Tauaofiaga Itumalo o le 1995 “O Ē Vivii ma le Olioli”

¹ E fia ni mafuaaga o iai ia i tatou ina ia tatou olioli ai? Atonu e lē toatele nisi o i tatou ua faataʻitaʻia ona lisi uma i lalo ia mafuaaga. E ui o loo tatou ola ma soifua i se lalolagi o le fenuminumiai ma le lē mautonu, ae o loo tele lava mafuaaga o loo ia i tatou e olioli ai. “O Ē Vivii ma le Olioli” o le matua faamalosiau lea ua saunia mo le tauaofiaga itumalo o le 1995.

² Tatou te viia Ieova ona o lona aʻoaʻoina o i tatou i le upu moni. (Isa. 54:13; Ioa. 8:32) O lenei ua mafai ai ona tatou tufaina atu ma le olioli le upu moni, i ē uma lava o loo saili mo le saogalemu ma le fiafia. (Eseki. 9:4; Galu. 20:35) O lo tatou auuso Kerisiano foi ua aumaia ai ia i tatou le olioli. O se aiga mafana faaleagaga ua aumaia ai ia i tatou le loto malie ma le fiafia. Ua na o nai nisi nei o mafuaaga mo lo tatou olioli, lea ua faaosofia ai i tatou e vivii ia Ieova. O le a faauaʻi atu e lauga ma faataʻitaʻiga o le tauaofiaga lo tatou naunau i nisi mafuaaga atili faale-Tusi Paia mo lo tatou olioli i nei taimi faigata o aso e gata ai.

³ O se Tauaofiaga e Tolu Aso: Po ua fai se lua talanoaga ma lou pule i le galuega i ni ou aso mālōlō, ina ia mafai ai ona e auai i aso uma e tolu o le tauaofiaga? O tamaiti aʻoga ia o le a auai i tauaofiaga ae o loo fai aʻoga, e tatau i o latou mātua ona faailoa ma le āva i faiaoga e faapea o le a lē aʻooga tamaiti i le Aso Faraile ona o lenei vaega tāua o la latou tapuaiga. O fea e fai ai le tauaofiaga lena e sili ona latalata atu ia te oe? O Le Olomatamata o Fepuari 15, 1995, ua lisiina atu ai aso ma nofoaga mo tauaofiaga e faia i oganuu o loo vaavaaia e le lālā a Samoa i Sisifo. E tusa ai ma lena lisi, o le uluai tauaofiaga o le a faia i le faa-Samoa i Amerika Samoa, ia Aokuso 4-6, 1995. Talu mai le taimi na lomia ai lena mekasini, ua fuafuaina ai se tasi tauaofiaga ina ia faia i Amerika Samoa mo le faa-Peretania. O le a faia lea ia Aokuso 25-27. O le a faia le tauaofiaga i Samoa i Sisifo ia Setema 22-24, ona sosoo mai lea ma le tauaofiaga i Toga ia Novema 24-26. O le tauaofiaga mulimuli o le a faia i Tuvalu ia Tesema 8-10, 1995.

⁴ O le a amataina le polokalama i le 9:40 i le taeao o le Aso Faraile ma faaiuina i le 3:50 i le afiafi o le Aso Sa. O polokalama o le Aso Toonai ma le Aso Sa, o le a amataina i le 9:30 i le taeao.

⁵ Po o le a E Auai?: Ua uunaia i tatou ina ia auai i aso uma lava e tolu o le tauaofiaga. Pe aisea? E finagalo Ieova ia tatou iai i inā. Ua tele ina osofaia lo tatou faatuatua ma lo tatou soifua maloloina faaleagaga i aso nei. Na fautua atu Paulo e faatatau i le “aua le lafoaiina le faapotopotoina o i tatou” i le taimi a o feagai ai Kerisiano i Iutaia ma omiga faigata. (Epe. 3:12, 13; 10:25) Na ola Kerisiano Filipi i “totonu o le tupulaga amio faapiopio ma le finau vale.” Ae peitai, na latou “susulu atu faapei o mea e faamalamalama aʻi le lalolagi.” (Fili. 2:15) Aisea na ese ai nei Kerisiano o le uluai senituri? Talu ai sa latou mulimuli ma le usiusitai i le taʻitaʻiga a le agaga paia lea na taʻitaʻiina ai i latou ina ia faapotopoto faatasi ina “ia taufaatupu ai le alofa ma galuega lelei.”—Epe. 10:24.

⁶ A lē faia faapea, e ono faaaafia i tatou e le lalolagi ma faavaivaia ai lo tatou naunautaiga e feiloai ma o tatou uso ma vivii atu ia Ieova. Ua valaaulia i tatou i lenei vaitaimi o le tausaga ina ia tuu atu i tatou i le taʻitaʻiga a le agaga o Ieova ma olioli ai i aso uma e tolu o le tauaofiaga. Po o tatou maumauai ina ia auai uma ma lo tatou aiga atoa? E manaomia ona faamalosia pea lo tatou alofa ma le faatuatua i le tulaga masani e tatau ona iai. Ua saunia e Ieova tauaofiaga faaletausaga e fesoasoani ia i tatou i lenei itu.

⁷ Ia Ave i Fale le Oa: E faapefea ona e maua mea e aupito sili ona lelei mai le tauaofiaga? E tasi lava le tali, o le “uaʻi atoatoa” atu. E lē faigofie lenei mea i nei aso o le saoasaoa ma le maualuluga o faiga a tagata ua iai. E faafaigata i le au talavou o loo malaulau aʻe le malosi ona uaʻi atu, ae o se luʻitau foi e fesagai ma i tatou uma lava i le taimi e auai ai i le tauaofiaga itumalo. O le a faigofie lo tatou uaʻi atu pe a tatou fuafua mamao. Ia fesili ifo ia te oe lava, ‘⁠Po o le ā le matua o le tauaofiaga?’ Ia mafaufau loloto i ai! ‘⁠Pe aisea o le a ou alu ai, ma o le a laʻu mea o le a fai i ia aso e tolu? Po o le a faatumu loʻu afiafi i fiafiaga, po o lea ua faatulaga se taimi e lava ma totoe ou te mālōlō ai ma toe autalu manatu tāua o le tauaofiaga?’

⁸ O le mataupu o Le Olomatamata o Fepuari 1, 1984, “Pe o E Mafaufau Loloto po o na ona E Miti Ao?” ua aumaia ai ni manatu i le auala e mafai ona mauaina mai ai aogā silisili i le sauniga ma o loo aumaia ai le faaiuga e faapea: “O le aʻoaʻoina lelei o le mafaufau atonu o le vala e pito sili lea ona tāua.” Pe a amata ona tautala le failauga, e masani lava ona tatou uaʻi totoʻa atu, ae pe ua tau umi loa talu ona faasolo le lauga, ona tatou faatagaina lea o o tatou mafaufau e “faatafetafea ese atu.” E faapefea ona tatou taofia lenei mea ia aua neʻi tupu?

⁹ O fautuaga na aumaia i le taimi ua teʻa e aogā ona toe faamanatu atu auā ua faamaonia le aogā. Pe afai e mafai, ia taumafai ia lava le mālōlō i po taitasi. E lē faigofie lenei mea auā e aofia ai femalagaaiga, ma pe afai e te nofo i se fale mautotogi, atonu e te lē vave moe pe mālōlō lelei foi e pei ona e iai i lou aiga. O fuafuaga lelei e masani lava ona e maua ai le mālōlōga manaomia.

¹⁰ O faamaumauga faigofie ua faamaonia le fesoasoani i le uaʻi atu. Pe afai e te taumafai e tusitusi uma le tele o faamatalaga, e mautinoa la le ono misi atoa o nisi mea tāua. O se fautuaga, ia fai au faamaumauga ma le manatu o loo e avatua se aotelega o le polokalama i se tagata aʻoga o le Tusi Paia po o se tasi ua lē mafai ona auai. E tusa lava pe leai se isi patino o e mafaufauina, ae o le a iai se fuafuaga o le faia o faamaumauga, ma pe a maeʻa le tauaofiaga atonu o le a e maua ni avanoa e tufa atu ai manatu tāua o le polokalama a o e talaʻi lē fuafuaina atu i ni sui lē talitonu o le aiga. O le faia o faamaumauga ma tufa atu i isi mea na e faalogo ai, o le a lē vave ai ona galo ia te oe manatu. O le faamatala atu e faateleina ai le manatua.

¹¹ E ui lava o le a lē toe sauniaina ni meaʻai, ae e iai lava tupe e tele e faaalu e aofia ai le totogia o mea e faaaogā i le tauaofiaga, lea e masani ona aofia ai tupe faaopoopo e totogia mo mea faalelei leo, o tusi, ma isi mea faapena. E tusa lava pe faia le tauaofiaga i se tasi o a tatou Maota Fono, ae o loo iai pea le eletise, ma mea e faaaogā mo le faamamāina o le maota, e manaomia ona totogia. E faapefea ona totogia nei tupe faaalu? E ala i a tatou meaalofa tauofo, a lē o tupe po o siaki e faasiaki atu i “Molimau a Ieova.” E ōgatusa lenei mea ma le Salamo 96:8 ma le 2 Nofoaiga a Tupu 31:12.

¹² E Āva Ē Vivii ma le Olioli ia Ieova e Ala i a Latou Amioatua: I le tausaga ua teʻa na mauaina ai faamatalaga mautinoa e faalaeiau ai e uiga i a tatou amio mai tagata e faigaluega i fale mautotogi ma ē faigaluega i nofoaga sa faia ai tauaofiaga. Na taʻua e se tasi pule o se faletalimalo mautotogi e faapea: “O se fiafiaga pea le faatagaina o Molimau e nonofo i inei auā o i latou o ni tagata e onosai ma lagolagosua ma e vaavaaia lelei foi a latou fanau.” Na fai mai le isi faatonu o se faletalimalo e faapea e vaaia lava le fiafia o Molimau, ma e sili atu ona maopoopo nai lo se isi lava vaega. E ui lava o la tatou tauaofiaga o se faatasiga sili atu lea ona telē na faia ai i inā, ae fai mai a ia: “E leʻi tele ni faitioga ma ni toʻatugā na matou mauaina mai ai, nai lo isi vaega ia sa iai, ae laiti mamao atu o latou faitau aofai.”

¹³ Na taʻua e se tagata faigaluega i se faletalimalo, o se tauaofiaga na seʻi mavae atu na muamua ia i tatou, na uma ane ua tele mea ua faaleagaina ma gaoia, e ui sa iai uma le au faigaluega atoa. Ae i la tatou tauaofiaga, na fai mai atili o ia: “E matou te lē popole i lena mea i Molimau. . . . Pe a latou i inei, e matou te tuuina ai lava na o ni tagata faigaluega a lē toatasi pe toalua foi e avanoa ma e na ona fesoasoani ai i le faaleleia o faafitauli e tulai faafuaseʻi mai i masini.”

¹⁴ O o tatou moomooga, e maimau pe ana faapea uma lipoti e maua mai, peitai, e faanoanoa lava, auā e lē o le tulaga lena. Na matauina e se tasi taʻitaʻifono o le tauaofiaga e faapea: “Pe a maeʻa vaega o le tauaofiaga, o le toatele o le au talavou e faapotopoto faatasi i se aofaiga tele i le potu mālōlō tele o le faletalimalo i le leva o le po, ma toē leotetele ai ma feei. O lenei mea e faalavelave ai i isi malo . . . o ē e lē fiafia i le pisa. O nisi tamaiti e tamomoʻe solo i poletito, soona ato le tapuniina o faitotoa pe a latou feasiasiai mai i le isi potu i le tasi potu ma talanoa leotetele i totonu o potu.”

¹⁵ O se tasi o faafitauli ua tupu pea i le tele o tausaga o le toatele o uso e talatalanoa i poletito ma fafo atu o le fale fono a o faagasolo le polokalama. O se tasi o tauaofiaga o le tausaga ua teʻa, na mauaina ai se tusi mai se tagata aʻoga o le Tusi Paia i totonu o le pusa o meaalofa. Sa faitauina faapea: “Sa lei faapea ona faateʻia muamua aʻu ma faavaivaia i le pisa o oʻu autafa, le femigoiaʻi, o talanoaga, ma isi amioga lē fetaui na faia i le auala o le fale fono a o faia lauga . . . E lei avea aʻu o se Molimau, a ua na o aʻu o se tagata o loo suesue ma aʻoaʻoina le mataʻu ma le faaaloalo i le Atua.” E mautinoa lava, e leai se tasi o i tatou e manao e iai le manatu faapea, e lē o iai so tatou talisapaia mo sauniuniga a Ieova.

¹⁶ I taimi uma lava e ao ai ona tatou fesili ifo ia i tatou lava: ‘⁠O ai o loo oʻu suia, ma aisea ua ou auai ai i lenei tauaofiaga?’ O lo tatou tulaga faaleagaga ma lo tatou tuutoina atu i le Atua e faaatagia mai i a tatou upu, amio, ma le talisapaia o sauniuniga faaleagaga. (Iako. 3:13; 1 Pete. 2:2, 3, 12) O uso o ē na onosaia le tele o tausaga o taofiofiga ma faasasaāga o le galuega e matauina pea le sili atu o lo latou uaʻi atu ma faaalia le faaaloalo i tauaofiaga, i le nofoi pea i o latou nofoaga, ma naunau atu i lauga ma faataʻitaʻiga.

¹⁷ E Avatua e Ou Laei ma Teuga se Feau: I le 1 Samuelu 16:7, ua faamanatu mai ai ia i tatou e faapea “e vaai tagata i le tino, a e vaai Ieova i le loto.” O lea, e masani ona faamasinoina i tatou e tagata i o tatou foliga atu. E matauina lelei o tatou laei ma teuga, ae maise pe afai o tatou auai i se tauaofiaga mo le tapuaiga ma faatonuga o le olaga faa-Kerisiano. Pe afai o oe o se talavou aʻoga po o i lau galuega e te foliga tutusa ai ma tagata o loo mulimuli i teuga a le lalolagi, e ono faafaigata la ia te oe ona pipii atu i tapulaa faa-Kerisiano mo teuga e onomea.

¹⁸ E eseese tulaga o teuga ma laei i le tele o atunuu o le lalolagi. Ua faatalitalia Kerisiano e laeiina mai laei e onomea ma lelei. O ai e tatau ona filifilia le faia o lenei mea? O mātua e tatau ona faamautinoaina e lē o oofu a latou fanau pei o talavou o le lalolagi i le aʻoga. Ua uma ona aumaia taʻiala aogā e fesoasoani ia i tatou i le faia o filifiliga poto i lenei itu tāua. E matou te faalaeiauina le toe autalu o le mataupu o le Awake! o Fepuari 8, 1987, “O le ā le Uiga o Laei ia te Oe?” O le ā na matauina i nisi o a tatou tauaofiaga i le tausaga ua teʻa?

¹⁹ Ina ua uma se tasi o Tauaofiaga Itumalo o le “Mataʻu i le Atua,” na maua mai ai se faamatalaga lenei: “Ua faaleleia tele e uso ma tuafāfine o latou laei, le auala e teteu ai, ma a latou amio i le tauaofiaga i lenei tausaga. . . . E ui i lea, o loo iai pea nisi o tulaga ma amio e manaomia ona faaleleia atili.” Ina ua uma se tasi tauaofiaga, na lipotia mai e faapea sa matuā mataulia le lē onomea o laei sa laeiina. Na taʻua mai i le lipoti e faapea o laei o nisi sa matagā i le vaai a nisi. O nisi o tagata lē talitonu na auai na latou matauina foi ofu ia e lē onomea, o laei o nisi sa lē gata ina valavala ae fufusi tele i le tino.

²⁰ O le toatele lava o uso ma tuafāfine e laeiina laei onomea, ma laei talafeagai i le nofoaga o le tauaofiaga. Ae peitai mulimuli ane, i faletalimalo po o faleaiga, e laeiina ai e nisi o uso ma tuafāfine ia mitiafu e leai ni lima e aliali ai le tele o le tino ae o loo pipii ai lava pine fatafata o le fono, ofuvae tuai, o ofuvae vaepupuu e matuā pupuu lava i luga ma . . . ofu o āega e lē tatau mo tagata o le Atua.” Pe afai e matauina e toeaina le matele o nisi e laei faapea i taimi mālōlō, e ono ma tatau la ona avatu se fautuaga agalelei ae maumauai, a o lei faia le tauaofiaga, e faailoa atu ai o lena ituaiga o laei e lē talafeagai, ae maise lava mo ē usufono e auai i se tauaofiaga faa-Kerisiano. Faamolemole ia autaluina ma au tagata aʻoga o le Tusi Paia ia o le a auai i le tauaofiaga, nei taʻiala i amioga ma laei ua faatulagaina mai i luga.

²¹ O Faletalimalo: Faamolemole ia manatua le onosai ma le agalelei e faaalia pe a feutagai ma tagata o faigaluega i faletalimalo. Atonu tatou te vaivai mai le malaga ma atonu foi e umī le laina o ē faatalitali ai mo api, ae o lou onosai e lē faapea e lē o maitauina mai. E aogā tele mo tagata talaʻi ona toe autalu ma a latou tagata aʻoga o le Tusi Paia nei faamatalaga.

²² O Mea Pueata ma Mea Pueleo: E talafeagai ona avatu ni faamanatu agalelei e uiga i mea pueata ma mea pueleo. Ia manatua, afai ua e fuafua e faaaogā mea pueata, o mea pueata vitiō, po o se isi lava ituaiga mea pueleo, ia faaalia le magafagafa mo i latou e i ou autafa. O le fealuai solo a o taulimaina mai mataupu pe e oo lava i le pueina o se mea a o e saofai mai i lou nofoa, e mafai ona faalavelave ai i isi. E leai se mea pueleo o so o se ituaiga lava e faapipiia i mea o faatonutonuina mai ai le eletise ma leo mo le polokalama, e lē tatau foi ona polokaina va o nofoa po o auala i totonu o le fale i i masini o loo faaaogaina mo le pueina o au ata. Pe e te filifili e pueina ni ata pe pueina vaega o le polokalama i se mea pueata vitiō po o se laau pueleo, o le mea totino lena a le tagata lava ia. O ata ma mea ua pueina e mafai ona toe manatua ai mea na e fiafia i ai pe a toe tilofaia i se isi aso mulimuli ane. E tatau ona faaaogā ma le faautauta mea uma na, i se auala e lē faalavelave ai i isi pe taofia ai foi oe mai le mauaina o aogā silisili mai le polokalama. Pe a e foi i le fale, pe o le a iai se taimi e autalu ai mea na pueina? Atonu o le a e iloaina le faamalieina sili e mauaina mai i faamaumauga.

²³ Nofoa: I le Tauaofiaga Itumalo i le 1994 o le “Mataʻu i le Atua,” pe na e matauina ai ea se faaleleiga i le taofia o nofoa? Ua faia nisi faaleleiga, ae peitai e manaomia pea ona tatou mafaufauina lenei faamanatu: O NOFOA E TAOFIA MO NA O SUI O LOU LAVA AIGA MA SO O SE TASI ATONU O LOO TOU MALAGA FAATASI MAI I LAU TAAVALE. O loo tatou iai i inā e avea ma malo a le Sosaiete. O le faaaogaina o le maota fono ua totogia i meaalofa tauofo. O se agaalofa ea la ma magafagafa le taofia o se nofoa tatou te lē o mautinoaina pe faaaogā?

²⁴ I tauaofiaga taitasi, tatou te iai faatasi ma i latou e iai manaoga faapitoa, e pei o ē ua matutua ma ē e lē atoatoa le malosi o le tino. Ia mataalia e fesoasoani atu ia i latou o iai manaoga faapitoa ina ia mauaina se nofoa e nofo ai pe afai e lē o ō mai ma se tasi e vaaia i latou.

²⁵ Feagai ma Manaoga Tau Meaʻai mo La Outou Tauaofiaga: E pei ona outou iloa, na faasilasila atu i La Tatou Faiva o le Malo o Fepuari 1995 e faapea: “E amata atu ia Fepuari 1995, o le a lē toe taulimaina atu ni vaitaumafa i tauaofiaga itumalo, o fonotaga matagaluega, ma fonotaga o le aso faapitoa. O le a aumaia lava e le tagata ia lana meatausami ma lana vaitaumafa.” Na faamalamalama mulimuli ane ai e le faaopoopoga o La Tatou Faiva o le Malo o Fepuari 1995 le mafuaaga ua faia ai ia fesuiaiga, ma aumaia ai fautuaga lelei i le auala e saunia ai e tagata uma taitoatasi ana lava meaʻai ma vaiinu e manaomia i le tauaofiaga. O se mea lelei mo tagata uma le lē gata ina toe autaluina e i latou lava ia lena faaopoopoga ae ia talanoaina foi ma a latou tagata aʻoga o le Tusi Paia a o latou sauniuni e auai i le tauaofiaga. E tāua tele le malamalama o tagata aʻoga o le Tusi Paia e faapea o tagata o loo auai e tatau lava ona aumaia a latou lava meaʻai ma vaiinu i le tauaofiaga.

²⁶ E na ona faamamafa atu o nisi o mea tāua, atonu e te manao e manatuaina mea nei ua fautuaina e aumai mo le mālōlōga i le aoauli: o se meaʻai māmā, faigofie ma susua e pei lava o mea e masani ona ave e tagata i le galuega, e pei o se sanuisi, keke, ma fualaau ʻaina suamalie. O vaiinu e aofia ai le kofe, vai suamalie mālūlū, o sua o fualaau suamalie, po o se faguvai auli, i se fagu ti (thermos) po o se mea e lē mataʻetaʻe. Pe afai e manaomia tamai cooler, e talia pe afai e ofi i lalo o lou nofoa. Ae peitai, e lē tatau ona aumaia i totonu o le mea e fai ai le tauaofiaga ni cooler lapopoa, po o ni ʻava malosi. Ia matuā faaeteete pe afai e faaaogā ni fagu po o ni ipu mataʻetaʻe. E tatau ona taofia le aai a o faagasolo mataupu o le fono. E faaalia ai i lenei mea le lē faaaloalo i meaʻai faaleagaga o laulauina mai.

²⁷ O se lapataiga faaopoopo, e lē tatau ona kukaina ni meaʻai i potu o faletalimalo seʻi vaganā ua iai se vaega o le potu mo lena fuafuaga. E lelei tele ona mafaufau loloto i le mafuaaga moni o le taimi faatagaina mo le mālōlōga i le aoauli ina ia fai ai se taumafataga māmā ma olioli i le aufaatasiga faatiokarate ma o tatou uso ma tuafāfine. I le avea ma tagata o Ieova, e tatou te faamuamua ai le tāua o meaʻai faaleagaga e mauaina i le tauaofiaga nai lo mea faaletino, ma e tatau ona tatou fuafua faatatau i ai.

²⁸ E amata ia Aokuso 4, 1995, le tauaofiaga muamua o Tauaofiaga Itumalo “O Ē Vivii ma le Olioli” e faia i oganuu a la tatou lālā. Pe ua atoatoa au sauniuniga, ma pe ua e sauni ea e olioli i aso e tolu o fesaniaiga faaleuso ma fiafia i mea lelei e tele faaleagaga? O la matou tatalo ma le naunautai ia faamanuia Ieova i a outou taumafaiga ia auai i lenei tauaofiaga o lea foi taimi o le tausaga ma o outou uso ma tuafāfine a o tatou tulimataia pe faapefea ona avea i tatou ma ē vivii ma le olioli ia Ieova.

[Pusa i le itulau 6]

Faamanatu o le Tauaofiaga Itumalo

Papatisoga: E tatau i sui papatiso ona iai i o latou nofoaga ua saunia a o lei amataina le polokalama i le taeao o le Aso Toonai. Ua matauina le laeiina e nisi o ituaiga laei e lē mamalu ma laei e faauaʻi ese ai manatu mai le tāua o le sauniga. E tatau ona aumaia se solotaele ma se ofutaele onomea e i latou taitoatasi ua fuafua e papatiso. Pe a maeʻa le lauga o le papatisoga ma le tatalo e faia e le failauga, ona aumaia lea o faatonuga pupuu e le taʻitaʻifono o le polokalama, i sui papatiso ma faasilasila mai loa le pese. Pe a maeʻa le fuaiupu mulimuli, ona faasinoina atu lea e le ʻau tautua ia sui papatiso i le mea e fai ai le papatisoga. Talu ai o le papatisoga e faailoa ai le tuuina atu o se tasi, o se mataupu totino ma e patino a le tagata lava ia i lo la va ma Ieova, e leai ai la se faatulagaga mo sui papatiso e taitoalua pe sili atu e uulima faatasi pe faauouo a o papatisoina.

Pine Fatafata: Faamolemole ia laeiina pine fatafata o le 1995 i le tauaofiaga ma i le taimi a o malaga mai pe toe foi atu mai le nofoaga o le tauaofiaga. E masani ona faigofie ai i lenei mea ona tatou avatua se molimau lelei a o faimalaga solo. O pine fatafata ma faavaa e tuu ai e ao ona mauaina mai i a outou faapotopotoga, auā o le a lē mauaina atu i le tauaofiaga. Ia manatua lau pepa o le toto (Advance Medical Directive/Release card) e ave.

Api: O le toatele lava o ē auai mai i tauaofiaga i le oganuu a la tatou lālā e mafai ona alaala lava i o latou aiga po o le faia foi o ni a latou lava fuafuaga i mea e api ai. Peitai, pe afai e te manaomia se api, ia e tusi atu se tusi o loo otooto atu ai mea o e manaomia, ona tuu atu lea o le tusi i le failautusi o la outou faapotopotoga, ina ia tuuina atu i le matagaluega o loo vaaia api mo le tauaofiaga.

Taavale Toso Pepe ma Nofoa e Mafai ona Faataatitia i Fafo: I le tele o tulaga, e lē faaaogaina ai taavale toso pepe i nofoaga o faatasiga lautele. E lē faatagaina e aiaiga o tulaga tau tineimu le iai o nei mea i poletito o fale ma auala i va o nofoa. E talu ai o le tumutumu o tagata e ono feomai ai, e mautinoa la le matautia o taavale toso pepe e lē gata i le pepe ae faapena foi i so o se isi e ono lāvea ai. O lea faamolemole aua le aumaia ia taavale i le mea o loo faia ai le tauaofiaga. Ae peitai, e faatagaina ato po o moega o tamaiti, auā e saogalemu nei mea i autafa o nofoa o o latou mātua. Faamolemole aua foi neʻi aumaia nofoa ia e mafai ona faataatitia i fafo. E lamatia lona faaaogaina ma e lē faatagaina i nofoaga faitele. E talisapaia la outou lagolagosua i nei mea.

Auaunaga Tauofo: Pe e mafai ona e faatulaga se taimi i le tauaofiaga e fesoasoani ai i se matagaluega o le tauaofiaga? O le auauna mo o tatou uso e tusa lava pe mo na o ni nai itula, e avea o se fesoasoani tele ma faamalieina moni ai. Pe afai e mafai ona e fesoasoani mai, faamolemole taʻu atu i le Matagaluega o Auaunaga Tauofo o le tauaofiaga. O fanau i lalo ifo o le 16 tausaga e mafai foi ona faia se sao lelei i le galulue i lalo o le faatonutonuga a se matua po o se isi tagata matua o vaaia.

Lapataiga: O le mataalia i faafitauli e tutupu mai, tatou te alofia ai faigata lē manaomia. E masani lava o tagata gaoi ma isi tagata lē popoi e osofaia tagata a o ō ese mai o latou aiga. E tatau ai ona mautinoa ua lokaina lau taavale i taimi uma, ma aua neʻi tuua ai se mea o iloa atu e tofotofoina ai se tasi e osofaia. O le ʻau gaoi ma le ʻau seʻi ato e faatitino a latou faiga i faatasiga tetele. E lē o se mea poto le tuu o so o se mea tāua lava i lou nofoa. E te lē o mautinoa e faapea o tagata uma o i ou autafa o ni Kerisiano. Aisea la o le a e avatua ai i ai se tofotofoga? Ua maua mai ni lipoti o taumafaiga ua faia e tagata o le lalolagi e faatosina ese tamaiti. IA E ILOA LE MEA O IAI LAU FANAU I TAIMI UMA.

O televise o loo iai i le tele o faletalimalo e ola faalausosoo lava i potu nofonofo o le tele o faletalimalo e masani ona faaali ai ata matagā o aumaia ai faamatalaga masoā ma faiga lē mamā faaleituaiga. Ia mataala i ia mailei ma aua le faatagaina le fanau e saʻoloto e matamata i ia televise i le potu e aunoa ma se vaavaaiga lelei.

Faamolemole ia aua neʻi telefoni atu i le faauluuluga o le nofoaga o le tauaofiaga mo ni faamatalaga e uiga i so o se mataupu o le tauaofiaga. Pe afai e lē o maua mai i le ʻau toeaina faamatalaga, faamolemole tusi atu i le tuatusi o le tauaofiaga, lena e mafai ona e maua mai i le failautusi o le faapotopotoga.