“Tele Mea e Fai i le Galuega a le Alii”
1 O le mea moni, ua matuā tumu a tatou faasologa i gaoioiga faatiokarate o loo aloalo atu i ai ia Aperila ma Me! I le Aso 14 o Aperila o le a tatou faamanatuina ai le Faamanatuga o le maliu o Keriso. E ao ona faalaeiauina le toatele o tagata e mafai ai ia auai i lena sauniga tāua: o ē masani ai i faigā pisinisi, o aiga lē talitonu, o uo i aʻoga, o tagata fiafia fou, ma tagata aʻoga o le Tusi Paia. Fai se lisi o i latou ua e fuafua e valaaulia ina ia lē misia se tasi.
2 I le vaiaso e sosoo ai, o le a tatou faalaeiauina ai tagata uma o ē na auai i le Faamanatuga e faalogologo i le lauga lautele faapitoa ia Aperila 23, i le mataupu “Ua Lata mai le Iuga o Lotu Sese.” E i ai le faamoemoe o le toatele o tagata fiafia e faalogo i lenei feau tuusaʻo, o le a iloa le manaoga o le auaufaatasi pea ma le faapotopotoga, a e lē na o ni taimi faapitoa.
3 Tala o le Malo Faapitoa o le a Tatalaina: O se sini tāua o le sauniga ia Aperila 23, o le tatalaina lea o le Tala o le Malo Nu. 34, e fetaui lelei ma le taimi, e fa ona itulau, lea o le a faasalalauina atu i le lalolagi aoao seia oo ia Me 14. Tou te lē ioe ea, o le a “tele mea e fai i le galuega a le Alii” i lenei vaitaimi o le Faamanatuga?—1 Kori. 15:58.
4 O le a tuuina atu i faapotopotoga taitasi se sapalai o Tala o le Malo. O pusa o loo i ai Tala o le Malo e tatau ona teuina i se nofoaga malu ma e lē tatau ona tatalaina seiloga ua faaiuina le polokalama ia Aperila 23. I lena taimi, o le a mafai loa ona maua le Tala o le Malo mo le tufatufaina atu i uso ma i le lautele. I le faaiuga o sauniga a le faapotopotoga, fonotaga matagaluega, po o aso fonotaga faapitoa ia Aperila 23, o le a mafai ai e i latou o loo auai i na sauniga ona maua se kopi ina ia latou faamasani ai i mataupu ma faaauupegaina ai mo le tufatufaina atu.
5 Tele Mea e Fai e Toeaina: I le amataga o lenei masina, e tatau i le au toeaina ona faia sa latou feiloaiga e talanoaina ai auiliiliga o le tauiviga faapitoa. E tatau i faapotopotoga ona taumafai ia galueaʻina uma a latou oganuu tofia. A o lei maeʻa le tauiviga, fai ni taumafaiga faapitoa ina ia galueaʻina oganuu na e lei galueaiina i masina e ono ua mavae. I le vaai atu i le tāua o le galuega, o le a tatou mananao e faataatia ese se taimi tele e mafai ai mo le faiva. E lē taumatea o le a toatele ni tagata talaʻi nai lo le mea masani o le a avea o ni paeonia lagolago. O le a faapena foi ona lē taumatea le matuā toatele o tagata aʻoga o le Tusi Paia e aufaatasi ma i tatou, o ni tagata talaʻi fou e lei papatisoina ua uma ona faamaonia. Maeu se taimi e olioli ai o le a tatou maua a o tatou galulue faatasi i le galuega a le Alii!
6 E ao i fai suesuega o Suesuega Tautusi a le Faapotopotoga ona faia ni fuafuaga maʻoti mo le molimau atu a le vaega i Aso Toonai ma Aso Sa. E tatau i tagata uma ona faalaeiauina ina ia faia ai ma le mataalia se sao. E faaopoopo i le galuega i le faaiuga o le vaiaso, e tatau foi ona faia se faasologa o le molimau atu i le afiafi a itiiti mai e faatasi i le vaiaso a o faagasolo le tauiviga. O nisi atonu e mananao e feiloai mo le auaunaga i le fanua pe a tuua le aʻoga e faaaofia ai ma tamaiti aʻoga o ē mananao ina ia faia so latou sao faaopoopo.
7 E ao ona faia se faasologa mo nofoaga e feiloai ai mo le auaunaga i le fanua ina ia mafai e paeonia ma le au talaʻi ona vave amata i aso taitasi i le faiva. E tatau i nei feiloaiga ona pupuu. E ao ona faia i nei feiloaiga taitasi se taulimaga faigofie o le Tala o le Malo. O feiloaiga i le aoauli mo le auaunaga e mafai ona faaaofia ai se fautuaga se tasi pe lua mo le faia o toe asiga ia i latou na talia le Tala o le Malo. A e peitai, atonu e sili atu i nisi o le au talaʻi ona mananao e auai i le tufatufaina i taeao ma afiafi. I lea itu, e tatau i le ovasia o le auaunaga ona faamautinoa ua lava oganuu o i ai. O igoa ma tuatusi o tagata uma o ē na faaalia le fiafia e tatau ona faamauina i pepa faamaumau mai lea fale i lea fale. O manatu autū o lea talanoaga puupuu e mafai ona tusia i le vaega mo faamatalaga. O le a saunia e lenei le auala mo se toe asiga mulimuli ane i le vaiaso po o le masina.
8 Afai o fesoasoani le tasi faapotopotoga i le isi e galueaiina la latou oganuu, e tatau ona tuuina atu suafa ma tuatusi o tagata fiafia i le faapotopotoga o loo tausia lena oganuu.
9 Mātua e, po o taumafai a outou fanau e agaʻi atu e avea ma tagata talaʻi e lei papatisoina? Ua matauina i nisi o faapotopotoga e faapea, ua tele tausaga o o faatasi fanau amio lelei ma o latou mātua ua tuuina atu i le faiva, ma ua faamaonia le agaigai i luma o tamaiti, a e e lei avea i latou o ni tagata talaʻi o le tala lelei. E ao i mātua ona manatunatu po ua agavaa moni a latou fanau mo lenei faaeaga. E mafai e ni toeaina se toalua ona talanoaina vala uma ma le ulu o le aiga, ma fuafua po ua mafai ona faitaulia le tamaitiiti e avea o se tagata talaʻi e lei papatisoina.—om itu. 99-100.
10 Po o i ai i le oganuu a la outou faapotopotoga ni tagata talaʻi e lē o toe tiotio i le ofoina atu o taulaga o viiga ia Ieova? (Epe. 13:15) O nisi o ē ua lē o toe talaʻi pea atonu ua lofia i le loto vaivai po o popolega o le olaga, a e o loo faaauau pea ona pipii atu i tapulaa tau amio a le Tusi Paia. O se asiasiga faaleuo a se tasi o toeaina e mafai ona uunaia ai o ia e toe foi atu i le auaufaatasiga e masani ai ma le faapotopotoga ma, i le taimi talafeagai e toe faafou ai gaoioiga i le faiva.
11 O i Latou Uma ua Agavaa e Mafai ona Saosaolaumea i Lenei Galuega e Faafiafiaina Ai: Pe e faigata i nisi o outou fanau po o ni talavou ona faia se sao i le faiva mai lea fale i lea fale? A e faapefea outou na e fou o ē e lei lava lo outou potomasani i le galuega talaʻi? O le a outou maua le matuā faafiafiaina i le galue i le tufaina atu o le Tala o le Malo faapitoa! E pau le mea e manaomia, e na o se taulimaga faigofie.
Atonu e te taʻua se mea faapenei:
◼ “I le masina lenei, o loo matou tufatufaina atu ai se feau tāua i atunuu e 232 i le lalolagi aoao. E tāua le feau, ua aumaia ai ia i tatou ni mafuaaga maumaututū e talitonu ai o loo i ai se vaifofo i faafitauli o loo tatou fesagai i aso nei. Matou te fiafia ina ia i ai sau lava kopi.”
Atonu e te faataitaia lenei:
◼ “I le masina lenei, e faitau miliona tagata tauofo o loo tufatufaina atu se feau tāua i le tele o gagana. Na saunia lenei feau mo tagata o ē mananao e vāai atu ua faaiuina faafitauli o loo tatou fesagai i aso nei. O le kopi lenei mo oe.”
Atonu e fetaui lenei taulimaga faigofie ia te oe:
◼ “O loo matou faalaeiauina tagata uma e faitau i lenei feau tāua e faapea lona matua [faitau le matua o le Tala o le Malo]. Mātau foi le mea o loo taʻua i inei i le itulau e 2 e faatatau i le faateleina o faafitauli o . . . [faitau fuaiupu ua filifilia mai le Tala o le Malo]. Matou te talitonu o le a e fiafia e faitau atoa i lenei feau talafeagai ma o tatou taimi. Ia o lau kopi lea.”
12 Ia faaalia le naunau totino i tagata uma o ē na talia le Tala o le Malo. Tautala faagesegese ma manino; e leai se mafuaaga e faanatinati ai lau taulimaga. Tatou te mananao ina ia galueaiina maeʻaeʻa la tatou oganuu ma vaai ua tuuina atu ni kopi totino ia i latou uma lava e faaalia le fiafia e talia ma faitau le Tala o le Malo. Pe a lē o i ai se tasi i le fale, ia faailoga ma le faaeteete lau pepa faamaumau mai lea fale i lea fale ina ia mafai ona e toe foi atu i se taimi talafeagai e ofo i ai le Tala o le Malo i lē ona le fale. E ono mafai foi ona faaaogā lenei Tala o le Malo i le molimau atu i magaala pe a faaalia e se tagata le naunau e faitau i le mataupu. E lē tatau ona soona tufaina atu kopi e pei o ni fasipepa faasalalau. Nai lo o lena, ia faalatalata atu i le tagata ma faamatala le tāua o le feau o loo faaalia ai. Faaaogā le Tala o le Malo i talaʻiga lē fuafuaina, i faigamalaga, po o le molimau atu i uo i galuega i le taimi o le taumafataga i le aoauli. O i latou e nonofo i fale po ua lē mafai ona feoai, e mafai ona latou ofoina atu i tagata e asiasi atu ia i latou, o fomai ma tausimaʻi, tagata faatauoloa, ma isi e ō atu i o latou fale.
13 E fia ni toe asiga o le a e faia i le taimi o le tauiviga? E lē taumatea o le a matuā toatele, talu ai o i latou uma o ē na faaalia le fiafia i le Tala o le Malo e tatau ona toe asia. I le uluai asiasiga, e sili ona lelei pe a faatomua na o le Tala o le Malo. A e toe foi atu, ia fai sina faamatalaga e uiga i le talafeagai o le feau o loo i le Tala o le Malo mo o tatou taimi. Faalogologo lelei a o faamatala mai e lē ona le fale ona manatu i mea na ia faitauina. O ana faamatalaga o le a fesoasoani ia te oe e iloa po o le fea o mekasini fou e te ofoina atu ma faapefea ona e sauniuni mo nisi talanoaga atili. Afai e talileleia mai oe i le toe asiga, taumafai e amata se suesuega faale-Tusi Paia.—1 Kori. 3:6, 7.
14 “E le se Mea Faaleaoga lo Outou Tautiga”: Po o le a aogā ea nei galuega uma? Na faamautinoaina e Paulo tagata i Korinito e faapea: “E le se mea faaleaoga lo outou tautiga i le Alii.” (1 Kori. 15:58) I le mavae atu o tausaga, na matuā faamanuiaina ai a tatou taumafaiga e tufatufaina atu Tala o le Malo. O se tasi ulugalii na siitia atu i se fale mautotogi e nonofo ai, na mauaina se kopi tuai o le Tala o le Malo i se pusa toso. Ona pau lava lena o le mea na tuua ai i le fale atoa. Ina ua uma ona faitau i ai, na la faafesootai atu le faapotopotoga i le nuu lena ma talosaga mo se suesuega faale-Tusi Paia. Na amata ona la auai i sauniga uma ma mulimuli ane faaalia le naunau ina ia papatisoina. Atonu o se kopi e te tuua o le a maua ai ni iuga talitutusa!—km 11/74 itu. 1; tagai foi i le Awake!, o Novema 8, 1976, itulau 15.
15 E i ai se galuega tele o loo taatia mai i o tatou luma. O lo tatou sini e mo faapotopotoga taitasi ina ia oo atu ia Me 14 a e ua uma ona galueaiina atoa ana oganuu tofia, po o le faaiuga o lena masina pe afai e tatau ona faaumiumi atu le taimi mo le tufaina atu o Tala o le Malo. Ua uma ona faia tofiga ina ia maua e paeonia sauatoa ma paeonia lagolago le 250 kopi o le Tala o le Malo. O tagata talaʻi taitoatasi o le faapotopotoga o le a maua le sili atu i le 50 kopi. E ao i tagata talaʻi ma paeonia ona ave ni kopi i le tele latou te mafaia ona tufaina atu ma e tatau ona toe faafoi atu ni kopi e totoe e faaaogā e isi. O le felagolagomai i lenei itu o le a faamautinoa ai le tufaina mamao e mafai ai o lenei feau tāua. Pe afai ona o le telē o le oganuu ua tofia i nisi o faapotopotoga ma o le a oo atu i le ogatotonu o Me e lei maeʻa ona galueaiina a latou oganuu a e o loo totoe pea kopi, o se auala poto le valaaulia o faapotopotoga tuaoi ina ia fesoasoani ane. I isi faapotopotoga, atonu e faatinoina lea manaoga e le faapotopotoga lava ia pe afai e faateleina e le au talaʻi o latou taimi e avea ai ma paeonia lagolago po o le auai pea i le faiva.
16 O le tuutoina ma le loto atoa ia Ieova e manaomia pe afai tatou te mananao e faaiuina la tatou galuega. (Kolo. 3:23) O loo aafia ai ola. E lē mafai e tagata ona faaleamanaiaina le uiga o tulaga o le lalolagi i aso nei. Ua luluti le talo, ua lalata le vāivaa. E tatau ona latou amanaia le mea moni e faapea e lē o i le tagata le vaifofo i faafitauli o lenei lalolagi. A e o loo i le Atua. O i latou e mananao ina ia maua le faamanuiaga a le Atua, e tatau ona gaoioi nei loa, ma le lē faatuai, e tusa ai ma lenei tulaga manaomia.
17 I le faaiuga o le tauiviga faapitoa ia Me 14, po o le a tatou faagesegese ai ea i la tatou galuega? E leai! O le a tumau pea ona tatou pisi e tusa ai ma le fautuaga faagaeeina a Paulo.