Pusa Fesili

◼ O ā mea e tatau ona tatou aveina i sauniga?

I vaiaso taitasi tatou te maua ai faatonuga aogā ma faalaeiauga i sauniga a le faapotopotoga. (Isa. 48:17; Epe. 10:24, 25) A e peitai, o le tele o aogā tatou te maua ai, e faalagolago tele lea i le po ua tatou sauniuni lelei pe leai.

O le a lelei mo sui taitoatasi o le aiga ona i ai sana lava tusi mo suesuega ma isi mea e manaomia mo sauniga. E aofia ai le i ai o se Tusi Paia, se tusi pese, o lomiga ia e suesueina, se ʻapi e faia ai faamaumauga ma se peni po o se penitala.

Mo le Aʻoga o le Faiva Faatiokarate, e manaomia le Faasologa mo le Aʻoga ma le tusi Theocratic Ministry School Guidebook. O nei mea e fesoasoani ia i tatou e manatua ai matua o lauga a tagata aʻoga ia e faia ma mulimuli ai i le fautuaga a le ovasia o le aʻoga. E mafai foi ona tatou faatatauina totino le fautuaga ma timaiga ina ia mafai ai ona faaleleia a tatou lava lauga ma taulimaga i le auaunaga i le fanua. E talu mai Ianuari, o le tele lava o lauga o faatonuga o loo faavae mai i le tusi Jehovah’s Witnesses—Proclaimers of God’s Kingdom. Atonu e lē mafai e tagata taitoatasi o le aiga ona ave lana ia lava kopi; atonu e mafai ona ave se tusi se tasi ina ia mafai ai e le aiga ona sue i ai mo ni faamaoniga.

E mo le Sauniga o le Auaunaga, e manaomia ona i ai se kopi fou o La Tatou Faiva o le Malo ma le tusi Reasoning. Ia ave ni lomiga e mafai ona faaaogā i le taimi o le sauniga e pei o ni lomiga o le a faaaogaina i le faia o ni faataʻitaʻiga. E tatau i toeaina ona i ai se kopi o le tusi Organized to Accomplish Our Ministry.

E tatau i mātua ona taumafai malosi e faanonofo fifilemu a latou fanau ma uai totoʻa i sauniga a le faapotopotoga. O le ave i ai o ni a latou lava kopi o Le Olomatamata ma isi lomiga, e tusa lava pe latou te lei iloa faitau tusi, o le a faalaeiauina ai i latou e faaalia le fiafia. Pe afai e aʻoaʻoina le au laiti e faaaloalo i lomiga ma faaaogā, ona mafai lea ona faatupuina ai o ni uiga faaleagaga e atoatoa ona mamā i le olaga atoa.

O le olioli ma le loto malie tatou te maua i sauniga a le faapotopotoga, e matuā faateleina pe afai tatou te ō i sauniga ua matuā faaauupegaina lelei. (2 Timo. 3:17) O le auala sili lenei ona lelei e faamautinoa ai ua “atoatoa ona outou iloa lelei o lona finagalo i le poto uma atoa ma le mafaufau faaleagaga.”—Kolo. 1:9.