Faaaogā Polosiua Eseese i Lau Faiva
1 O tagata i aso nei, e fiafia i mataupu eseese. A o e auai i le auaunaga i le fanua ia Iulai, e mafai ona e ave nisi o polosiua eseese, ma faaaogaina se polosiua patino o le a fetaui i tagata i le oganuu. E lē taumatea o le a e manao e faaaogā se tasi o nei taulimaga:
2 I le ofoina o le polosiua “O le Malo o le a na Aumaia le Parataiso,” e mafai ona e fesili atu e faapea:
◼ “O le ā sou manatu i le tulaga na semanū e iai le lalolagi pe ana faapea e na o le Atua lava le pule? [Faatali mo se tali.] O le pulea e le Atua o le lalolagi, o le mea tonu lava lena o loo tatou talosaga atu ai pe a tatou tatalo i le Tatalo a le Alii, po o Lo matou Tama e, lea na aʻoaʻo i tatou e Iesu Keriso e tatalo ai. [Suʻe i le itulau e 3, ma faitau le palakalafa muamua, lea o loo sii mai ai le Mataio 6:10.] Afai e te fia ola i se lalolagi e pei o lena, e tatau ona e faitauina lenei polosiua.” Ofo i ai e mafai ona tuu.
3 E mafai foi ona faatomua le polosiua: “Pe a Maliu se Tasi e Pele i a te Oe” i le auala lenei:
◼ “Pe e te manatu o le a oo mai se aso e lē toe oti ai se tasi e pele ia i tatou? [Faatali mo se tali.] O lenei polosiua ua matagofie ona tusia, ua mafai ona faamafanafanaina ai le faitau miliona o tagata i le folafolaga mautinoa a le Tusi Paia e faapea, i le lumanai lata mai, o le a oo mai ai lena aso. [Suʻe i le itulau e 5, ma faitau le palakalafa lona lima e aofia ai ma le 1 Korinito 15:21, 22. Ona suʻe lea i le ata i le itulau e 30.] I inei, ua faaatagia mai ai e le tusiata le olioli e mafai ona oo ia i tatou i le faafeiloaia o ē pele ia i tatou na maliliu pe a toe tutū mai. A e o fea o le a tupu ai lenei vaaiga fiafia? O le a faailoa atu e lenei polosiua ia te oe le tali a le Tusi Paia i lena fesili.” Afai e talia le polosiua, e mafai ona e faaopoopo atu e faapea: “Ou te manao ou te toe foi mai i se taimi mulimuli ma talanoa atili e uiga i lenei mataupu.”
4 Atonu o le a e faatomua le polosiua “Faauta! Ou te Faia ia Fou Mea Uma Lava,” e faaaogā ai lenei taulimaga tuusaʻo e amata ai se suesuega faale-Tusi Paia:
◼ “E toatele tagata e i ai ni fesili e uiga i le Tusi Paia. Atonu sa e tau manatu e uiga i se tali i se tasi o nei fesili. [Suʻe i le itulau e 30.] O le fesili mulimuli lenei ua faagaee ai le naunau o le toatele: ‘E mafai faapefea ona e sauniuni mo le ola e faavavau i le Parataiso?’” Afai e te talanoa i le palakalafa 57-58 i le itulau e 29-30 ma faitau le Faaaliga 21:3, 4, o le a e faataatia ai se faavae mo le amataina o se suesuega faale-Tusi Paia. Ia faaiu i le tuua o le polosiua ma fuafua se toe asiga, ina ia mafai ai ona talanoaina nisi o fesili.
5 O le iai o polosiua lelei eseese e faaaogā, e mautinoa lava ua faaauupegaina ai i tatou “e talaʻi le tala lelei i e tigaina [“agamalu,” NW].”—Isa. 61:1.