Fesoasoani i Isi Ina ia Latou Maua Aogā Mai le Faaaoaoga a Iesu
1 Pe tusa o le ʻafa o le faitau aofai o le lalolagi a lē o le faapea mai e Kerisiano pe faapea mai e Musalimi. O nei tagata uma ua faapea mai e talitonu ia Iesu Keriso. Peitai, e toatele e itiiti so latou iloa e uiga ia te ia ma lana matafaioi tāua i fuafuaga a le Atua. E tāua tele lena poto, e pei ona faaalia e Iesu lava ia i le Ioane 17:3. O iina ua ia fetalai ai faapea, o le ola e faavavau e faalagolago i le ‘mauaina o le poto e uiga i le Atua moni e toatasi ma lē na ia auina mai, o Iesu Keriso lea.’ E oo lava i aso nei, e maua aogā e so o se tasi o lē na te aʻoaʻoina le faaaoaoga matagofie a Iesu ma faataitaia i o latou olaga.
2 Na poloaia e Iesu ona soo ina ia ‘avea ma molimau ia te ia . . . i tuluʻiga o le lalolagi.’ (Galu. 1:8) Ua ia i tatou i aso nei le faaeaga o le tauaveina atu o lena lava galuega. A o faagasolo Tesema, e mafai ona tatou faia lena galuega e ala i le ofoina atu o le tusi Le Tagata Silisili o Ē Uma na Soifua Mai. I a tatou talanoaga, e mafai ona tatou faaaogā le Tusi Paia e faamanino ai manatu sese o le toatele o tagata e uiga ia Iesu, ma fesoasoani ai foi ia i latou ina ia iloa le ituaiga o faaaoaoga sa ia faataatia mo i tatou o ni Kerisiano.
3 Pe a uma ona faailoa atu oe, atonu o le a e faaupu atu i au lava upu faamatalaga nei o loo mulimuli mai:
◼ “E toatele o loo tau mānatu pe sa faapeī Iesu a o soifua o ia o se tagata i luga o lenei lalolagi. O ā ni itu e te manatu sa ese ai o ia mai isi? [Faataga e tali mai.] O lenei tusi matagofie, Le Tagata Silisili o Ē Uma na Soifua Mai, o loo faamatala mai ai mea mataina sa tutupu i lona soifuaga ma lana faiva, ma ua aumaia ai se malamalamaga i le ituaiga o tagata sa iai o ia. Ina ua maeʻa ona faitauina, o nisi ua latou lagona e peiseai sa latou maua moni lava se avanoa e faatasi totino atu ai ia te ia, faalogoina totino ona mafatiaga, ma muai molimauina lana faiva.” Faasino atu i le uluai ata o le tusi, lena o loo faamatilatila mai ai le ulutala. Ona suʻe lea i le faatomuaga, ma faitau le palakalafa lona lua i lalo ifo o le tamai ulutala “Aogā o le Aʻoaʻoina e Uiga i a te Ia.” Pe a iai se tali lelei mai, ia ofo le tusi, ma taʻua le fuafuaga o meaalofa tauofo.
4 Afai o loo e toe foi atu e asia se tagata na ia talia le tusi, e mafai ona e faapea atu:
◼ “I le ta talanoaga talu ai, sa ta talanoa ai i le pe sa faapeī Iesu Keriso a o avea o ia o se tagata. Sa ou fiafia e tuu ia te oe le tusi o Le Tagata Silisili o Ē Uma na Soifua Mai. O le ā se mea ua sili ona faagaeetia ai oe e faatatau i aʻoaʻoga a Iesu ma ona uiga totino foi?” Faataga e tali mai. Suʻe i le mataupu e 113, ona talanoa lea o le faaaoaoga silisili a Iesu i le lotomaulalo. Faitau le Filipi 2:8 e faaalia ai pe sa faapeī le manatu o le aposetolo o Paulo e faatatau i uiga lotomaulalo o Iesu. E mafai loa ona e faamatala pe faapefea ona aʻoaʻoina atili nisi mea e ala i se suesuega faifai pea o le Tusi Paia.
5 I se oganuu o loo faamanatu ai e tagata aso mālōlō faalotu i lenei taimi o le tausaga, e mafai ona e faapea atu:
◼ “O le vaitaimi lenei e mafaufau ai lava tagata ia Iesu. Peitai, ona o le tele o mea leaga o loo tutupu i vaipanoa uma o le lalolagi, ua tau mānatu ai nisi po o manatu moni mai lava Iesu ia i tatou. O le ā sou lagona i ai?” Faataga e tali mai. Suʻe i le mataupu e 24 o le tusi o le Tagata Silisili, ma talanoa puupuu i le mafuaaga na afio mai ai Iesu i le lalolagi. Ona faitau lea o le Ioane 15:13, ma faamamafa le alofa loloto o Iesu mo isi. Ia manatua e ave ni mekasini fou, se polosiua, po o se sāvali talafeagai e ofo pe a lē talia le tusi.
6 Pe a toe sosooina lena talanoaga, e mafai ona e faapea atu:
◼ “Sa ta talanoa e uiga i mea na faia e Iesu a o iai i le lalolagi, lea e faaalia ai lona manatu moni mai ia i tatou. O le ā sou finagalo i se mea o le a iu ina faia e ia e aumaia ai se mapusaga ia i latou o ē ua matuā mafatia?” Faataga e tali mai. Suʻe i le mataupu e 133, ma toe autalu manatu o loo i le palakalafa lona lima. Suʻe i le ata o loo i le itulau e sosoo ai, ma faamatala pe faapeī le tulaga o mea o le a iai pe a oo ina faia le finagalo o le Atua i le lalolagi e pei ona faia i le lagi. Faasino atu i ai aogā e maua pe a aʻoaʻoina atili isi mea.
7 O le taulimaga o loo sosoo mai atonu e naunau fiafia i ai talavou po o mātua:
◼ “O le toatele o talavou o loo saili ni ē e ono faataitai atu i ai, peitai ua faigata lava ona maua ni tagata lelei. Sa faataatia e Iesu Keriso le faaaoaoga e lelei atoatoa mo tagata uma. [Faitau le 1 Peteru 2:21.] Sa faaautū atu lona soifuaga atoa i le tapuaiga i lona Tamā faalelagi. O le ā sou lagona e faapeī le tulaga o mea pe ana fai e toatele atu tagata sa taumafai e faataitai ia te ia?” Faataga e tali mai. Faasino atu i le palakalafa lona tolu i le itulau o loo sosoo ma le itulau mulimuli o le tusi, lena o loo faamatala mai ai ona uiga faapitoa. Faamalamalama le auala e mafai ai e le tusi o le Tagata Silisili ona fesoasoani ia i tatou uma ina ia avea o ni Kerisiano e sili atu ona lelei.
8 Pe a toe foi e asi, e mafai ona e faapea atu:
◼ “I laʻu asiasiga talu ai, sa ta talanoa i le itu ua avea ai Iesu Keriso ma faaaoaoga silisili e mafai e so o se tasi ona faataitai i ai. Ou te fia taʻuina atu ia te oe se lesona tāua tele sa ou iloa e ala i le suesueina o le faaaoaoga lea na faataatia e Iesu. [Suʻe i le mataupu e 40 o le tusi o le Tagata Silisili, ma tataʻi atu manatu i le lesona agalelei a Iesu e uiga i le alofa mutimutivale.] O lenei lesona sa matuā toe faamanatu mai ai ia te au le tele o loʻu manaomia ona faaalia lenei uiga i isi.” Faitau le Mataio 5:7. Taʻu i ai e te toe foi atu ma talanoa i isi lesona na e mafai ona aʻoaʻoina mai le faaaoaoga a Iesu.
9 Ia tatalo e faamanuia atu Ieova i au taumafaiga ina ia tataʻi atu manatu o tagata ia Iesu Keriso, o ia o le faaaoaoga e mafai e tagata uma ona maua mai ai aogā pe a faataitai i ai.