Faasalalauina o le Poto e Taʻitaʻia ai i le Ola e Faavavau
1 O Ieova “o lē aʻoaʻo i tagata ia popoto.” (Sala. 94:10) Ua ia faaaogaina i tatou e faasalalauina atu ai le poto faasaoola e uiga ia te ia, ia i latou o ē e lē o iloa le auala e auauna ai ma talileleia mai e ia. O le tusi o Le Poto e Taʻitaʻia ai i le Ola e Faavavau o se mea faigaluega lelei tau aʻoaʻo atu lea ua mafai ai e tagata loto faamaoni ona maua le malamalamaga saʻo e uiga i le Atua mai lana Afioga tusia, le Tusi Paia. (1 Timo. 2:3, 4) O le manino ma le saʻo ona talanoaina e le tusi o Le Poto o le upu moni, o le a fesoasoani i tagata e taofimau ai i le mea ua sailia e Ieova e aʻoaʻoina ai i latou. I le masina lenei, tatou te mananao ai e faaaafia tagata i ni talanoaga o le a faaosofia ai lo latou manao e faitau i le tusi. O nisi nei o fautuaga. Nai lo le taumafai e aʻo faatauloto nei mea, taumafai e faamatala manatu autū i au lava upu ma i se uiga faatalanoa.
2 Talu ai o le toatele o tagata ua leiloa se tasi e pele ona o le oti, e mafai ona e faafesootai atu le faamoemoe o le toetu e faia ai se talanoaga i lou muai fai atu e faapea:
◼ “O le toatele o i tatou ua leiloa se tasi e pele ona o le oti. Pe ua e tau mānatu ea pe faamata o le a e toe vaai i lena tagata? [Faatali mo se tali.] O le oti, sa lē o se vaega lea o le uluai fuafuaga a le Atua mo le tagata. Na faamaonia mai e Iesu e mafai ona laveaiina ē pele ia i tatou mai le oti. [Faitau le Ioane 11:11, 25, 44.] E ui lava na faia lenei mea i senituri ua mavae, ae ua faataitaia ai le mea ua folafola mai e le Atua e faia mo i tatou. [Suʻe le tusi o Le Poto i le ata i le itulau e 85 ma faitau le faamatalaga o le ata. Ona faaali lea o le ata i le itulau e 86 ma fai i ai se faamatalaga.] Afai e te fia faitau atili e uiga i lenei faamoemoe faamafanafana loto o le toetu, ou te fiafia e tuu lenei tusi mo oe.”
3 Pe a uma le uluai talanoaga e uiga i le faamoemoe o le toetu, e mafai ona e amataina le isi talanoaga ma le tagata lava lea i le auala lenei:
◼ “Atonu e te manatua na ou fai atu, o le oti e lē o se vaega o le uluai fuafuaga a le Atua mo le tagata. Afai e moni lea, aisea la ua oo ai ina tatou matutua ma feoti? O nisi o laumei e mafai ona ola e sili atu i le l00 tausaga, ma e iai laau ua ola mo le faitau afe o tausaga. Aisea e ola ai le tagata mo na o le 70 po o le 80 tausaga? [Faatali mo se tali.] Ua tatou feoti ona o le lē usiusitai o le uluai ulugalii i le Atua.” Faitau le Roma 5:12. Suʻe i le tusi o Le Poto i le itulau e 53 ma faitau le matua o le mataupu. Talanoa i uluai palakalafa e tolu, ma faasino i ai tali i fesili ua lomia. Fai se tuutuuga e te toe foi atu i se taimi mulimuli ane e talanoa vaega o totoe o le mataupu. Faalaeiau le tagata ina ia faitau uma le mataupu i lena taimi.
4 Afai e te talanoa i se tagata e foliga mai e mapo lotu, e mafai ona e faapea atu:
◼ “Ua iai moni lava le faitau selau o lotu eseese i aso nei. Latou te aʻoaʻoina ituaiga uma o talitonuga feteenai. Ua faapea mai nisi tagata, e lelei lotu uma ma e leai lava se eseesega o mea o loo tatou talitonu i ai. O le ā sou manatu? [Faatali mo se tali.] Na aʻoaʻo e Iesu le lotu moni ma faailoa mai ai o isi ituaiga o tapuaiga e lē talia e le Atua. [Faitau le Mataio 7:21-23.] Afai tatou te mananao e faafiafia le Atua, e tatau lava ona tatou tapuai ia te ia i le auala e ogatasi ma lona finagalo.” Suʻe le tusi o Le Poto i le mataupu e 5, faitau le matua, ma faasino i nisi o tamai ulutala. Faamatala i ai o lenei faamatalaga o le a fesoasoani i se tasi e iloa ai le auala e faafiafia ai le Atua. Ofo i ai e mafai ona tuu le tusi pe a manao lē ona le fale e faitau i ai, ma faailoa i ai e faapea, e te talia foi foai tauofo mo la tatou galuega i le lalolagi aoao.
5 O tagata o ē ua lē mautonu ona o le tele naua o lotu, atonu e talisapaia se tali i lenei fesili pe a e toe asiasi atu:
◼ “Ona o le tele naʻuā o lotu eseese o loo iai i aso nei, e mafai faapefea ona tatou iloa po o lē fea le lotu saʻo? O le ā se mea e te iloa ai? [Faatali mo se tali.] Na taʻu mai e Iesu ia i tatou pe faapefea ona iloaina ona soo moni.” Faitau le Ioane 13:35. Talanoa i le palakalafa e 18 ma le 19 i le mataupu e 5 o le tusi o Le Poto. Faasino i ai e faapea, o le faaaogaina o nei taʻiala faale-Tusi Paia ma faasolosolo ona vailiili auauai talitonuga o lotu eseese, ua mafai ai e se tagata ona iloa le lotu moni. Faamatala i ai le auala ua lauiloa ai Molimau a Ieova i le lalolagi aoao ona o lo latou alofa moni ma le maualuga o tapulaa tau amio. Faamatala po o le a faapefea i le faia o se suesuega faale-Tusi Paia e faaaogā ai le tusi o Le Poto, ona faailoaina manino ai le ituaiga o tapuaiga e faamaonia e le Atua.
6 Afai e te feiloai i se matua, atonu o le a aogā lenei faafeiloaiga:
◼ “I aso uma lava, tatou te faalogo ai i lipoti e uiga i amioga lē taupulea a talavou o ē e foliga mai e matuā leai lava ni tapulaa tau amio. Ua mananao nisi tagata matutua e tuuaʻia faiga faaleaoaoga i le lē aʻoaʻoina o tamaiti i le eseesega o amioga saʻo ma amioga sese. O ai e te manatu e tatau ona saunia lenei toleniga? [Faatali mo se tali.] Faalogo po o ā fa a le Tusi Paia e uiga i lenei fesili. [Faitau le Efeso 6:4.] Ua taʻu mai e lena mea ia i tatou e faapea, o le aʻoaʻoina o amioga tatau i fanau, o le tiute tauave lea a mātua.” Suʻe le tusi o Le Poto i le itulau e 145, faitau le palakalafa e 16, ma faaopoopo i ata i le itulau e 147. Faamatala i ai ua fuafuaina le tusi mo le aiga atoa e suesue i ai. I le faaaogaina o le palakalafa e 17 ma le 18 i le itulau e 146, ia ofo i ai e mafai ona faataitaia le auala tatou te faia ai suesuega faapena i aiga.
7 Afai e te amataina i le uluai asiasiga se suesuega ma se matua o loo popole mo lana fanau, e mafai ona e faaauau lea suesuega i lou toe asiasi atu ma faapea atu:
◼ “Ua tuu atu e le lalolagi i aso nei le tele o faaosoosoga i a tatou fanau talavou. O lenei mea, ua faafaigata ai ia i latou ona avea ma ni ē e matataʻu i le Atua a o latou tuputupu aʻe. Atonu o e manatua, i la ta talanoaga talu ai, na ta talanoa patino ai i ni mataupu silisili se lua. I le avea o ni mātua e matataʻu i le Atua, e manaomia ona tatou faataatitia ni faaaoaoga lelei mo a tatou fanau, ma e tatau ona tatou faailoa maumauai atu i ai lo tatou alofa mo i latou. E iai foi se isi mea ua fai mai ai le Tusi Paia e manaomia e fanau mai o latou mātua.” Faitau le Faataoto 1:8. Suʻe i le itulau e 148 o le tusi o Le Poto, ma faaauau le suesuega, e faaaofia ai palakalafa e 19-23. Faailoa i ai e mafai ona e toe foi atu e fai le suesuega ma le aiga atoa, e amata i le mataupu 1.