei ituaiga o molimau atu latou te maua mai ni tusi talisapaia e tali mai ai. Ua faaaogāina le auala lenei e nisi faifeau sauatoa o ē atonu ua lē mafai ona o atu mai lea fale i lea fale mo sina vaitaimi ona ua lē lelei le malosi o le tino. Mo se faaaʻoaʻoga: Sa i ai se aiga e 12 ni tamaiti. I se tasi aso na sau ai le tamā i le fale ma maua ai le toalima o nei tamaiti ua maliliu na tafana, [seʻi tulou], e se uō tama lē alofa a lona afafine. Sa lē aogā lona vaavaai atu mo se faamafanafanaga mai taʻitaʻi o lotu Kerisenitoma. I le tasi la aso na ia maua mai ai se tusi mai se tagata ese, o se Molimau o lē na faitau i le nusipepa e uiga i lona puapuaga ma ua manao ai e fia faamafanafana ia te ia, ma fafao atu ai ma le tusi o le Upu Moni. O le mea tonu lava lenei sa suʻeina e le tamaloa. I aso nei, ua avea foʻi o ia o se Molimau maelega.a

O le Vili Atu i ni Telefoni

18, 19. O ā nisi auala na iloa e isi e uiga i le talaʻiina atu o le tala lelei, ma ai se ā?

¹⁸ I le taʻua o lona valu o auala e molimau ai, ua i ai le avanoa e faaaogā ai le telefoni e talaʻia ai le tala lelei o le Malo. O lenei faatelega ua faamaonia o se auala matagofie ma le uigā o le molimau atu. Ua sili atu ona toatele Molimau ua oo ina tomai i lenei taualumaga o le faiva, ma ua tele foʻi se faamālo i ai. E ala i telefoni ua mafai ai ona tatou oo atu i nisi tagata o ē na lē mafai ona tatou feiloaʻi atu i ai i le galuega mai lea fale i lea fale. A o faia ma le faamaoni le molimau atu i telefoni, ma le agalelei poto, ma le tomai, na maua e nisi ni tali mai e sili atu ona lelei na i lo o le asiasi atu ia i latou i ō latou aiga.

¹⁹ O se faapotopotoga Iapani i se tatunuu e tautala i le gagana faa-Peretania latou te faaaogā le tusi telefoni e avea o se vaega o la latou oganuu. E telefoni le au talaʻi i igoa faa-Iapani i le tusi telefoni ma fuafua e faia se asiasiga totino i ē latou te iloa e faaalia se naunau. Na latou amataina tino lava le faitau taseni o suʻesuʻega i lenei auala.

Molimau Atu e Ala i Amio Lelei

20, 21. O ā iʻuga lelei e mafai ona maua ona o ā tatou amio lelei? Faataʻitaʻi.

²⁰ O le auala lona iva e mafai ai ona tatou avatu le viiga i le Atua e auala lea ia tatou amio lelei. Na taʻua e se tusi tala Rusia e faapea o la tatou lauga sili o ā tatou amio lelei. O le mea moni, na toe taʻua foʻi e le nusipepa le tulaga maualuga o amio a Molimau a Ieova. Na lipotia mai e se tasi: “E iloa lelei lava Molimau a Ieova i le Federal Republic of Germany o ni tagata aupito sili ona faamaoni.” I le amataga o le vai tausaga o lana aʻoga, na ave ai e se teine Molimau i lona faiaʻoga le polosiua i Aʻoga. Na matuā tetee lava i ai le faiaʻoga ma faapea atu na te lē manao lava e miomiō faatasi ma Molimau a Ieova. Peitaʻi, i lena taimi o lana amio lelei na maua ai e ia ni viiviiga sili mai lona faiaʻoga ma ua mafua ai ona faia atoa se suiga agaʻi i Molimau. E faapena foʻi le uiga o se tusi na maua e mātua Molimau mai le faiaʻoga o la laʻua fanau. “O se fua lē mafaafitia o le lelei o la outou talitonuga o la oulua fanau.”

²¹ O i latou i le lalolagi e lē mafai ona faia ni faamatalaga lelei e uiga i Molimau a Ieova e aunoa ma le tuuina atu ai o le mamalu ma le viiga i le Atua ma Keriso. O le auala lena e tatau lava ona i ai. Pe sa leʻi faapea mai ea Iesu ina ia faasusulu atu lo tatou malamalama ian ia iloa mia e tagata a tatou galuega lelei ma latou vivii atu ai i lo tatou Tamā o i le lagi? (Mataio 5:16) E moni, o a tatou amio lelei, tatou te mafai ai ona teuteu le upu moni. (Tito 2:10) E mautinoa lava, o le mea moni o a tatou amio lelei e aumaia ai le viiga i le Atua ma Keriso, ma o le a fesoasoani i isi e o atu i le ala i le ola, o se mafuaaga malosi lea mo lo tatou manatunatu loloto i taimi uma ina ia lē avea a tatou amio o se mea e faalumaina ai.

22. O lē fea o auala e faaalia ai le talisapaia o le a e faaaogāina, ma ai se ā?

²² E pei la ona tatou iloa nei, e tele auala e mafai ai ona faaalia lo tatou talisapaia mo mea uma na faia e Ieova ma Iesu Keriso mo i tatou, a e maise lava i o la faailoaga aupito sili o le alofa. I le faagasologa, e mafai ona tatou faamaonia lo tatou alofa i tuaoi.—Mareko 12:30, 31.

23. O le ā le auala mulimuli e mafai ona e faaalia ai le talisapaia i le Atua ma Iesu?

²³ I le faaiʻuga, seʻi o tatou matauina faapea e mafai ona faaalia lo tatou talisapaia mo faailoaga aupito sili e lua o le alofa e ala i le faamanatuina o le Talisuaga Afiafi a le Alii. I lona toe po i le lalolagi o se tagata, na faatuina ai e Iesu se talisuaga faaletausaga ia manatua pea e faia aʻe i le areto ma le uaina, e fai ma sui o lona tino ma lona toto. Sa ia poloaʻi mai ina ia faia lenei mea ma faamanatuga ia te ia. (1 Korinito 11:23-26) O le tausaga la a sau o le a paʻu ai le faamanatuga o le Talisuaga Afiafi a le Alii ia Aperila 1, 1988, pe a goto le la. O le a faapotopoto faatasi foʻi la Molimau a Ieova i le lalolagi aoao ona o le usiusitaʻi i le poloaiga a Iesu. Aua neʻi e misia!

[Faaopoopoga i lalo]

Fesili mo le Autaluga

◻ Na faapefea ma o fea na molimau atu ai Iesu?

◻ I ā auala atonu tatou te faaaʻoaʻo ai ia Iesu i le faaalia o le talisapaia mo le alofa aupito sili o le Atua?