Faamanuiaga Mai le Faaalia o le Talisapaia o le Alofa o Ieova—Vaega 1

¹ Na tusi le aposetolo o Ioane e faapea: “O i tatou, ua tatou alolofa, auā na ia [Ieova] muai alofa mai ia te i tatou.” (1 Ioa. 4:19, LF) Pe a tatou mafaufau i mea uma ua sauniunia e Ieova mo i tatou, e uunaʻia ai i tatou e faaalia atu lo tatou talisapaia loloto. Na faataatia e Iesu le faaaʻoaʻoga o le faia o lenei mea e ala i le molimau atu ma le usiusitai e uiga i le suafa o le Atua ma le Malo. (Ioa. 14:31) E lelei la pe a tatou iloiloina nisi o auala e ono faaalia ai lo tatou talisapaia o le alofa o Ieova ma ana faamanuiaga e iʻu i ai.

² Ō Atu i Lea Fale i Lea Fale: Na aʻoaʻoina e Iesu ona soo i le auala e faatino ai le galuega talaʻi o le Malo. O ana faatonuga o loo faailoa manino mai ai faapea, na latou ō atu i lea fale i lea fale, e folafola atu le tala lelei. (Luka 9:1-6; 10:1-7) Pe a tatou feagai ma tulaga faalēano mai ma teteega, e manaʻomia ai le alofa mo le Atua ma tuaoi ina ia ō atu ai pea i lea fale i lea fale. Peitaʻi i le faatinoina o lenā galuega, e aogā totino mo i tatou auā e atili maumauaʻi ai lo tatou faatuatua, e atili malosi ai lo tatou talitonuga mautinoa, ma atili manino mai ai lo tatou faamoemoe.

³ I le galulue ai e ala i le taʻitaʻiga faaagelu, ua tatou mauaina ai le toʻatele o ē o loo matelāina ma galala mo le upu moni. (Faaa. 14:6) Ua faapea mai tagata e ona fale sa latou tatalo mo se fesoasoani ae oo atu loa se Molimau i o latou faitotoʻa. E toʻalua ni tuafāfine Molimau ma se tamaitiiti laʻitiiti na ō atu i lea fale i lea fale i se motu o le vasa Karipiane. Ina ua filifili tuafāfine o le a faagata la latou galuega mo lea aso, sa alu atu pea lava le tamaitiiti na o ia i le isi fale o loo i luma ma tuʻituʻi. Na tatala mai e se tamaʻitaʻi talavou le faitotoʻa. Ina ua vaai atu i ai tuafāfine i lenei mea, ona la ō atu ai lea ma talanoa ma le tamaʻitaʻi talavou. Na ia valaaulia i latou i totonu ma faamatala ane i ai e faapea, sa faatoʻā uma lava ona ia tatalo i le Atua ina ia auina mai ni Molimau e aʻoaʻoina o ia i le Tusi Paia!

⁴ Molimau Atu i Alatele: Talu ai e faigatā tele i nisi o vaipanoa ona maua tagata i aiga, o le molimau atu la i alatele o se auala uigā lea e tuuina atu ai se molimau i tagata. E lē gata i lea, e toʻatele tagata e nonofo i nofoaga e taloka faitotoʻa o alatatala po o fale foʻi e matuā malupuipuia, ia e lē mafai ai ona tatou ō atu i lea fale i lea fale. Peitaʻi, o lo tatou talisapaia o le alofa o Ieova e uunaʻia ai i tatou e faaaogā tatau auala uma e mafai ai ona faailoa atu i tagata le feʻau o le Malo, e aofia ai ma le molimau atu i ala tetele.—Faata. 1:20, 21.

⁵ Faia o Toe Asiga: Talu ai o loo tatou saʻili mo i latou o ē “manatu mamafa i o latou manaʻoga faaleagaga,” tatou te mananaʻo ai e faia le mea tatou te mafai ina ia ausia ai lenā manaʻoga. (Mata. 5:3, NW) E manaʻomia ai i lenei mea lo tatou toe foʻi atu e faasūsū fatu o le upu moni ia na tatou totōina. (1 Kori. 3:6-8) Na tuuina e se tuafafine i Ausetalia se sāvali i se fafine o lē sa leʻi foliga naunau tele ane. E ui i lea, na maumauaʻi le tuafafine i le taumafai ina ia toe maua pea le fafine i lona fale. Ina ua mulimuli ane la toe feiloaʻi, na iloa ai e lo tatou tuafafine e faapea, ina ua mavae le uluaʻi asiasiga, na faatauina ai loa e lenei fafine se Tusi Paia taugatā. Na amata ai loa ona faia le suʻesuʻega a lenei fafine ma lo tatou tuafafine!

⁶ Faia o Suʻesuʻega Faale-Tusi Paia: E mafai ona avea lenei ma vala sili ona olioli ai ma tauia o la tatou faiva. Maʻeu se faamanuiaga o le fesoasoani lea i tagata e aʻoaʻoina e faatatau iā Ieova, le vaaia o i latou o faia suiga i o latou olaga ina ia faafiafia ai o ia, ma molimauina lo latou papatisoga faa-Kerisiano e faailogaina ai lo latou tuuina atu i le Atua!—1 Tesa. 2:20; 3 Ioa. 4.

⁷ I le lomiga o sosoo mai, o le a tatou iloiloina ai nisi o auala ia o loo faamanuiaina ai i tatou i le faaalia o le talisapaia o le alofa o Ieova.