Tauaofiaga Itumalo o le 1997, “Faatuatua i le Afioga a le Atua”

¹ Na faamanatu atu e le aposetolo o Paulo ia Timoteo e faapea “o tusi paia uma lava e mai le Agaga o le Atua ia.” (2 Timo. 3:16) Talu ai o le Afioga a le Atua e faagaeeina, ua iai la ia i tatou mafuaaga uma e faaalia ai le faatuatua i ai. O le matua o le tauaofiaga itumalo o lenei tausaga o le “Faatuatua i le Afioga a le Atua.” O le a faamalosia e le polokalame lo tatou faatuatua i le Tusi Paia, e tusa lava pe na tatou iloaina le upu moni mo le tele o tausaga pe e lei leva foi ona tatou auai i le faalapotopotoga a Ieova. E ao ona tatou fuafua uma e auai i le polokalame atoa. Maeu le faalaeiauina o le a iai pe afai o le a auai ma i tatou tagata fou fiafia, ae maise lava i latou o ē o loo tatou suesue i le Tusi Paia!

² Tauaofiaga e Tolu Aso: O le polokalame o le tauaofiaga itumalo e tolu aso o lenei tausaga ua fuafuaina mo lo tatou lelei. I Le Olomatamata o Fepuari 15, 1997, ua lisiina ai tauaofiaga o le a faia i le Pasefika i Saute. I le taimi nei, ua tatau ona e iloa ai aso ma le nofoaga e faia ai le tauaofiaga lea ua tofia i ai lau faapotopotoga, ma e ao ona faia ni fuafuaga mautinoa ina ia auai i aso uma e tolu o le polokalame. O le a amataina le polokalame i aso taitasi i le 9:30 i le taeao. Po ua e talanoa atu ea i lou pule ina ia aveina ni aso mālōlō manaomia? Pe afai e iai sau fanau aʻoga ma e paʻū tonu la outou tauaofiaga i le gasologa o le kuata faaleaʻoaʻoga, po ua e faailoa atu ea ma le faaaloalo i o latou faiaʻoga e faapea o le a toesea lau fanau mai le aʻoga i le Aso Faraile ona o lenei vaega tāua o lo latou toleniga faalelotu?—Teu. 31:12.

³ Ia Lelei Ona Uaʻi Atu: Na faamanatu atu e le aposetolo o Peteru i Kerisiano i le uluai senituri ina ia uaʻi lelei atu i upu faavaloaga e pei o se mōlī e mumū i se nofoaga pogisa. (2 Pete. 1:19) Ua moni foi lea ia i tatou. I le ola ai i lenei lalolagi tuai e pulea e Satani ua pei o loo iai i se nofoaga pogisa. Tatou te loto faafetai ai ina ua tatou ō ese mai i le pogisa faaleagaga. (Kolo. 1:13; 1 Pete. 2:9; 1 Ioa. 5:19) Ina ia tumau i le malamalama, tatou te manaomia ona faatumau le malosi o lo tatou faatuatua e ala i le uaʻi atu i le Afioga faagaeeina a Ieova. O la tatou tauaofiaga itumalo i lenei tausaga o le a faalaeiauina ai i tatou e faia faapea.

⁴ E ono manaomia ai i la tatou vaega ni taumafaiga pe afai tatou te uaʻi atu i le polokalame, ae e mautinoa o le a faamanuiaina i tatou i le faia faapea. E ao ona tatou taumafai e ō mai i le nofoaga e faia ai le tauaofiaga ua lava le mālōlō ma o le a tatou mataala ai a o faagasolo le polokalame. Ia lava le taimi e malaga atu ai i le nofoaga o loo faia ai le tauaofiaga i aso taitasi ina ia mafai ai ona e alala i lou nofoa a o lei amataina le polokalame. Ona auai lea i le pese amata ma le tatalo i le amataga o le polokalame i aso taitasi. O tagata matutua e tatau ona faataatiaina le faaaoaoga, ma o mātua e tatau ona toleniina a latou fanau.—Efe. 6:4.

⁵ Pe afai tatou te tagai i matua o vaega o le polokalame a o lei amataina, e mafai ai ona tatou tulimataia po o ā mea tāua o le a aumaia e le polokalame. O lenei mea o le a faatupuina ai lo tatou naunau i le mataupu pe a aumaia. E tatou te uaʻi atu i manatu ia e ono mafai ona fesoasoani ia i tatou e faamatalaina atu i isi le pogai tatou te talitonu ai i le Atua ma ana folafolaga mautinoa lea e tauia ai i latou o loo saili ma le faamaoni ia te ia. (Epe. 11:1, 6) Ua fautuaina le faia o ni faamaumauga pupuu e fesoasoani ia i tatou e manatuaina manatu tāua o le polokalame. Pe afai e tele faamaumauga e fai, tatou te ono misia nisi manatu autū ona ua tatou pisi naua e tusitusi.

⁶ I le tausaga talu ai e toatele tagata matutua ma talavou na matauina pea le fesavaliai solo i le faapaologa o le fale, femiomioai i fafo o le fale, ma talatalanoa atu i isi a o faagasolo le polokalame, nai lo le faalogologo atu i mea ua saunia e le “auauna faamaoni ma le mafaufau” mo lo tatou lelei. Na folafola mai e Iesu le aumaia o meaʻai faaleagaga i ona aso e tatau ai. (Mata. 24:45-47) O lea la, e tatau ona tatou auai ina ia maua aogā mai meaʻai ae lē o le faaalia o le lē talisapaia.—2 Kori. 6:1.

⁷ E foliga mai foi pe a oo i le taimi e taofiofigata ai nisi tamaiti, e masani ona fetagisi e fia ō i le faleese e fai ma faamolemolega e tu ai i luga ma fesavaliai solo. O toleniga talafeagai i le fale o le a mafai ona faaitiitia ai le ō soo i le faleese. E iai taimi, e nonofo faatasi ai talavou matutua i nofoaga e faigata ona iloa atu e se isi, ma talanoa ai, femusuai, ma pasi solo a latou fetusitusiaiga mai le tasi i le isi. O a tatou talavou, o ē o loo fesagai ma le tele o faafitauli i aso nei, e manaomia ona uaʻi atu i mataupu o loo faia, ae lē o le faia o isi mea a o faagasolo le polokalame. O faanaunauga o le autalavou ia e lē ogatasi ma mataupu silisili faale-Tusi Paia e tatau ona alofia. (Faatusatusa i le 2 Timoteo 2:22.) O le uaʻi totoʻa uma atu o tagata matutua ma talavou, o le a āva atu ai ia Ieova ma faafiafiaina ai o ia.

⁸ Pe afai ua tatau i se tasi o le au tautua ona fautuaina se tasi i nei mataupu, e ao ona taliaina o se sauniuniga alofa mai ia Ieova. (Kala. 6:1) O tagata uma e manaomia ona manatua le mafuaaga na tatou muai faia ai ni taumafaiga e auai i le tauaofiaga ina ia mafai ona tatou ‘⁠faalogologo ma aʻoaʻoina.’ (Teu. 31:12) E lē gata i lena, “e faalogo mai le tagata poto, e tupu ai pea lona poto.” (Faata. 1:5) I le taimi o totoe ae tou te lei auai i le tauaofiaga, ia talanoa faatasi o se aiga le manaoga o le nonofo faatasi, ia nonofo pea a o faagasolo le polokalame, ma uaʻi atu ma le faalogologo lelei, ina ia maua ai aogā atoatoa o le polokalame.

⁹ Teuga e Faafiafiaina ai Ieova: O tagata o Ieova o loo fai ma mataaga a le lalolagi. (1 Kori. 4:9) Ua matauina e le lautele le lelei o le tulaga o o tatou laei ma teuga. O le faatatauina o mataupu silisili faale-Tusi Paia i le 1 Timoteo 2:9, 10 ma le 1 Peteru 3:3, 4, ua iu ai ina matuā suia le auala ua laei ai le toatele pe a faatusatusa atu i le auala sa latou laei ai ina ua faatoʻā amata ona latou auai i le faapotopotoga Kerisiano. O le eseesega tele lena i le tulaga paʻū maulalo o laei ma teuga lea ua tatou vaaia i le lalolagi. E tatou te mananao ia leoleoina i tatou ia lē pei o le auala e laei ai le lalolagi—laeiina o ofu e matuā ese lava, o le auala e teu ai ulu, e pei ona faasilisilia i āʻega faalelalolagi, po o ofu lē onomea. O a tatou faaaoaoga i laei ma teuga e tatau ona fesoasoani i ē fou o auai i le tauaofiaga e iloaina ai le auala e ao ona faia ai a latou teuga.

¹⁰ A o iai pea se taaiga lelei mai le tauaofiaga o le tausaga na teʻa nei lea na matuā tauleleia, ae ua faaauau pea ona avea laei ma teuga faalelalolagi o se faafitauli i nisi o uso ma tuafāfine ae maise lava i taimi faasamasamanoa. A o faia a tatou fuafuaga e auai i le tauaofiaga, e tatau ona iloilo ifo ia i tatou lava e faatatau i o tatou laei ma teuga. O mātua, ia tagai lelei po o ā ofu o le a ofuina e a outou fanau laiti ma talavou. Ia faamautinoa lo tatou lē faatagaina o aga ma āʻega a le lalolagi e aumai ai se aafiaga lē lelei i o tatou foliga vaaia faa-Kerisiano.

¹¹ Tausisia Amioga Lelei: O amioga lelei e mataulia ai Kerisiano moni. (1 Pete. 2:12) O a tatou amio i so o se mea lava o tatou iai—i le tauaofiaga, i faleaiga, ma faletalimalo, e faapena foi pe a faimalaga—e mafai ona avatu ai se molimau lelei ma fesoasoani ai i isi ina ia iloaina le mea e mafai e le faatuatua i le Atua ma lana Afioga ona faia mo tagata. O lenei mea e ono mafai ona uunaia ai nisi e iloaina Ieova. (Faatusatusa i le 1 Peteru 3:1, 2.) Ua ia i tatou le faaeaga e viiviia ai le Atua e ala i a tatou amio. Na taʻua e le pulega o se tasi o faletalimalo i Amerika e faapea o o tatou sui usufono “o se vaega e ese le lelei ma silisili ona amio lelei ia na latou talimalo ai.” Na latou faapea mai atili: “O se faaeaga le toe talimalo ia te outou i le lumanai.” O se fiafiaga le faitauina o lipoti faapenei, a ea? E iai se manaoga ina ia tausisia le mataalia, ina ia mafai ai ona tatou puipuia le talaaga lelei o tagata o Ieova.

¹² Ua tele faamanatuga ua aumaia e tusa ai ma le pulea lelei o a tatou fanau, ina ia aua neʻi faatagaina i latou e fetaufetuliai solo e aunoa ma le vaaia lelei, ma faalavelave ai i isi tagata. E ui lava o tauaofiaga e saunia ai mo i tatou se avanoa tatou te asiasi atu ai ma auaumea ma lo tatou au uso, e tatau lava ona teu i mafaufau o mātua o la latou matafaioi le puleaina lelei o a latou fanau i taimi uma. O se tiute tauave lenei na tuuina atu e Ieova i mātua uma. (Faata. 1:8; Efe. 6:4) O gaioioiga lē pulea a fanau e mafai ona aveesea ai le talaaga lelei lea ua maua ona o taumafaiga a isi Molimau a Ieova.—Faata. 29:15.

¹³ Totogiina o Tupe Faaalu o le Tauaofiaga: O i tatou uma lava e iai tupe faaalu i le fesootai atu ma le auai i le tauaofiaga. E iai le isi tupe faaalu lea e tatau ona tatou manatunatu i ai. I nisi taimi tatou te manaomia ona totogi le faaaogaina o le fale ona e mafai ona taugata. E iai foi isi tupe faaalu e tatau ona tatou fesoasoani i ai. O lo tatou limafoai i meaalofa tauofo i tauaofiaga e matuā talisapaia lava.—Galu. 20:35; 2 Kori. 9:7, 11, 13.

¹⁴ Nofoa: O taiala ua aumaia i le tele o tausaga o le a faaauau pea ona faaaogaina, e taʻua faapea, O NOFOA E TAOFIA E MO NA O SUI O LOU LAVA AIGA MA SO O SE TASI ATONU NA TOU MALAGA FAATASI MAI I LAU TAAVALE. O se mea fiafia le vaai atu i le toatele o loo mulimuli i nei taiala i tausaga ua teʻa, ma o lenei mea ua faateleina ai le agaga o le alofa lea o loo faaalia i tauaofiaga. I le tele o nofoaga o tauaofiaga o nisi nofoa e faigofie ona oo i ai nai lo isi nofoa. Faamolemole ia faaalia le manatu mamafa i isi, ma ia faaavanoa nofoa e faigofie ona nofoia e ē o loo sili ona manaomia i o latou tulaga.

¹⁵ O Mea Pueata, ma Laau Pueleo: O mea pueata ma masini pueleo e mafai ona faaaogā i tauaofiaga. Ae peitai, o lo tatou faaaogaina o ia mea ia aua neʻi faalavelave ai i le aofia. E lē tatau ona tatou feoai solo e tapue ni ata a o faagasolo le polokalame, o le faia faapena e faalavelave ai i isi o ē o loo taumafai e uaʻi atu i le polokalame. E lē tatau ona sulu atu so o se ituaiga o mea pueleo i uaea eletise ma masini e faaaogaina mo le faiga e faaleotele ai le leo, e lē tatau foi ona poloka e masini le auala e fesavaliai ai tagata, pe punitia ai le vaai a isi.

¹⁶ Fesoasoani Muamua: O le Matagaluega o le Fesoasoani Muamua e mo na o faalavelave faafuasei. E lē mafai ona togafitia ai ni maʻi masani faaumiumi. O le mafuaaga lena e tatau ai ona muai iloiloina mea manaomia mo le soifua maloloina o lou aiga. Faamolemole ia aumai ni a outou lava fualaau asipurini, vai manava, mea faapipii, pine faamau napekini, ma mea faapena, ona o mea na e lē maua i le tauaofiaga. So o se tasi e iloa e aafia i se maʻi oso faafuasei, maʻi suka, maʻi fatu, ma isi lava maʻi, e ao ona lava tapena mai mea latou te manaomia. E tatau ona iai ni a latou vai po o ni fualaau saʻo, ma e tatau ona iai ma i latou i taimi uma se tasi o le aiga po o se tasi o le faapotopotoga e malamalama i o latou tulaga, ina ia saunia ai so o se fesoasoani manaomia. Afai e iai nisi o iai ni o latou manaoga faapitoa tau le soifua maloloina ae lē o iai nisi o lona aiga e mafai ona fesoasoani ia i latou, o toeaina o la latou faapotopotoga o le a manaomia ona logoina i lea tulaga ma faia i ai ni fuafuaga talafeagai e fesoasoani ai.

¹⁷ Meataumafa i le Tauaofiaga: O le lē toe iai o se auaunaga mo meataumafa i le tauaofiaga ua iu ai ina matuā saoloto le toatele e uaʻi atu i meaʻai faaleagaga a o faagasolo polokalame. E tele ni faamatalaga talisapaia ua mauaina mo lenei faiga faigofie ua faia talu ona suia le faatulagaga. E tatau i tagata uma ona fuafua e aumaia a latou lava meataumafa paleni ma lelei mo le malologa i le aoauli, e pei o mea ia o loo taʻua i le faaopoopoga o La Tatou Faiva o le Malo, Aokuso 1995, palakalafa 26. E leai ni fagu mataʻetaʻe po o ni ʻava malosi e aumaia i le maota o le tauaofiaga. O pusa (cooler) meaʻai e tatau ona fetaui le laiti ina ia ofi i lalo o lou nofoa. O nisi o le aofia ua matauina le tausasami ma taumamafa a o faagasolo le polokalame. O le faia faapea o se faiga e lē faaaloalo. I nofoaga e latalata ane i ai ni faleoloa, ua matauina ai nisi o uso o fai ai ni faatau a o faagasolo le polokalame. O ia faiga e lē talafeagai.

¹⁸ E tatou te talisapaia moni la tatou faigaai faaleagaga ma le faafouina, le siomaga toafilemu o le mafutaga a o faia malologa pupuu i aoauli. Ina ia ogatusa ma le fuafuaga o lenei sauniuniga, nai lo le tuua o le maota i le aoauli ina ia faatau mai meaʻai, faamolemole sau ma aumai sina meaʻai. O le faia faapea, o le a sili atu ai ona tele le taimi o le a e olioli ai i le mafutaga ma ou uso ma tuafāfine.

¹⁹ Maeu le fiafia ua ia i tatou ona ua toeitiiti ona amataina lea o Tauaofiaga Itumalo o le “Faatuatua i le Afioga a le Atua!” E tatou te mananao uma lava e faamautinoa o a tatou tapenapenaga o loo faia ina ia auai i le polokalame atoa, ma ia mafai ai ona tatou olioli atoatoa i le faigaai faaleagaga a Ieova lea ua saunia mo i tatou e ala i lana faalapotopotoga. I lena auala o le a avea ai i tatou ma ni ē e “saunia lava . . . i galuega lelei uma lava” i aso o i luma.—2 Timo. 3:17.

[Pusa i le itulau 6]

Mea e Faamanatu mo le Tauaofiaga Itumalo

Papatisoga: O sui papatiso e ao ona alala i o latou nofoa i le vaega ua faatulagaina a o lei amataina le polokalame i le taeao o le Aso Toonai. O se ofu onomea ma se solo e ao ona aumaia e le tagata o loo fuafua e papatiso. I le taimi ua teʻa sa laeiina ai e nisi ofu e lē talafeagai ma taufaatauvaaina ai lea sauniga. O toeaina o loo autaluina ma le tagata papatiso fesili i le tamaʻi tusi o Aʻoaʻoga Faavae e ao ona faamautinoaina ua malamalama tagata taitoatasi i manatu uma nei. Pe a maeʻa le lauga o le papatisoga ma le tatalo e faia e le failauga, ona valaaulia lea e le taitaifono le usuina o se pese. Pe a maeʻa le fuaiupu mulimuli o le pese, o le a faasino atu e le au tautua le au papatiso i le nofoaga e faia ai le papatisoga. O le papatisoga e faailoa ai le tuuina atu o se tasi, o se mataupu totino a le tagata lava ia i lo la va ma Ieova. O lea la, e lē talafeagai mo ni sui papatiso ona fusi e le tasi le isi pe uulima a o papatisoina.

Pine Fatafata: Faamolemole ia laeiina le pine fatafata o le 1997 i taimi uma o le tauaofiaga a o faimalaga atu ma pe a toe foi mai i le nofoaga o le tauaofiaga. E masani ona maua ai ni avanoa mo i tatou e faia ai se molimau lelei. O pine ma faavaa e tatau ona maua mai i la outou faapotopotoga auā o le a lē maua i le tauaofiaga. Aua e te faatali seʻi toe o ni nai aso oo i le tauaofiaga ona e faatoʻā fesili lea mo ni pine fatafata mo oe ma lou aiga. Ia manatua e ave lau pepa fou o le toto (Advance Medical Directive/Release).

Āpi: O le toatele o i latou e auai i tauaofiaga i atunuu o loo vaaia e le tatou lālā e mafai ona nonofo i aiga po o le faia lava foi o a latou lava fuafuaga mo ni āpi. Ae peitai, pe afai e te manaomia se āpi, tusi se tusi e faamatala ai mea o loo manaomia ma tuuina atu i le failautusi o la outou faapotopotoga e lafo i le matagaluega o āpi o le tauaofiaga.

Taavale Toso Pepe ma Nofoa e Mafai Ona Faamoe: I le tele o nofoaga, e lē faaaogaina ai taavale toso pepe i nofoaga o faatasiga i le lautele. E lē faatagaina e aiaiga o tulaga tau tinei mu le iai o nei mea i faapaologa o fale po o va o laina nofoa. Talu ai o le tumutumu o tagata e ono feomai ai, e mautinoa la le matautia o taavale toso pepe e lē gata i le pepe, ae faapena foi i se isi e ono lāvea ai. O lea, faamolemole aua neʻi aumaia taavale toso pepe i le nofoaga o le tauaofiaga. E faatagaina nofoa mo tamaiti e faaaogā i totonu o taavale, auā e mafai ona ofi i tala ane o nofoa o o latou mātua. Faamolemole aua neʻi aumaia ni nofoa e mafai ona faamoe. E lamatia ai ma e lē faatagaina i nofoaga faitele. E tāua ma e talisapaia la outou lagolagosua.

Auaunaga Tauofo: Pe e mafai ona e faataatia ese se taimi o le tauaofiaga e te fesoasoani ai i se tasi o matagaluega? O le auauna i o tatou uso, e tusa lava pe na o ni nai itula, o le a matuā aogā ma aumaia ai le matuā faamalieina totino. Pe afai e mafai ona e fesoasoani, faamolemole ia lipoti atu i le Matagaluega o Auaunaga Tauofo a le tauaofiaga. O fanau e i lalo ifo o le 16 tausaga le matutua e mafai foi ona faia se fesoasoani aogā e ala i le galulue i lalo o le taitaiga a se matua po o isi tagata matutua e maufaatuatuaina.

Lapataiga: Ia mataalia i faafitauli e ono tutupu mai ina ia alofia ai faafitauli lē manaomia. E masani lava o tagata gāoi ma isi tagata lē popoi e osofaia tagata e fou atu i se vaipanoa. Ia mautinoa ua loka lau taavale i taimi uma, ma aua neʻi tuua se mea e iloagofie atu ma faaosoosoina ai se tasi e osofaia. O le au gāoi ma le au seʻi ato e latou te tulimataia lava ia faatasitasiga tetele. E lē o se mea poto le tuua o ni mea tāua i lou nofoa. E lē mafai ona e mautinoaina o tagata uma i ou autafa o ni Kerisiano. Aisea o le a e ofoina atu ai se tofotofoga? Ua maua mai ni lipoti o taumafaiga a tagata o le lalolagi e maileia ai tamaiti. IA E ILOA LE MEA O IAI LAU FANAU I TAIMI UMA.

O televise ma fale vitiō o loo iai i le tele o faletalimalo e masani ona faaali ai ata matagā o aumaia ai faamatalaga masoā ma faiga lē mamā faaleituaiga. Ia mataala i lenei mailei, ia aua neʻi faatagaina le fanau e matamata i ia televise i le potu e aunoa ma le puleaina.

Faamolemole ia aua neʻi telefoni pe tusi atu i le pulega o le tauaofiaga o vaaia le fale fono e saili mai ai ni faamatalaga e uiga i so o se mataupu mo le tauaofiaga. Afai e lē maua ni faamatalaga manaomia mai toeaina, e mafai ona e tusi atu i le tuatusi o se tauaofiaga maʻoti, lea e maua mai le failautusi o le faapotopotoga.