O Talanoaga Faaleuo e Mafai Ona Pāʻia ai le Loto
1 O talanoaga ua faamatalaina e faapea o se “fetufaaiga o manatu e ala i upu.” O le amataina o ni talanoaga faaleuo i se mataupu o mamafa i manatu o isi, e ono faaosofia ai lo latou naunau ma mafai ona fesoasoani ia i tatou e pāʻia ai o latou loto i le feau o le Malo. Ua faaalia i mea tutupu i le olaga e faapea, e sili mamao atu ona maua iuga aogā i le faaaafia o tagata i se talanoaga māfana faaleuo nai lo le lauga atu ia i latou.
2 Le Auala e Amata ai se Talanoaga Faaleuo: O le mafai ona tatou talanoa ma isi, e lē o le uiga o lo tatou fuafuaina o ni manatu e faaofo ai o ni upu maotua faigata pe sii mai foi le tele o mau o le Tusi Paia. E na o le pau lava le mea e fai o le taumafai lea ia talanoa mai le isi tagata ma i tatou. Mo se faaaoaoga, pe afai tatou te faia se talanoaga faaleuo ma le tagata lea e tuaoi o tatou fale, e lē tatau ona faigata, ae ia māfana. E tatou te lē tau mafaufau po o ā isi upu ia o le a fai atu, ae tatou te tali atu e pei ona masani ai i manatu ua ia faaalia. O le faaalia o le naunau moni i mea o ia fai mai ai, e ono faalaeiauina ai o ia e sāga talanoa pea ma i tatou. E faapena foi pe a tatou molimau atu i isi.
3 O mataupu e pei o le solitulafono, o faafitauli o talavou, o mataupu i totonu lava o le atunuu, o tulaga o le lalolagi, pe e oo lava i le tau e mafai ona faaaogā e amata ai ni talanoaga faaleuo. O mataupu o loo aafia saʻo ai olaga o tagata, e aogā tele e faaosofia ai lo latou naunau. E amata loa se talanoaga, e mafai lava ona tatou faafesootaia mālie atu i le feau o le Malo.
4 O le faia o se talanoaga māfana, e lē faapea o le a lē tatau ai ona muai faia se sauniuniga. E tatau. Ae peitai, e lē manaomia ona fuafuaina se auivi faigata pe taulotoina se lauga, auā o le a iu ai i le faia o se talanoaga e lē mafai ona fetuutuunai pe faafetaui atu i tulaga o loo iai i lena taimi. (Faatusatusa i le 1 Korinito 9:20-23.) O se auala e pito sili ona lelei e sauniuni ai, o le filifilia lea o se matua faale-Tusi Paia e tasi pe lua, ma se fuafuaga ina ia atiina aʻe ai ni talanoaga. O le autaluina o mataupu o loo maua i le tusi o le Reasoning o le a faamaonia le aogā mo lenei mea.
5 Uiga Tatau mo se Talanoaga Faaleuo: Pe a tatou talanoa ma isi, e tatau ona tatou māfana ma mautinoa. O le mata ʻataʻata ma foliga fiafia e fesoasoani i le faaatagiaina atu o nei uiga. Ua ia i tatou se feau aupito sili ona lelei i le lalolagi; e matuā talafeagai lelei ma tagata loto faamaoni. Afai latou te lagona o lo tatou fiafia ia i latou ua uunaia e se naunau moni e tufa atu le tala lelei ia i latou, atonu o le a uunaia ai i latou e faalogo.—2 Kori. 2:17.
6 O le auai i se talanoaga, e tatau ona avea o se mea e fiafia ai. O lea la, e tatau ona tatou agalelei ma ia tomai i le taulimaina o le feau o le Malo. (Kala. 5:22; Kolo. 4:6) Taumafai ina ia iai ni faalogona lelei o le isi tagata i Molimau a Ieova. O le auala lenei, e tusa lava pe tatou te lē taulau i le taimi muamua e pāʻia lona loto, ae atonu o le a sili atu ona tali lelei mai i se isi taimi e talanoa atu ai se Molimau ia te ia.
7 O le amataina o se talanoaga faaleuo, e lē o le iuga o se lauga faigata na faia. Ua na o se mea e faagaee ai le naunau i se mataupu sa mamafa i le manatu o se tagata. Afai tatou te muai sauniuni, o le a tatou nofo sauni loa e faaaafia tagata i talanoaga faaleuo. Seʻi o tatou taumafai ina ia pāʻia loto o i latou o ē tatou te feiloai atu i ai e ala i le tufa atu ia i latou o le tala e aupito sili ona lelei ua maua e uiga i faamanuiaga e faavavau o le Malo.—2 Pete. 3:13.