Fesoasoani i Isi e Aʻoaʻoina le Upu Moni
1 Na afio mai Iesu i le lalolagi e molimau i le upu moni. Ina ia talaʻia i isi le upu moni, na ia aʻoaʻoina ai ona soʻo ia avea ma faiaʻoga. Na ia talisapaia tele lo latou tulaga manuia i le aʻoaʻoina o isi, o lea na ia taʻua ai i latou o ‘faiaoga mo le lautele.’ (Mata. 13:52) Na ia faatusaina i latou taitoatasi i le matai ua na maua ni oloa mai i lana faleoloa. Ua faaaogā e soʻo o Iesu i aso nei lomiga ina ia faatelevaveina ai le galuega talaʻi o le Malo. Mo se faaaoaoga, ua iai i le tele o faapotopotoga le anoanoai o tamai tusi e faaaogā e fesoasoani ai i isi ina ia avea ma soʻo. E mafai faapefea ona faaaogāina nei meafaigaluega aogā?
2 Ina ia amata se talanoaga e taitaiina atu ai i le ofoina o le tamai tusi “O Se Lumanai Saogalemu—E Mafai Faapefea ona E Mauaina,” atonu e te fesili atu:
◼ “Pe ua e taumanatu ea pe aisea e ui ai lava i taumafaiga uma a le tagata, ae o loo foliga nenefu mai pea faamoemoega mo se lumanai saogalemu? [Faataga mo se tali.] Ua faamatala mai e le Tusi Paia pe aisea ua lē taulau ai le tele o taumafaiga.” Faitau le Salamo 146:3, 4. Pe a uma ona talanoaina ma lē e ona le fale faamatalaga o loo i le palakalafa e 6, e mafai ona e fesili atu: “O ai moni e mafai ona ia aumaia ia i tatou le saogalemu tumau?” E faalagolago i le tali mai a lē ona le fale, e te ono filifili ai e talanoaina ni manatu talafeagai mai le palakalafa e 7 pe faatulaga e faia faapena i se taimi o i luma.
3 O le isi auala lenei e te ono mafai ona faaaogā ai le tamai tusi “Pe i Ai ea Se Atua e Silasila Alofa Mai?”:
◼ “E toatele tagata ua latou fesiligia le fesili o loo i le faamatalaga o i lalo ifo o nei ata e lua. [Faitau le fesili o loo i lalo o itulau e 6 ma le 7, ma faataga mo se tali.] Talu ai e lē mafai e se Atua alofa ona faatulai mai le lelei ma le leaga i le taimi e tasi, o le ā la sou taofi i lana folafolaga lea o loo faamauina i le Isaia 65:21-24?” Afai e faaali mai sina naunau i le manatu faaalia o lē e ona le fale, ona suʻe lea i le palakalafa e 37, ma faamatala atu pe o le ā o le a faataunuuina e le Malo o le Atua.
4 Pe a ofoina le tamai tusi “E Tele Naua Nisi Mea mo Le Olaga!,” e mafai ona e faapea atu:
◼ “Mo le toatele, ua tauau ina lē mālie ia i latou le tulaga o mea o le olaga ua iai ma avea o se mea e pasiā ma fiu ai. O le ā e te manatu e manaomia ina ia uigā moni ai le olaga? [Faataga le tagata e ona le fale e faamatala mai sona manatu.] Ua faaali mai e le Tusi Paia e faapea o loo ua teua e le Atua ni mea e sili ona lelei mo i tatou. Tagai i lana fetalaiga i le Faaaliga 21:4, 5.” Pe a talafeagai, faaauau le talanoaga i manatu tāua mai le palakalafa e 42 o le tamai tusi.
5 I le faaaogāina o le polosiua “Olioli i Le Ola i Le Lalolagi e Faavavau!,” e ono fesili atu se tagata talaʻi talavou:
◼ “Pe e te manao e ola i se lalolagi parataiso faapenei? [Faaali atu ata o i le faavaa atoa, ma faataga mo se manatu.] O aʻu ma lo matou aiga o loo faamoemoe e ola ai i inā ona o le mea o fai mai ai le Tusi Paia i inei i le Ioane 17:3.” Afai o matauina se naunau pe a uma le faitauina o le mau, ofo atu le tuuina o le polosiua mo le tagata e faitau ai.
6 Pe afai o e faaaogāina isi tamai tusi po o polosiua i lau faiva i lenei masina, e te ono mafai ona faafetauia au upu tomua ma faatomuaga i fautuaga na sa muai taʻua. Ia manatua e ao ona faapuupuu, ma ia faia ni manatu e mautinoa ma ia atiina aʻe, ina ia faaosofia ai le naunau o ē ona fale.
7 Ua tuuina mai e Ieova ia i tatou le upu moni. E tatau la ona tatou faaaogāina tatau avanoa ua saunia mo i tatou e fetufaai ai le upu moni ma isi, i lomiga ma i a tatou talanoaga ma tagata tatou te feiloai i ai. I lenei auala tatou te faamaonia atu ai le avea o i tatou o ni faiaoga i le lautele mo le lelei tumau o isi.—Mata. 28:19, 20.