Tauiviga Faapitoa iā Oketopa 16–Novema 12!
1 “Ua i Faitotoʻa le Iʻuga o Lotu Sesē!” O le matua lenā o le Tala o le Malo Nu. 37, lea o le a tufatufaina atu i le lalolagi aoao i le amataga o le masina fou. I le ʻafa muamua o Oketopa, o le a tatou ofoina ai le Olomatamata ma le Ala Mai! E amata i le Aso Gafua, Oketopa 16, seʻia oo i le Aso Sa, Novema 12, o le a tatou auai i le tufatufaina atu ma le filigā o le Tala o le Malo Nu. 37. I faaiʻuga o vaiaso a o faia le tauiviga, o le a tatou ofoina ai foʻi ma mekasini o loo ofo i lenā taimi.
2 I Latou e Mafai Ona Auai: O i latou uma o loo tiotio i le talaʻia o le tala lelei, o le a mananaʻo e faia so latou sao atoatoa i lenei galuega. O le a mafai e nisi ona auai o ni paeonia lagolago. Po o iai sau fanau po o ni tagata aʻoga o le Tusi Paia o loo agaʻigaʻi i luma faaleagaga? Fesoasoani iā i latou e talanoa atu i toeaina ina ia iloa, po ua latou agavaa e avea ma tagata talaʻi e leʻi papatisoina. E tatau i toeaina ona tausolomua e talanoa atu i tagata talaʻi e lē o toe talaʻi, ina ia faalaeiau i latou ia auai, atonu e galulue faatasi ma tagata talaʻi o loo iai le poto masani.
3 Ua auina atu nei le sapalai o Tala o le Malo Nu. 37 i faapotopotoga uma, ina ia maua e tagata talaʻi ma paeonia, a itiiti mai e 50 kopi a le tagata. O i latou e faaalia le fiafia e leʻi avea ma tagata talaʻi, e mafai ona maua ni kopi se lima a le tagata e tufa atu i o latou aiga ma uō. E ao i tagata uma ona faamaumau Tala o le Malo ua tuu i tagata, ma tusi i tua o a latou pepa lipoti o le auaunaga i le faaiʻuga o Oketopa ma Novema. O le a faamaumau e le failautusi le aofaʻi o Tala o le Malo na tufaina e le faapotopotoga, ma lipoti atu i le ofisa o le lālā i le iʻuga o masina taʻitasi. O kopi o le Tala o le Malo e totoe pe a uma le tauiviga, e mafai ona faaaogā i so o se vala lava o la tatou faiva.
4 Le Tala e Fai Atu: Ia faapuupuu lau taulimaga, ina ia tele ai se taimi e tufa atu ai le feʻau i tagata. E mafai ona e faapea atu: “O loo oʻu faia se auaunaga i tagata i le lautele i le tufaina atu, o se feʻau tāua tele o loo faia i le lalolagi aoao. O le kopi lenei e tuufua mo oe. Faamolemole faitau i ai.” Atonu e sili atu ona lelei pe a aua neʻi avea se ato talaʻi i le talaʻiga i le fale i le fale. Ia faamautinoa ua faia ni faamaumauga o tagata fiafia na maua.
5 Le Auala e Talaʻia ai la Outou Oganuu: I lo le tufaina atu o le Tala o le Malo i alatetele, ia taulaʻi atu e talaʻi i le tele e mafai ai, i le fale i le fale ma oganuu o pisinisi pe afai e mafai. Ia faamaumau uma fale e leʻi maua i ai nisi, ma taumafai e toe foʻi atu i se isi taimi po o se isi aso o le vaiaso. E amata atu i le Aso Gafua, Novema 6, e mafai ona tuu se kopi i aiga e lē o maua i ai se tasi. Ae peitaʻi, afai e telē atu le oganuu a le faapotopotoga na i lo le tele e mafai ona talaʻia i le taimi faatulagaina, atonu la e fuafua e toeaina ina ia tuu le Tala o le Malo i aiga e lē o maua i ai nisi, a o faagasolo le taimi atoa o le tauiviga.
6 Ua televave mai tele le faaumatiaga o ‘Papelonia le Aai Tele.’ E manaʻomia e tagata ona ō ese mai ai a o leʻi faaumatia atoatoa. (Faaa. 14:8; 18:8) Ia faia nei ni fuafuaga, ina ia faia se sao i lenei tauiviga o loo faia i le lalolagi aoao ina ia iloa e tagata uma, ua i faitotoʻa le iʻuga o lotu sesē!