E Faapefea ona Latou Faalogo pe a Tatou Lē Toe Foi Atu?
1 “Pe faapefea . . . ona latou faalogo atu, pe a leai se talaʻi atu?” (Roma 10:14) O le mea moni, e faapefea ona latou puea le uiga o le upu moni pe a tatou lē faia ni toe asiga uigā? So o se aiga lava na mafai ona tatou talanoa ai ma lē ona le fale e uiga i le feau o le Malo, e tatau ona toe asi. I lenei masina, atonu o le a mafai ona tatou toe tuliloaina ai a tatou uluai talanoaga faatasi ma ni manatu faaopoopo faale-Tusi Paia mai so o se tamai tusi na tatou tuua, ma ono taitaia atu ai ma le manuia i se suesuega faale-Tusi Paia.
2 Afai na e tuua le tamai tusi “O Se Lumanai Saogalemu—E Mafai Faapefea ona E Mauaina,” atonu e mafai ona e amataina le talanoaga ina ia tataʻi atu ai i se suesuega faale-Tusi Paia i le auala lenei. I le faasino atu i le faavaa i luma e te ono fesili atu:
◼ “Pe e te fia ola i se lalolagi ua faamautinoaina mai ai se lumanai saogalemu mo oe ma lou aiga? [Faataga mo se tali. Ona suʻe lea i le palakalafa e 2.] O loo ia i tatou uma lenei faanaunauga, e ui ina faaletonu le toatele pe ono mafai moni ona taunuu. O le Atua, o lē na folafola maia le faataunuuina moni o lenei mea, e lē mafai ona lē taulau.” Faitau le Isaia 32:17, 18 e pei ona siiina mai i le palakalafa e 2, pe faitau mai foi i lau Tusi Paia. Ina ia faaauau, faamatala atu o loo iai tagata i le lalolagi o ē ua oo i le olioli ma le filemu o le mafaufau na e ō faatasi ma lo latou faamoemoe mautinoa mo le lumanai. Talanoa manatu faale-Tusi Paia o loo i le palakalafa e 3, ma faamatala le auala e mafai ai ona fesoasoani le suesueina o le tamai tusi i lē ona le fale ia aʻoaʻoina atili. Afai e naunau le tagata e ona le fale, ona fai lea o ni fuafuaga mo se toe asiga vave e faaauau ai le talanoaga.
3 Pe a e toe foi atu ina ua uma ona tuu le tamai tusi “Pe i Ai ea Se Atua e Silasila Alofa Mai?,” atonu o le a uigā se manatu faapenei:
◼ “I laʻu asiasiga talu ai, na ta talanoaina ai le fesili, Pe o iai ea se Atua o silasila alofa mai? Pe e te manatu o ano mai ea le Atua ia i tatou ma aumai se iuga i puapuaga ma faiga sauā? [Pe a uma lana tali mai, vaai le palakalafa e 32, ma faaauau.] Ua folafola mai e le Atua le suia o lenei lalolagi amio leaga i se lalolagi fou e ʻaināina e tagata lelei o ē o le a mafai ona ola i le filemu. [Faitau le Salamo 37:11.] E mafai foi e oe ma aʻu ona olioli i le olaga i lena lalolagi fou pe afai ta te talitonu i le Tusi Paia ma faaaogā ana fautuaga.” Faamatala a tatou fuafuaga mo le fesoasoani i tagata e suesue le Tusi Paia.
4 Pe a e faia se toe asiga na tuuina ai le polosiua “Faauta! Ou te Faia ia Fou Mea Uma Lava,” e te mafai ona amata i le faaali atu o le ata o loo i le faavaa ma fesili atu:
◼ “O le ā sou manatu o le a faapeī le ola ai i totonu o se lalolagi e lelei atoatoa? [Ia maua mai se manatu o lē ona le fale.] O le mea o e vaaia i lenei ata ua lē na o se ata i le mafaufau; e faavae aʻe i folafolaga mautinoa ua i le Tusi Paia. [Faitau le Faaaliga 21:4 ma le Salamo 37:11, 29.] Ou te fiafia tele e faamatala pe mafai faapefea e oe ma lou aiga ona olioli i lenei faamanuiaga.” Pe a faaalia e le tagata o le aiga le naunau, faaauau le talanoaga ma ofo atu se suesuega faale-Tusi Paia.
5 Pe a tatou mauaina tagata naunau moni o loo saili mo le upu moni, tatou te faataitaia lo tatou alofa moni i lo tatou toe foi e fesoasoani ia i latou e gaoioi e faatino mea ua latou faalogo ai. Tatou te faaaogā upu moni paia ua tuuina mai ia i tatou mo lo tatou lava manuia tumau atoa ma ē o faalogologo mai.—1 Timo. 4:16.