Teu Lelei

Taulimaga ua Fautuaina mo le Auaunaga i le Fanua

Le Auala e Faaaogāina ai Lenei Faaopoopoga

O le tele o taulimaga o loo mulimuli mai na maua i lomiga ua mavae o La Tatou Faiva o le Malo. Ia faataʻitaʻi le tele e te manaʻo ai i lau galuega o le molimau atu, ma vaai po o ā iʻuga e te maua mai ai. Ia teu lelei lenei faaopoopoga, ma toe suʻe i ai pe a sauniuni mo le faiva.

E te ono faaosoina le fiafia o se tagata i le Afioga a le Atua pe afai e faga saʻo le malama. Lāgā se fesili patino, ona faitau loa lea i ai o se tali puupuu faale-Tusi Paia. E mafai ona e faataʻitaʻia fautuaga nei:

“A o e tau mafaufau i le lumanaʻi, pe e iā te oe ni lagona o le iai o se faamoemoe po o le masalosalo? [Tuu se avanoa mo se tali.] Ua valoia mai e le Tusi Paia mea e tutupu e faapopoleina ai, ia ua tatou vaaia i aso nei faatasi ai ma o latou taunuuga.”—2 Timo. 3:1, 2, 5; Faata. 2:21, 22.

“Ua iai le tele o popolega i aso nei e faatatau i le tausiga o le soifua mālōlōina. Pe na e silafia ua folafola mai e le Atua le foʻiaina e faavavau o faafitauli uma tau i le soifua mālōlōina?”—Isa. 33:24; Faaa. 21:3, 4.

“Pe e te silafia ua valoia mai e le Tusi Paia o le a iai se taimi o le a na o le tasi le malo e puleaina le lalolagi atoa?”—Tani. 2:44; Mata. 6:9, 10.

“E te manatu na semanū e faapeī tulaga o mea e iai pe ana faapea o loo pulea e Iesu Keriso le lalolagi?”—Sala. 72:7, 8.

“E toʻatele tagata ua pagatia i faiga faailogatagata ona o le ituaiga e iai, le lotu, po o le lanu. O le a sou manatu e tusa ai ma le finagalo o le Atua e uiga i nei faiga lē tonu?”—Galu. 10:34, 35.

“O loo tatou iloa na faia e Iesu Keriso le tele o vavega i ona aso. Pe ana faapea e mafai ona e talosaga iā te ia ina ia toe faia se isi vavega, faamata o le ā lenā vavega?”—Sala. 72:12-14, 16.

“O le toʻatele o tagata ua fiu i le faalogo i faafitauli. Ua latou mananaʻo e fia faalogo i ni vaifofō. Ae o fea e mafai ona tatou maua mai ai ni vaifofō moni mo o tatou faafitauli?”—2 Timo. 3:16, 17.

“Pe e te silafia o le ā le Malo lea o loo e tatalo i ai i le tatalo a le Alii (po o, Lo Matou Tamā e)?”—Faaa. 11:15.

Amataga o Talanoaga

O le lisi o fesili o loo i lalo, ua tuufaatasia mai mataupu o le tusi Reasoning, o loo faailoa mai ai ma le numera o le itulau o le tusi e maua ai tali taʻitasi:

Aiseā ua tatou ola matutua ai ma feoti? (98)

O le ā le tulaga o tagata ua maliliu? (100)

Pe e iai ni māfuaaga talafeagai e ao ona talitonu ai i le Atua? (145)

Po o manatu mamafa moni mai le Atua i mea o loo tutupu iā i tatou? (147)

Po o le Atua o se peresona moni? (147)

Pe e ō uma tagata lelei i le lagi? (162)

Pe e tatau i se tagata ona alu i le lagi ina ia maua ai se lumanaʻi e fiafia moni? (163)

Aiseā e tāua ai le iloaina ma le faaaogāina o le suafa totino o le Atua? (196)

Po o Iesu Keriso o le Atua lava lea? (212)

O le ā o le a faataunuuina e le Malo o le Atua? (227)

O le ā le fuafuaga o le olaga o le tagata? (243)

O le ā e mafai ona fesoasoani ina ia faaleleia ai se faaipoipoga? (253)

Pe e taliaina e le Atua lotu uma? (322)

E mafai faapefea e se tasi ona ia iloaina le lotu saʻo? (328)

E faapeʻī le malolosi o taaʻiga a Satani o loo iai i le lalolagi i aso nei? (364)

Aiseā ua faataga ai e le Atua puapuaga? (393)

Aiseā ua tele ai le amioleaga? (427)

O ai o loo puleaina lenei lalolagi—o le Atua po o Satani? (436)

Fautuaga mo le Ofoina o le Polosiua o le Manaomia

“E mautinoa lava e te ioe, o le toʻatele o tagata e talitonu i le Atua. O i latou uma lava e talitonu iā te ia, e ioe e iai se mea o loo manaʻomia e le Atua mai iā i tatou. O le mea e lē mafai ona ioe faatasi i ai tagata o le, O le ā e manaʻomia e le Atua mai iā i tatou?” Ona faaali lea o le polosiua o le Manaomia ma suʻe i le lesona 1, ma talanoa i ai.

“I le matuā tele o faafitauli i le olaga faaleaiga i aso nei, po o e tau mānatu ea po o le ā se ala e maua ai le fiafia i le aiga?” Pe a uma ona fai mai se tali, ona faamatala lea i ai e faapea, i le Tusi Paia, o loo faailoa mai ai e le Atua le ala moni e maua ai le fiafia i le aiga. Faitau le Isaia 48:17. Ona suʻe lea i le lesona e 8 i le polosiua o le Manaomia, ma faasino i ai nisi o mau sii o le Tusi Paia o loo aumaia ai taʻiala maufaatuatuaina mo tagata taʻitoʻatasi o le aiga. Faitau le lisi o fesili i le amataga o le lesona. Ona fesili atu lea i le tagata pe na te fia faitauina mai ia tali.

“O lenei polosiua ua tāaofaʻi ai lesona mo le faia o ni suʻesuʻega e aofia ai aʻoaʻoga faavae o le Tusi Paia. I itulau taʻitasi, o le a e maua ai tali i fesili ua tele senituri o fesouaʻiina ai mafaufau o tagata. Mo se faaaʻoaʻoga, O le ā le fuafuaga a le Atua mo le lalolagi?” Suʻe i le lesona e 5, ma faitau fesili i le amataga o le lesona. Fesili i lē e ona le fale po o lē fea fesili e sili ona fiafia i ai, ona faitau lea o le palakalafa e talafeagai ma le fesili, ma suʻe mau e talafeagai. Ona faamatala lea i ai e faapea, o tali faamalieloto i isi fesili, e faigofie lava ona maua e pei foʻi o lenei fesili. Fai i ai o le a e toe foʻi mai e talanoaina se isi fesili.

“O le ā sou manatu i le māfuaaga ua tele naʻuā ai faiga sauā i aʻoga lautele? Pe ona o le leai ea o se toleniga faamātua? Pe ona o se isi mea, e pei o taaʻiga a le Tiapolo?” Tuu le avanoa mo se tali. Afai e faapea mai le tagata, e māfua ona o taaʻiga a le Tiapolo, ona faitau lea o le Faaaliga 12:9, 12. Faamatilatila le vaega o loo faia e le Tiapolo i le faatupuina o le matuā tele o le fenuminumiaʻi i le lalolagi. Ona suʻe lea o le polosiua o le Manaomia i le lesona e 4, ma fesili i le tagata po o tau mānatu o fea na sau ai le Tiapolo. Agaʻi loa e faitau ma talanoa ia uluaʻi palakalafa e lua. Afai e faapea mai le tagata ‘ona o le leai o se toleniga faamātua’ o le pogai lea o le tele o faiga sauā i aʻoga, ona faitau lea o le 2 Timoteo 3:1-3 ma faasino i ai uiga ia e mautinoa ua saosaolaumea i lenei faafitauli. Ona suʻe lea o le polosiua o le Manaomia i le lesona e 8, ma faitau le palakalafa e  5, ma faaauau ai le talanoaga.

“Pe e te manatu ua talafeagai ona tatou faatalitalia o le a aumaia e Lē na Foafoaina Mea iā i tatou le poto lea tatou te manaʻomia ina ia ati aʻe ai se olaga faaleaiga e taulau manuia?” A uma ona tali mai, ona faaali lea i ai o le polosiua o le Manaomia. Ona suʻe lea i le lesona e 8, ma faamatala i ai e faapea, o loo iai mataupu silisili mai le Tusi Paia mo tagata uma lava o le aiga. Fai i ai pe mafai ona faataʻitaʻi le faaaogāina o le polosiua faatasi ma le Tusi Paia ina ia maua ai aogā silisili.

“I faafitauli uma ia o loo tatou fesagaʻia i le olaga i aso nei, pe e te lagona e mafai ona avea le tatalo ma fesoasoani moni mo i tatou? [Tuu le avanoa mo se tali.] E toʻatele ua faapea mai o le tatalo ua latou maua ai le malosi. [Faitau le Filipi 4:6, 7] Ae ui i lea, atonu e lagona e se tasi e faapea e lē o talia mai ana tatalo. [Suʻe le polosiua o le Manaomia i le lesona e 7.] Ua faaalia i lenei polosiua le auala ua mafai ai ona sili atu ona aogā le tatalo iā i tatou.”

“O loo matou talanoa atu i o matou tuaoi e uiga i le pogai ua tele ai lotu eseese i le lalolagi, ae e na o le tasi lava le Tusi Paia. O le ā sou manatu i le pogai ua fenuminumiaʻi ai lotu? [Tuu le avanoa mo se tali. Suʻe le polosiua o le Manaomia i le lesona e 13, ma faitau fesili amata.] O le a e maua tali faamalieloto i lou faitauina o lenei lesona.”

Pe a uma ona tuu atu i se tagata ia mekasini o Le Olomatamata ma le Ala Mai!, ona fesili lea i ai pe mafai ona e faitauina atu se palakalafa puupuu se tasi. Afai e faataga ona faia faapea, ona suʻe lea o le polosiua o le Manaomia i le lesona e 5. Faasino i ai fesili na e i le amataga o le lesona, ma fai i ai e faafofoga mai mo le tali o le fesili muamua a o e faitauina atu le palakalafa muamua. Pe a uma ona faitau le palakalafa, ona fai atu lea o le fesili, ma tuu atu i ai e tali mai ia. Ofo i ai le polosiua, ma afai e talia, fai se fuafuaga e te toe foʻi atu po o le ā lana tali i isi fesili e lua ia e sosoo mai i le lisi o fesili.

Fautuaga mo le Ofoina o le Tusi o Le Poto

A o e uuina le Tusi Paia, ia amata i le faapea atu: “I le asō o loo matou talanoa ai ma tagata uma i lou vaipanoa i se mau. Ua faapea mai . . .” Faitau le Ioane 17:3, ona fesili lea i ai: “Na e mātauina le mea ua folafola mai pe afai tatou te maua le poto saʻo? [Tuu le avanoa mo se tali.] O fea o le a maua ai e se tagata lenā poto?” Pe a uma ona tali mai, ona faailoa atu lea o le tusi o Le Poto ma faapea atu: “O loo faasino atu lenei tusi i le poto lea e taʻitaʻiina atu ai i le ola e faavavau. Ua faia faapea e ala i le taliina o fesili o loo tele ina fesili ai tagata e faatatau i le Tusi Paia.” Faaali atu le itulau o loo iai ulutala, ma fesili i le tagata pe sa ia tau mānatu e faatatau i se tasi o na mataupu.

“Pe sa e tau mānatu po o manatu mamafa mai le Atua i faiga lē tonu ma puapuaga ia o loo tatou vaaia pe o loo tatou aafia totino ai foʻi? [Tuu le avanoa mo se tali.] Ua faamautinoa mai e le Tusi Paia e alofa le Atua iā i tatou ma o le a ia fesoasoani mai iā i tatou i taimi o faigatā.” Faitau ni vaega o le Salamo 72:12-17. Suʻe le tusi o Le Poto i le mataupu e 8, ma faasino atu i ai se tali faamāfanafanaloto o loo aumaia ai i se fesili na tuufesili ai le faitau miliona, Aiseā ua faataga ai e le Atua puapuaga? Pe afai e mafai, talanoa nisi o manatu faale-Tusi Paia o loo aofia ai i le palakalafa e 3 e oo i le 5, po o le talanoa foʻi pe a e toe foʻi e asi.

“O le toʻatele o i tatou ua motusia ni mafutaga ma nisi e pele talu ai le oti. Pe sa e tau mānatu ea pe o le a tatou toe vaai iā i latou? [Tuu le avanoa mo se tali.] Na faamautinoa mai e Iesu faapea, e mafai e ē pele iā i tatou ona toe faasaoina mai i le oti. [Faitau le Ioane 11:11, 25, 44.] E ui lava na tupu lenei mea i le tele o senituri ua mavae, ae ua faataʻitaʻia ai le mea ua folafolaina mai e le Atua e faia mo i tatou.” Suʻe le tusi o Le Poto i le ata i le itulau e 85, ma faitau le faamatalaga o loo iai. Ona faaali atu lea o le ata i le itulau e 86 ma fai i ai se faaopoopoga. Faataatia se faavae lelei mo le asiasiga e sosoo ai e ala i le faapea atu: “Pe e te fia iloa le māfuaaga e ola matutua ai tagata ma feoti?” Toe foʻi e talanoa le mataupu e 6.

“Pe sa e tau mānatu pe aiseā ua moomoo ai tagata i se olaga e umi atu?” Pe a uma ona tali mai, ona suʻe lea o le tusi o Le Poto i le mataupu e 6, ma faitau le palakalafa e 3. Faamatala atu mau o loo siiina mai. Faasino atu i fesili e lua i le faaiʻuga o le palakalafa, ma fesili i le tagata pe na te fia iloa tali o fesili. Pe afai e fiafia i ai, ona talanoa lea o ni nai palakalafa e sosoo ai.

“O loo matou fesili i tagata pe latou te talitonu i le manatu lenei . . .” Faitau le Kenese 1:1, ona fesili lea: “Pe e te talitonu i lenā faamatalaga?” Pe afai e ioe mai le tagata, ona fai lea i ai: “E faapena foʻi aʻu. Peitaʻi, pe e te manatu afai na faia e le Atua mea uma, e ao foʻi la ona tuuaʻia o ia i amioga leaga?” Pe a māeʻa ona faailoa atu lou amanaʻiaina o le tali a le tagata, ona faitau lea o le Failauga 7:29. Suʻe le tusi o Le Poto i le mataupu e 8, ma faitau le palakalafa e 2. Pe afai e lē ioe o ia i le Kenese 1:1, faalaeiau i ai e suʻesuʻe i faamaoniga o loo soifua Lē na Foafoaina Mea.—Tagaʻi i le tusi Reasoning, itulau e 84-86.

“Pe e te ioe ona o le vave o suiga o amioga tatau i aso nei, ua tatou manaʻomia ai se taʻiala faatuatuaina mo le olaga? [Tuu le avanoa mo se tali.] E ui lava o se tusi ua sili ona leva, ae ua aumaia e le Tusi Paia ni fautuaga aogā mo le olaga i aso nei ma maua ai le fiafia i le aiga.” Ona suʻe lea i le mataupu e 2 i le tusi o Le Poto, ma faitau le palakalafa e 10 ma le fuaiupu muamua o le palakalafa e 11, e aofia ai le 2 Timoteo 3:16, 17.

“Pe e te fia iloaina mea o le a iai i le lumanaʻi mo i tatou ma le lalolagi? [Tuu le avanoa mo se tali.] Ua tāaofaʻi mai e le Tusi Paia le mea o le a iai i le lumanaʻi i se upu e tasi—Parataiso! O inā na tuu i ai e le Atua le uluaʻi ulugalii ina ua foafoaina i laʻua. Mātau le faamatalaga lenei i le tulaga atonu sa iai.” Suʻe le tusi o Le Poto i le itulau e 8, ma faitau le palakalafa e 9, i lalo o le tamaʻi ulutala, “Le Olaga i le Parataiso.” Ona talanoa lea o manatu i le palakalafa e 10, ma faitau le mau o loo sii mai, le Isaia 55:10, 11. Ia ofo atu e faaauau le talanoaga i le pe faapeʻī le olaga i le parataiso lea o le a toe faafoʻisia mai, e aofia ai palakalafa e 11-16.

Pe a toe asia i latou na e tuuina i ai mekasini o Le Olomatamata ma le Ala Mai!, e mafai ona e faapea atu:

“I le taimi mulimuli na ou asiasi mai ai, na ou fiafia e tuu iā te oe se kopi o le mekasini o Le Olomatamata. Atonu na e mātauina o le ulutala atoa o le mekasini, Le Olomatamata Faasilasilaina le Malo o Ieova. I le asō, ou te fiafia ai e faamatala iā te oe lenei Malo ma le mea e mafai ona uiga i ai mo oe ma lou aiga.” Ona suʻe lea o le polosiua o le Manaomia i le lesona e 6, ma faitau ma talanoa e tusa ai i le tele o le avanoa o le tagata.

“Na ou asia oe talu ai ma tuua ai ni kopi o mekasini o Le Olomatamata ma le Ala Mai! O nei mekasini ua atiina aʻe ai le faatāuaina o le Tusi Paia ma ona taʻiala tau amio. Ona ou te lagona e tāua tele ona malamalama tagata uma i le Afioga a le Atua, o lea ua ou toe foʻi mai ai e faailoa atu iā te oe se vala e mafai ai ona e faia faapea.” Faailoa atu le polosiua o le Manaomia po o le tusi o Le Poto, ma ofoina atu se suʻesuʻega faale-Tusi Paia.

Pe a faatomua atu so o se tusi tuai e 192 itulau, e mafai ona e faataʻitaʻia le taulimaga lenei:

“Ua matuā faamamafa lava le manaʻomia o le tulaga lelei o aʻoaʻoga. I sou lava manatu, o le ā le ituaiga o aʻoaʻoga e tatau i se tasi ona saʻilia e faamautinoaina ai le iai o le fiafiaga sili ma le taulau manuia i le olaga? [Tuu le avanoa mo se tali. Ona faitau loa lea o le Faataoto 9:10, 11.] O lenei tusi [taʻu le igoa o le tusi o loo e ofoina atu] e faavaeina mai i le Tusi Paia. O loo faasino atu i le puna e tasi o le poto, lea e mafai ona taʻitaʻiina atu ai i le ola e faavavau.” Faaali atu se faataʻitaʻiga patino i le tusi, ma faalaeiau le tagata ina ia faitauina.

Faafeiloaʻiga Tuusaʻo

Ina ia amataina se suʻesuʻega faale-Tusi Paia, taumafai e faaaogā se tasi o nei faafeiloaʻiga tuusaʻo:

“Pe e te silafia e mafai ona e mauaina le tali o se fesili tāua faale-Tusi Paia i na o ni nai minute lava? Mo se faaaʻoaʻoga, . . .” Ona faatū lea o se fesili o loo maua i le amataga o se tasi o lesona i le polosiua o le Manaomia e te manatu o le a fetaui ma le tagata.

“Ua ou afe mai e faailoa atu iā te oe la matou polokalame o suʻesuʻega faale-Tusi Paia e faia e aunoa ma se totogi. E pe ā ma le lima minute e faataʻitaʻi ai. E te avanoa mo sina lima minute?” Pe afai e ioe mai, faaaogā le lesona 1 i le polosiua o le Manaomia e faataʻitaʻi ai le suʻesuʻega, ma faitau na o le tasi pe lua ni mau ua filifilia. Pe a uma, ona fesili atu lea: “O afea e maua ai se isi 15 minute ina ia toe fai ai le isi lesona o loo sosoo mai ai?”

“O le toʻatele o tagata o loo iai Tusi Paia, ae latou te lē o iloa o loo iai tali i fesili tāua o loo iā i tatou e uiga i lo tatou lumanaʻi. O le faaaogāina o lenei fesoasoani mo suʻesuʻega [le polosiua o le Manaomia po o le tusi o Le Poto] mo se itula pe ā i le vaiaso, e mafai ai ona e maua se malamalamaga i mataupu autū o le Tusi Paia i le na o ni nai masina lava. Ou te fiafia e faailoa atu iā te oe le auala e faia ai lenei polokalame.”

“Ua ou asiasi mai e ofoina atu iā te oe se suʻesuʻega faale-Tusi Paia e leai se totogi. Afai e mafai, ou te fiafia e faataʻitaʻi le auala o loo talanoaina ai e nisi i aiga le Tusi Paia i ni atunuu e 200 mo ni nai minute. E mafai ona ta faaaogāina so o se tasi o nei mataupu e faavae ai le talanoaga. [Faaali le vaega o loo iai ulutala i le tusi o Le Poto.] O lē fea mataupu e te naunau totino i ai?” Faatali mo le tagata seʻi filifili. Suʻe i le mataupu lea ua filifilia, ma amata loa le suʻesuʻega i le palakalafa muamua.

“O loo oʻu faia ni lesona faale-Tusi Paia e aunoa ma se totogi ma o loo avanoa laʻu faasologa mo nisi tagata e fia suʻesuʻe. O le lomiga lea mo le suʻesuʻega faale-Tusi Paia o loo matou faaaogāina. [Faaali le tusi o Le Poto.] E na o ni nai masina lava e faia ai le suʻesuʻega ma maua ai tali mo fesili ia: Aiseā ua faataga ai e le Atua puapuaga? Aiseā ua tatou ola matutua ai ma feoti? O le ā ua tupu i ē pele iā i tatou ua maliliu? Ma e faapefea ona tatou faalatalata atu i le Atua? Pe mafai ona ou faataʻitaʻia se lesona?”

Pe afai ua e iloa se taulimaga uigā e faaoso ai le naunau, e sili atu la ona faaauau ona faaaogāina pea! E na ona fetuunaʻi lava e tusa ai ma le lomiga o loo ofo i lenei masina.