Faaleleia o o Tatou Tomai i le Faiva—Faamaʻite se Talanoaga e Molimau lē Fuafuaina Ai

Māfuaaga e Tāua Ai: E toʻatele e lē maua atu i aiga pe a talaʻi atu mai i lea fale i lea fale. Peitaʻi, e mafai ona tatou maua le avanoa e feiloaʻi ai ma i latou na i nofoaga faatali pasi, faatali se fomaʻi, pe o le taimi foʻi o le mālōlōga i le aʻoga po o le galuega ma isi tulaga eseese. E finagalo Ieova e maua e tagata uma le avanoa e faalogo ai i le feʻau o le Malo. (1 Timo. 2:3, 4) O lea, e manaʻomia ona tatou taumafai e faamaʻite se talanoaga, ina ia avatu ai se molimau.

Le Auala e Fai Ai:

Ia fuafua lelei. Pe o foliga faaleuō ma fia talanoa le tagata? Pe o talafeagai se talanoaga ma le tulaga o le tagata? O nisi tagata talaʻi e amata i sina ʻataʻata faaleuō Pe afai e foliga fiafia mai le tagata, ona taumafai loa lea e amata se talanoaga.
Tatalo lē leoa iā Ieova mo le lototele pe afai e lagona le popole.—Nee. 2:4; Galu. 4:29.
Amata i sina faamalō e faafeiloaʻi ai. Manatua foʻi e leʻi amataina le talanoaga a Iesu ma le fafine Samaria i le Malo. (Ioa 4:7) O nisi taimi e mafai ona amata i le faamalō atu e pei o lenei: “E ese le lelei o si au fanau.” Pe fai foʻi se fesili e amata ai se talanoaga: “Na e matamata i tala fou anapō?”
Pe afai ua amata le talanoaga, saʻili se avanoa e faailoa atu ai le tala lelei, ae aua foʻi e te vavevave. Taumafai e faaauau pea seʻia oo ina sologa lelei le talanoaga. Atonu e te faia se faamatalaga e faaosofia ai le fia iloa o le tagata e fesili mai. O se faataʻitaʻiga afai o loo lua talanoa e faatatau i aiga, e te ono faapea atu, “E iai ni fautuaga maufaatuatuaina i le auala e tausia aʻe ai fanau lea ou te iloaina.” Pe afai o loo lua talanoa i se mataupu mai i tala fou, e te ono faapea atu, “E iai se tala fiafia na ou faitau ai talu ai nei sei fai ai foʻi se suiga.” Aua e te lotovaivai pe afai ua uma le talanoaga ae e te leʻi avatu se molimau.
Ave ni au savali po o nisi lomiga e mafai ona e ofo atu i se tagata e faaalia le fiafia.

Faataʻitaʻi a o Faagasolo le Masina:

Taumafai e fai se sini pe faatasi i le vaiaso ona molimau atu lē fuafuaina.