“E Tupu le Faatuatua i le Taulogologo”
1 Pe a tatou tau atu i se tasi e ‘naunau mo le ola e faavavau,’ ua tatau la ona taumafai e faamalosia le faatuatua o lena tagata i mea na ia faalogo i ai. (Galu. 13:48; Roma 10:17) E tusa ai ma lea itu, e tatau ona tatou tuliloa i latou na tuu ai mekasini e ala i le toe foi atu e avatu i ai lomiga fou ma talanoa atili ma i latou. Afai e faaalia le fiafia moni, e mafai ona ofoina tusiga. Ae peitai, ia manatua le sini, o le amataina lea o se suesuega i le tusi o Le Poto e Taʻitaʻia ai i le Ola e Faavavau. O ni nai fautuaga nei atonu e aogā:
2 Pe a e toe asia se tasi na lua talanoa i le mataupu “Vivii Atu i le Tupu o le Vavau!,” e mafai ona e amataina i le auala lenei:
◼ “I la ta talanoaga talu ai, sa ta talanoa ai i ni faamaoniga mataina e iloa ai e iai se Atua e ona le malosi uma lava. Ae peitai, e lē lava le na ona iloa e faapea o loo soifua o ia. E manaomia ona tatou iloa lona suafa. O le ā le suafa e te valaauina ai le Atua? [Faatali mo se tali.] E faitau miliona tagata e na ona latou taʻua o ia o le ‘Alii’ po o le ‘Atua,’ o ni taʻu e lē patino. E lē gata i lea, e finagalo o ia ia tatou iloa o ia i lona suafa. [Faitau le Salamo 83:18.] Ua taʻu mai e le Tusi Paia ia i tatou le tele o mea e uiga ia Ieova le Atua, e pei ona faamatalaina i lenei tusi.” Faaali le ata i le itulau e 29 o le tusi o Le Poto, ma faitau le faamatalaga mo le ata. Pe a maeʻa ona e talanoaina uluai palakalafa e tolu o le mataupu e 3, ua e amataina ai lava iina se suesuega!
3 Mo i latou o ē na tou talanoa i le mataupu o “Le Pogai o le a Faamuta ai Lotu a le Lalolagi,” atonu e te manao e tuliloa le naunau na faaalia i lou faapea atu:
◼ “Ina ua uma ona faitauina le mataupu, atonu na faafiafiaina oe i le mea moni e faapea, e lē mafai ona tutusa la tatou vaaiga i lotu uma, a ea? O loo iai le lotu moni ma lotu pepelo. Ua lāgā ai i lenei mea se fesili tāua e faapea, O le tapuaiga a ai e talia e le Atua? Na saunia e Iesu le tali, ma o loo faamatilatilaina mai i lenei tusi.” Suʻe i le mataupu e 5 o le tusi o Le Poto, ma faitau le palakalafa e 4, e aofia ai ma le Ioane 4:23, 24. Ona e fesili lea, “Pe e te loto malie e talia le faia o se suesuega faale-Tusi Paia i lou aiga e aunoa ma se totogi?” Afai e tali mai ioe, ona suʻe lea i le mataupu 1 ma amata loa le suesuega.
4 Afai na faaalia le fiafia i le “Ala Mai!” o Aperila–Iuni, pe a e toe foi atu la, e mafai ona e faapea atu e amata ai se suesuega i le tusi “Le Poto”:
◼ “Atonu e te manatua na ta talanoa e uiga i o tatou faamoemoega mo se taimi o i luma, o le a vaaia ai se parataiso i le lalolagi. E faigata ona e vaai faalemafaufau i ai po o le a faapeī moni lena lalolagi. O le manatu lenei o se tasi tagata tusiata e uiga i ai. [Faaali le ata i itulau e 188-189 i le tusi o Le Poto.] Pe e lē o se mea ea e fiafia ai ona o le a mafai ona olioli i nei siomaga? [Suʻe i le itulau e 4-5, faaali le ata, ma faitau le pusa.] O le matua o lenei tusi, e tai tutusa lava ma upu a Iesu na o loo maua i le Ioane 17:3. [Faitau.] Afai e mafai, ou te fia faasino atu ia te oe le auala e mafai ona faaaogā ai lenei tusi faatasi ma lau Tusi Paia ina ia maua ai le poto faasaoola.” Afai e malie i ai lē ona le fale, ona amata loa lea o le suesuega i le mataupu muamua.
5 Afai na e feiloai i se tagata na pisi i le taimi o lau uluai asiasiga, e mafai ona e faapea atu pe a e toe foi i ai:
◼ “Sa ou asiasi mai ia te oe talu ai, ma tuu ai kopi o mekasini o Le Olomatamata ma le Ala Mai! Ua atiina aʻe e nei mekasini le naunau i le Tusi Paia ma ana taʻiala tau amio. Ona ou te lagona o se mea matuā alagatatau mo tagata uma ona malamalama i le Afioga a le Atua, o lea ua ou toe foi mai ai e faaali atu se mea o le a fesoasoani ia te oe i le faia o lena mea.” Faaali le tusi o Le Poto, ma suʻe i le faasologa o mataupu i le itulau e 3. Fesili i ai po o lē fea mataupu e sili ona fiafia i ai, ona suʻe lea i ai, ma amata ai loa le suesuega.
6 O le a sili lo tatou olioli pe afai tatou te mafaia ona ‘tatala atu i nisi le avanoa i le faatuatua’ lea e taʻitaʻia atu ai i le ola e faavavau.—Galu. 14:27; Ioa. 17:3.