Ia Aʻoaʻo Isi i Mea e Manaomia e le Atua
1 O loo mafai pea ona maua le toatele o tagata ua leva ona ona oge faaleagaga i le “faalogologo i afioga Ieova.” (Amo. 8:11) A o talitonu nisi e faapea o loo soifua le Atua, ae latou te lē iloa e uiga i lana fuafuaga ma mea o ia manaomia. O lea, ua manaomia ai ia i tatou ona aʻoaʻo i latou i le upu moni faasaoola o le Malo. E ala i le faaauupegaina lelei ma sauniuni e molimau atu i avanoa uma, e mafai ai ona tatou maua i latou o ē mananao e aʻoaʻoina mea e manaomia e Ieova.
2 Ia Aperila ma Me, o le a tatou maua ai lomiga talafeagai o le Olomatamata ma le Ala Mai! e tufatufaina atu. E lē gata i lea, o le a tatou ofoina atu ai mo le uluai taimi le polosiua, O le ā e Manaomia e le Atua Mai ia i Tatou? O ona ata faatosina ma fesili faatupu manatu, ua matuā toatele ai ē ua fiafia i lenei polosiua. O fautuaga o loo mulimuli mai, ua tuuina mai e fesoasoani ia i tatou e faaaogā la tatou lomiga e aupito sili ona lelei i se auala uigā.
3 Sailia o Tagata: I vaipanoa e lē maua atu ai le toatele o tagata i fale pe a tatou asiasi atu mai lea fale i lea fale, ua faamaonia le aogā o le sailia o tagata ma talanoa atu i ai i so o se mea lava e maua i ai. Ua faalaeiauina i tatou e le faaopoopoga o La Tatou Faiva o le Malo o Setema 1996, ina ia talaʻi atu le tala lelei i so o se mea—i ala tetele, o auala o femalagaaiga mo le lautele, ma i malae e tafafao ai tagata, paka o taavale, ma nofoaga o pisinisi. Ua mafai foi ona tatou iloa ai le manaomia ona faia ni avanoa e talaʻi atu ai lē fuafuaina. O se faaaoaoga o lenei mea, na alu atu se tuafafine paeonia i le nofoaga e tuu ai manu (zoo) ma ni lomiga o le Ala Mai! o Aokuso 8, 1996, e iai le faasologa o le mataupu, “Endangered Species—Why Be Concerned?” (Ituaiga o Manu ua Lamatia—Aisea e Popole Ai?) E na o le tasi le itula ae na ia tufaina atu ai kopi e 40 i ē alolofa i mea ola ma e latou te matuā faatāuaina! O le ā se taulau manuia ua e olioli ai i le taimi nei ona o le talaʻiina atu o le tala lelei i so o se mea? O Le Olomatamata ma le Ala Mai! faapea le polosiua Manaomia, ua fetaui faapitoa mo so o se ituaiga o molimau atu, auā o loo faatomua mai ai faamatalaga e aafia ai olaga o tagata ma faagaeeina ai o latou tomai faalemafaufau.
4 Amataina o Talanoaga: I le itulau i tua o La Tatou Faiva o le Malo o Oketopa 1996, o loo aumaia ai faamatalaga auiliili i le auala e te sauniunia ai au lava taulimaga mo mekasini o Le Olomatamata ma le Ala Mai! O le a aogā lelei foi na fautuaga pe a sauniunia au taulimaga o le polosiua, Manaomia. O mea tatou te fai atu ai, e mafai ona faapupuu i na o ni nai fuaiupu pe ia lava foi le umi e mafai ona faaaofia ai ma se manatu faale-Tusi Paia. E tāua tele le filifilia ma le faaeteete o upu amata, talu ai o au upu tomua o le a iloa ai pe fia faalogo pea le tagata. Ua taulau manuia nisi i le faaaogaina o le upu tomua lenei: “Sa ou faitau i se mataupu na faalaeiauina ai aʻu, ma ou te fia tufaina atu ia te oe.” Pe e mafai foi ona lagā se fesili faatupu manatu ina ia tataʻi mai ai le isi itu e faia se talanoaga.
5 Pe afai e talafeagai i lou vaipanoa, e mafai ona e taumafai e fai ni fesili faapenei i au taulimaga i lenei masina:
◼ “I aso nei, ua tatou vaaia ai le tele o tusitusiga matagā i nofoaga faitele, lapisi, ma le polusione. O le ā e manaomia ina ia faamamāina ai le lalolagi ma faia ai ia avea o se nofoaga e sili atu ona lelei mo le ola ai?” Faatali mo se tali, ona faamatala lea i ai e faapea, o loo ia te oe ni faamatalaga e faamautinoa ai ia i tatou le auala ma o afea foi o le a avea ai le lalolagi ma faatoaga matagofie i le lalolagi aoao. Fai atu iai se faamatalaga maʻoti, se mau puupuu, ma se ata felanulanuai mai se mekasini fou, ma ofo loa mo le tagata ina ia faitau i ai. Ia faailoa i ai e faapea o le toatele o i latou e fiafia e faitau i a tatou lomiga, e ofoina mai se mea alofa tauofo lea e tatou te fiafia e faaaogaina mo la tatou galuega i le lalolagi aoao. A o lei faaiuina le talanoaga, taumafai e fai se fuafuaga ina ia e toe foi atu e faaauau le talanoaga i se isi taimi.
◼ “E te manatu na finagalo le Atua mo i tatou ia ola e siosiomia e faalavelave e pei o ia o loo tatou fesagai i aso nei?” Pe a uma ona tali mai le tagata, e mafai loa ona e faapea atu: “E lē taumatea ua e masani i le tatalo na aʻoaʻo e Iesu i ona soo ina ia tatalo ai, e talosaga atu ai ina ia oo mai le Malo o le Atua. Po ua e manatunatu po o le ā moni lava le Malo o le Atua?” Suʻe i le lesona e 6 i le polosiua Manaomia, ma faitau fesili o loo aliai mai i le amataga o le lesona. Ia, a o e faitauina la le palakalafa 1, faasino atu le tali i le fesili muamua. Faamatala i ai e faapea, o isi fesili uma lava o loo faapena foi ona tali faapuupuuina ai ma le manino. Ofo le polosiua, taʻua le fuafuaga mo mea alofa tauofo, ma fai iai e mafai ona lua toe feiloai e talanoa atili i nisi faamatalaga e uiga i le Malo.
◼ “E toatele tagata fai mafaufau ua amata ona manatu i lotu a le lalolagi e faapea, o le pogai o faafitauli o tagata nai lo o se vaifofo. O le ā sou manatu i lena mea?” Pe a uma ona faalogologo i le manatu o le tagata, faaali i ai se mea mai se tasi o mekasini fou e ono faaoso ai lona naunau fia iloa e uiga i le lē taulau o lotu sese, po o lona iuga ua latalata mai. Fesili i ai pe fia faitau i le polosiua. Fefaailoaaʻi o oulua igoa, ma fai i ai e mafai ona e toe asiasi mai ina ia mafai ai ona e faamatala atu le auala ua taulau manuia ai le lotu moni i tagata. Pe a talafeagai, faamatala i ai le auala e mafai ai e se tagata loto fiafia ona faia sina mea alofa tauofo.
◼ “Ona o le matuā tele o faafitauli i le olaga faaleaiga i aso nei, po o e taumanatu ea pe e iai se ala e mafai ona maua ai le fiafia i le aiga?” Faatali mo se tali, ona faamatala lea i ai e faapea, i le Tusi Paia, ua faailoa mai ai e le Atua le ala moni i le fiafiaga o le aiga. Atonu e mafai ona e faitauina le Isaia 48:17. Ona suʻe lea i le lesona e 8 i le polosiua Manaomia, ma faasino i nisi o fuaiupu o le Tusi Paia o loo taʻua ai, ua saunia ai taiala maufaatuatuaina mo tagata taitoatasi o le aiga. Faitau le lisi o fesili i le amataga o le lesona. Fesili i ai pe manao le tagata e faitau i tali. Afai e manao, tuu i ai le polosiua ma faamatala i ai, e ui lava e lē faatauina le lomiga, ae tatou te talisapaia sina foai tauofo talafeagai e fesoasoani ai i la tatou galuega i le lalolagi aoao. Fai i ai e mafai ona e toe asiasi mai i se isi taimi e talanoa atili i taiala aogā o loo i le Tusi Paia mo se olaga fiafia faaleaiga.
6 O le faaopoopoga i La Tatou Faiva o le Malo o Mati 1997, ua faalaeiauina ai i tatou ina ia maua le lototele e faia ai toe asiga. O loo fautuaina ai le faaaogaina o le polosiua Manaomia e amata ai suesuega faale-Tusi Paia, a lē i le uluai asiasiga, o le toe asiga. O le manaoga tupito o tagata o le aʻoaʻo lea o mea o loo manaomia e le Atua ma faia. (Kolo. 1:9, 10) O le a tele aogā e tatou te tufaina atu i tagata i le vaitaimi o Aperila ma Me pe afai e mafai ona tatou amata aʻoaʻoina i latou i mea ua tatou iloa e manaomia e Ieova mo le olaga.—1 Kori. 9:23.