Tatou te “Talaʻi Atu le Upu”
1 Ua moni le faamatalaga a le Tusi Paia e uiga i “aso e gata ai,” o le toatele o tagata i aso nei “ua peiseai ua amio Atua.” (2 Timo. 3:1, 5, LT) Ua māfua lenei mea ona ua lē taulau taʻitaʻi lotu ona avatu taʻiala moni faaleagaga i a latou lafu. E lē o sapasapaia e taʻitaʻi lotu o Kerisinetoma le Tusi Paia. Ua sili ia i latou le toe taʻua o aʻoaʻoga lē aogā a le ʻau faifilosofia ma tagata suesue faapitoa i aʻoaʻoga faalotu, pe e na ona talanoa foi i mataupu lautele po o mataupu faapolotiki nai lo o le talaʻia o le Afioga a le Atua. E toatele taʻitaʻi lotu e lē talitonu i le Tusi Paia. Ua latou lagona e faapea ua lē o toe aogā, o lea ua latou aʻoaʻo ai ma le lē saʻo le aʻoaʻoga faaevolusione nai lo o le aʻoaʻoga a le Tusi Paia e uiga i Lē Sili na Foafoaina Mea. O le toatele o taʻitaʻi lotu e latou te lē faaaogaina le suafa totino o le Atua, ma latou te lei tetee foi i le aveesea o lea suafa mai faaliliuga faaonaponei o le Tusi Paia.
2 E pei ona iai taʻitaʻi lotu i aso o Iesu, ua faapena foi ona lē aogā talaʻiga a taʻitaʻi lotu i aso nei. (Mata. 15:8, 9) Ua pei lava ona valoia e le perofeta o Amosa. O le a iai “le oge i le nuu; e le se oge i mea e ʻai, po o se gālala i le fia inu vai, a o le oge i le faalogologo i afioga a Ieova.” (Amo. 8:11) Ua sili atu ona manaomia e tagata meaʻai faaleagaga o le Afioga a le Atua nai lo o se isi lava mea.
3 Le Auala e Faamalie ai Manaoga Faaleagaga o Tagata: Na apoapoai atu Paulo ia Timoteo ina ia taofimau i “tusi paia, e mafaia ona faapoto ai [se tasi] e iu ai i le faaolataga,” o le mea lea na ia matuā faatonu atu ai ia te ia ina ia “talaʻi atu le upu” i isi. (2 Timo. 3:14, 15; 4:2) I le avea o ni Molimau a Ieova, e tatau ona tatou taofimau i mea o aʻoaʻoina e le Tusi Paia pe a tatou talaʻi atu, o lea ua tatou faataitai ai i lo tatou Faaaoao, o Iesu, o lē na fetalai mai: “O laʻu aʻoaʻoga e le o saʻu lava, a o lana na auina mai aʻu.” (Ioa. 7:16) Tatou te faaaogā le Afioga a le Atua o se faavae mo a tatou aʻoaʻoga auā ua tatou iloa o loo iai le atamai o le Atua, ma tatou te mananao ina ia iloa e tagata o le puna lea o faamatalaga ia tatou te fai atu ai ia i latou.—1 Kori. 2:4-7.
4 E tatau ona muai faalogo tagata i le upu moni mai le Tusi Paia ina ia latou aʻoaʻoina e uiga ia Ieova ma faatuatua ai ia te ia. Na tusi saʻo mai Paulo e faapea: “Pe faapefea foi ona latou faatuatua i le ua latou le faalogo atu i ai? pe faapefea foi ona latou faalogo atu, pe a leai se talaʻi atu?” (Roma 10:14) E ala i le talaʻia o le Afioga a le Atua, ua tatou fesoasoani ai i isi e maua le faatuatua e ala i le poto saʻo. Ua mafai ma ua suia e lena poto olaga o tagata i le tulaga e sili atu ona lelei. Na tusia e le tusitala Egelani o Charles Dickens e faatatau i le Tusi Paia e faapea: “O se tusi ua silisili ona lelei lea ua iai ma o le a iai pea i le lalolagi, auā e aʻoaʻo mai ai ia te oe lesona e silisili ona lelei ia e mafai ona taitaia ai so o se tagata ola o loo taumafai e faatuatua moni ma faamaoni.”
5 O i latou o fia aai mo le upu moni faaleagaga, ua latou iloa o loo sapasapaia e le pule mai le Afioga a le Atua. I tuā i le 1913, a o avea Frederick W. Franz o se talavou e aʻoga i se kolisi, na tuuina atu ai ia te ia se tamai tusi o lona ulutala, Where Are the Dead? (O Fea o Iai Ē ua Maliliu?) Ina ua uma ona faitauina ma le fiafia tele le tali mai le Tusi Paia i lenei fesili, na ia faalauiloa mai e faapea: “O le upu moni lenei.” E faapena foi le lagona o le faitau miliona o i latou o loo saili i le upu moni. Seʻi faaauau pea ona tatou talaʻi atu le Afioga a le Atua ma le filigā ma le maelega ma auai ai i le olioli i le faalogo atu i isi tagata o faapea mai: “O le upu moni lenei.”