O Tusi Paia Uma Lava e Aogā e Aʻoaʻo Ai
1 E tele manatu eseese e uiga i le tāua o le Tusi Paia. Ae peitai, ua tatou mautinoa e faapea, i le Tusi Paia, o loo maua ai tali i faafitauli faigata o tagata faapea ma taʻiala maufaatuatuaina mo o tatou lava olaga totino. (Faata. 3:5, 6) O le atamai o fautuaga o loo iai, e lē mafaatusatusaina. O tulaga tau amio o loo lagolagoina ai, e silisili. O le feau o loo iai e malosi, ‘e mafai ona faamasino i manatu ma filifiliga o le loto.’ (Epe. 4:12) E mafai faapefea ona tatou fesoasoani i isi ia iloa le manaoga o le aumai lea o lenei tusi mai le fatatusi ma matuā suesueina ma le faaeteete? Atonu e te manao e faataʻitaʻi nisi o fautuaga nei pe a ofoina le tusi, Autasia i le Tapuaiga i le Atua Moni e Toatasi ia Novema.
2 Talu ai o loo popole le toatele e uiga i le faafetaiaia o o latou manaoga autū, atonu la o le a uaʻi mai ai o latou manatu i lenei faafeiloaiga:
◼ “O le toatele o tagata ua ou talanoa i ai i aso nei, o loo popole e uiga i le faafetaiaia o o latou olaga faaleaiga. E toatele ua maileia i le tuliloaina o mea faitino, ma ua iu ai i mafatiaga. O fea la se mea e sili ona lelei e liliu atu i ai mo se fautuaga e faatatau i na mataupu? [Faatali mo se tali.] Ua ou iloa o loo ofoina mai e le Tusi Paia se fautuaga aogā e mafai ona fesoasoani ia i tatou e alofia ai faafitauli e lē manaomia ona oo mai. Seʻi ou faaali atu ia te oe se faaaoaoga.” Suʻe i le itulau e 142 o le tusi, Autasia i le Tapuaiga Moni ma faitau le Efeso 5:25-27 lea o loo taʻua i le palakalafa e 9. Faaopoopo atili i le palakalafa e 10, ma ofo loa le tusi.
3 O se isi lenei fautuaga e mafai ona e manatunatu i ai:
◼ “O taimi uma lava tatou te faitau ai i le nusipepa pe faalogologo i tala fou, tatou te faalogo ai e uiga i se isi faafitauli faigata e oo ai ia i tatou le popole. [Taʻu ni mea matautia na tutupu na lipotia mai talu ai nei i tala fou.] E mafai faapefea ona tatou faafesagaia ni faafitauli faapenei? [Faatali mo se tali.] I tuā i le 1983, na faapea mai ai le peresitene o le Iunaite Setete o Amerika i lena vaitaimi, [o Ronald Reagan] ua i le Tusi Paia se feau silisili ua faapea ona tusia, ma ‘i totonu o le Tusi Paia, o loo iai tali uma mo faafitauli uma ua faapea ona oo i le tagata.’ O lana faamatalaga, ua faamanatu mai ai le mea o fai mai ai le Tusi Paia lava ia. [Faitau le 2 Timoteo 3:16, 17.] Seʻi ou faailoa atu ia te oe le pogai e mafai ai ona tatou faatuatuaina le Tusi Paia.” Ia faasino i ai ni manatu o faamatilatila mai i le sāvali, Le Pogai e Mafai ai ona E Faatuatua i le Tusi Paia. Fai i ai o le a e toe foi mai i se aso e talanoa atili i le mataina o le faataunuuina o valoaga o le Tusi Paia i mea o loo tutupu i le lalolagi i le taimi nei.
4 Ua faamautinoaina e lo tatou Faiaʻoga Silisili e faapea, o le poto e uiga i lona finagalo, e mafai ona maua e i latou uma o ē mananao e aʻoaʻoina. O le fesoasoani i isi ia talisapaia le tāua moni o le Tusi Paia, o se tasi lea o mea aupito sili ona lelei e mafai ona tatou faia e fesoasoani ai ia i latou; e mafai ona faasaoina ai o latou ola.—Faata. 1:32, 33.