O Toe Asiga Taulau Manuia e Manaomia ai Aʻoaʻoga Uigā
1 O toe asiga o se vaega tāua ma olioli ai o la tatou faiva i le fanua. Aisea e ao ai ona tatou tinoū e foi e asia tagata loto fiafia? Ua faalauiloa ma faamamaluina le suafa o Ieova i lenei galuega o le faia o soo, ma ua fesoasoani ai i ē matataʻu i le Atua ina ia saili i le ala i le ola. (2 Kori. 2:17–3:3) I le iloa o loo aafia ai le faapaiaina o le suafa o Ieova, faapea ma ola o isi, e tatau ona uunaia ai i tatou ia sauniuni lelei a o lei toe foi atu.
2 O se faiaʻoga lelei, e fesoasoani i le tagata aʻoga e atinaʻe lona iloa e faavae i mea ua uma ona faataatia. E pei ona atinaʻe e se faiaʻoga o se aʻoga le poto i luga o le poto lea ua maua e tamaiti aʻoga mai lea aso i lea aso, e tatau ona fai ma a tatou masani le tuliloa o a tatou uluai asiasiga i le talanoaina atili o lena lava mataupu. O lenei mea e iu ina solosolo lelei ai le faaauauina o manatu ma mafaufauga e atinaʻe ai.
3 Pe a e toe foi atu ina ua uma ona tuu le polosiua “Po o Silasila Alofa mai ea le Atua ia i Tatou?” atonu o le a e iloa le aogā o lou faapea atu:
◼ “I laʻu asiasiga talu ai, na ta talanoa ai e uiga i ‘aso e gata ai’ lea o loo taʻua i le Tusi Paia ma le uiga o lena mea mo i tatou. Atonu o loo e tau mānatu pe e faapefea ona tatou iloa ua tatou ola i aso e gata ai. (2 Timo. 3:1) Sa naunau soo o Iesu i le fia maua o se tali i lena fesili. [Faitau le Mataio 24:3.] I lana tali, na faamatala ai e Iesu tulaga o mea ia o loo tatou vaaia o loo siomia ai i tatou i aso nei. E aofia ai i nei mea mafatiaga ma faiga sauā e lei faapea ona vaaia muamua.” Ia faamatilatila i ai le vala o le faailoga lea o loo talanoaina i le palakalafa e 3 ma le 4 i le itulau e 19. Afai e tali lelei mai, ia faamatilatila i ai isi vala o le faailoga i le palakalafa e 5 e oo i le 8 i le itulau e 20. Fai i ai e te toe foi atu e tali fesili na e lāgā i le itulau i luma o le polosiua.
4 I le tuliloaina o tagata na fiafia i le polosiua “‘Faauta! Ou te Faia ia Fou Mea Uma Lava’” e te ono faapea atu:
◼ “Ua ou naunau lava e toe faaauau la ta talanoaga e uiga i le fuafuaga o le olaga mo i tatou. Ou te manatu, ta te ioe faatasi na fuafuaina e le Atua mo i tatou ina ia ola i lenei lalolagi i tulaga fiafia ma le filemu nai lo o le ola i tulaga fesouaiina ia ua oo ia i tatou i aso nei. Pe e te manatu o le a ia faataunuuina lana folafolaga?” Faatali mo se tali. Faitau le Isaia 55:11, ona talanoa lea i manatu o loo i le palakalafa e 52 ma le 53 i le itulau e 27. Ia fautua atu e faapea, o le faia o se suesuega totino o le Tusi Paia o se auala sili lea ona lelei e maua ai se fuafuaga e sili ona aogā o le olaga.
5 I le tuliloaina o le fiafia na muaʻi faaalia i le polosiua “Olioli i Le Ola i Le Lalolagi e Faavavau!” e mafai ona e toe faaali i ai ma faapea atu:
◼ “Na ta talanoa e uiga i le lalolagi matagofie lea o loo faaatagia i le faavaa o lenei polosiua. Ou te fia taʻu atu ia te oe le pogai e tāua tele ai i tagata o ē fia ola ai i inā le faatuatua ia Iesu Keriso.” Suʻe i le ata e 41, ma faitau le Isaia 9:6. Faasino i le ata e 62, ma faitau le Ioane 3:16, ma faamamafa le manaomia ona usiusitai. Faamatala i ai, o loo fesoasoani Molimau a Ieova i tagata e aʻoaʻo le auala e faatino ai le faatuatua e ala i le suesueina o le Tusi Paia ma taumafai e ola e tusa ai ma ana fautuaga.
6 Pe a uma toe asiga taitasi, ia iloilo ma le manatu e faaleleia lou uigā. Fesili ifo ia te oe lava: Pe sa iai se manatu maʻoti na ou mafaufau i ai e fai atu? Pe sa ou tausisi e taulai atu manatu i le Tusi Paia? Pe na ou fau aʻe ai i luga o le faavae lea na ou faataatia i le uluai asiasiga? Pe na fuafuaina laʻu taulimaga e tataʻi atu ai i se suesuega faale-Tusi Paia? O tali mautinoa e faamautinoa ai o loo e tauivi ina ia avea oe ma faiaʻoga lelei o le Afioga a le Atua.