Ia Faaaoao ia Ieova e Ala i le Manatu Mamafa Moni i Isi
1 O Ieova o le faaaoao silisili o lē e faaalia le manatu mamafa moni i isi. Ona o ia o le Pule Silisili Ese Aoao, na te silafia lelei ai manaoga o ana foafoaga faaletagata. (1 Pete. 5:7) Ua faalaeiauina e Iesu ona soo ina ia faaatagia atu uiga o lona Tamā, o lē na te faaoso le la ma faatotō ifo le timu i luga o tagata amiotonu ma ē amioletonu. (Mata. 5:45) E mafai ona e faataitai ia Ieova e ala i le faaalia o le manatu mamafa moni mo isi—i le nofo sauni e tufa atu le feau o le Malo ia i latou uma e te feiloai i ai. E ala i le faamasani lelei i polosiua o le a faaaogaina i le faiva ia Iulai, o le a e iai la i se tulaga lelei e ofo atu ai le fesoasoani faaleagaga i isi. O fautuaga o loo mulimuli mai ua ofo atu ai ni manatu i le auala e mafai ona e sauniuni ai mo le uluai asiasiga, ona tulitatao lea o le naunau na faaalia e ala i le faia o toe asiga i taimi talafeagai.
2 Pe a ofoina le polosiua “Po o Silasila Alofa mai ea le Atua ia i Tatou?” e mafai ona e faapea atu:
◼ “Po o e tau mānatu ea i le pogai ua faataga ai e le Atua tagata ia oo i ai mafatiaga pe afai e manatu moni mai o ia ia i latou? [Faatali mo se tali.] O lenei polosiua, ua lē gata ina saunia ai se tali faamalie loto i lenei fesili, ae ua faaalia ai foi e faapea, ua folafolaina mai e le Atua le aveesea o mea uma ua faaleagaina ai e le tagata o ia lava ma lona aiga faalelalolagi.” Faitau le palakalafa e 23 i le itulau e 27. Faaali le ata o loo i lalo ifo, ma faitau le Salamo 145:16 mai le palakalafa e 22. Ofo le polosiua. Afai e talia, ia faatū se fesili e mafai ona taliina i le isi asiasiga, e pei o lenei: “Pe e te fia iloa le auala o le a faataunuuina ai e le Atua lana fuafuaga e aumaia faamanuiaga i tagata ma faaliliuina ai le lalolagi i se parataiso?” Ia faamautinoa ua taʻua e faapea, o la tatou galuega i le lalolagi aoao e lagolagoina e meaalofa tauofo.
3 Pe a toe foi atu e asia i latou na tuu ai le polosiua “Po o Silasila Alofa mai ea le Atua ia i Tatou?” e mafai ona e toe amataina se isi talanoaga i le auala lenei:
◼ “I laʻu asiasiga talu ai, na ta talanoa ai e faapea, o loo manatu moni mai lava le Atua ia i tatou ma o lana fuafuaga o le aveesea lea o mea uma ua faaleagaina ai e le tagata o ia lava ma lona aiga faalelalolagi.” Suʻe le polosiua i le ata i le itulau e 2-3 ma faapea atu: “Na faaiuina la ta talanoaga i se fesili e faapea, Po o le a faapefea ona faataunuuina e le Atua lana fuafuaga i le aumaia o faamanuiaga i tagata ma faaliliuina le lalolagi i se parataiso? O le ā sou manatu?” Faatali mo se tali. Suʻe i le itulau e 17, ma faitau le palakalafa e 2 ma le Tanielu 2:44. Pe a uma lena, ona faitau lea o le palakalafa e 12 i le itulau e 18. Fesili i lē ona le fale pe manao e te lua talanoa i le vaega e 9 o le polosiua. Afai e manao ai, ia ona lua suesue loa lea ma ia.
4 O se faafeiloaiga lenei atonu e mafai ona faaaogā i le ofoina o le polosiua “Pe a Maliu se Tasi e Pele i a te Oe.” Faaali le faavaa ma faapea atu:
◼ “I le asō o loo matou tufaina atu ai lenei polosiua o loo aumaia ai se faamafanafanaga ma se faamoemoe i le faitau miliona o tagata o ē ua leiloa ē pele ona o le maliu. Pe sa e tau mānatu ea po o le ā se faamoemoe o iai mo ē ua maliliu? [Faatali mo se tali.] Ua taʻu manino mai e le Tusi Paia le folafolaga a le Atua i se toetu.” Faitau le Ioane 5:28, 29. Suʻe le polosiua ma faaopoopo i manatu o loo i le palakalafa mulimuli o le itulau e 28 ma le uluai palakalafa i le itulau e 31. Faaali ata o loo iai. Ofo le polosiua. E mafai ona e sauniuni le auala mo se toe asiga i lou fesili atu, “E mafai faapefea ona tatou mautinoa o le a soloiesea atoatoa mulimuli ane le oti?”
5 I se na e tuua ai le polosiua “Pe a Maliu se Tasi e Pele i a te Oe,” atonu e te manao e faaaogā le taulimaga lenei pe a e toe foi atu e asi:
◼ “I la ta talanoaga talu ai, na ta talanoaina ai le faamoemoe ofoofogia i se toetu. O le polosiua lea na ou tuua ia te oe, o loo faamatala mai ai le pogai e mafai ai ona tatou mautinoa o le a iu ina soloiesea atoatoa le oti. Pe e te lei lagona ai ea le faamafanafanaina ma le faamautinoaina ai i folafolaga a le Atua?” Faatali mo se tali. Ona suʻe lea i le itulau e 31 o le polosiua, ma faitau le palakalafa e lua ma le tolu, faapea ma le Faaaliga 21:1-4. Ia faamatilatila le faamoemoe ua ia i tatou o le olioli lea i le ola e aunoa ma le oo mai o le oti. E faalagolago lava i le naunau ua faaalia ma tulaga i lena taimi, e mafai ona e ofo se suesuega faale-Tusi Paia i le tusi o Le Poto po o le toe fai atu foi o se isi fesili e tatala ai le avanoa mo le isi toe asiga.
6 Pe a ofoina le polosiua “Olioli i Le Ola i Le Lalolagi e Faavavau” e mafai ona e fai atu faapenei:
◼ “E toatele tagata e tau mānatu po o le ā le fuafuaga o le olaga. Ua latou fesili ifo ia i latou lava: ‘Aisea ua ou iai iinei? O fea o oʻu agaʻi atu i ai? O le ā o taofia e le lumanai mo aʻu?’ O fea e te manatu e mafai ona tatou maua ai ni tali? [Faatali mo se tali.] Mātau le mea o fai mai ai le Tusi Paia e uiga i le lumanai. [Faitau le Salamo 37:29.] Pe e lē tatau ea ona tatou faapea atu ai, o Lē na Foafoaina le tagata, ua sili lona agavaa e faamatalaina mai le mea o le a tupu i le lumanai? [Faatali mo se tali.] Ua faaalia i lenei polosiua le fuafuaga sili o loo teuina e le Atua mo i tatou.” Suʻe i ata i le itulau e 47-49, faitau faamatalaga o ata ma fai se faaopoopoga i ata; ona ofo lea o le polosiua. Afai e talia, ona e fesili lea i ai: “O le a faapefea ona aumaia e le Atua le Parataiso i le lalolagi?” Faamatala i ai le fuafuaga mo meaalofa tauofo. Faataatia se faavae mo se toe asiga.
7 Afai e tuu le polosiua “Olioli i Le Ola i Le Lalolagi e Faavavau!” pe a e toe foi atu, e mafai ona e fai atu faapea:
◼ “I laʻu asiasiga talu ai, sa ou fiafia lava i la ta talanoaga e uiga i le manatu o le Tusi Paia e faapea, e iai moni lava se fuafuaga o le olaga faaletagata.” Faaali le ata i le faavaa ma fesili i ai, “O le a faapefea ona aumaia e le Atua le Parataiso i le lalolagi?” Faitau faamatalaga o ata i le itulau e 41-45. Talanoa i manatu o aumaia i le mau. Ofo se suesuega faale-Tusi Paia e faia i le aiga e aunoa ma se totogi. Faailoa i ai le tusi o Le Poto, ma ofo i ai e mafai ona faataitai atu le auala o loo tatou faaaogā ai le tusi ina ia avea o se fesoasoani i le faia o suesuega faale-Tusi Paia.
8 E ao ona atagia atu i la tatou faiva lo tatou naunau moni e fesoasoani i tagata loto faamaoni ia “oo ina iloa le poto saʻo o le upu moni.” (1 Timo. 2:4, NW) O lea la, ia faataatia ese se taimi mai lau faasologa o le auaunaga e toe asia ai tagata taitasi o ē na e tuuina i ai se polosiua. O lou faaalia o le manatu mamafa moni mo i latou, e ono iu ai i lou fesoasoani atu i ē o mapuitiga ma feoi ona o mea inosia ua faia i lotu sese, e faailogaina ai mo le faasaoina. (Eseki. 9:4, 6) O le a e tofo ai foi i le olioli ma le loto malie e maua i le iloaina o loo e faataitai ia Ieova e ala i le manatu mamafa moni i isi.—Faatusatusa i le Filipi 2:20.