Pusa Fesili
◼ O ā lomiga e tatau ona tuu i le potu tusi a le Aʻoga o le Faiva Faatiokarate?
E anoanoai lomiga faaleagaga ua saunia mo le lelei o tagata o le Atua. Talu ai e toatele le au talaʻi e lē o ia i latou nei tusi uma, ua saunia ai i le potu tusi mo le Aʻoga o le Faiva Faatiokarate i le Maota o le Malo ia tusi mo le faia ai o ni suesuega i lomiga na atonu e latou te lē o maua. O lea, e tatau ai ona faatumuina lelei le potu tusi i le tele o faaliliuga eseese o le Tusi Paia, lomiga na lomia lata mai nei a le Sosaiete, kopi o La Tatou Faiva o le Malo, tuufaatasiga o Le Olomatamata ma le Ala Mai!, ma le Watch Tower Publications Indexes. E lē gata i lea, e tatau foi ona iai ma se lomifefiloi lelei faaonaponei. Pe afai e maua, e aogā foi ona iai ni encyclopedias, faafanua o le lalolagi, po o ni tusi faasino o le kalama ma le talafaasolopito. Ae peitai, o le mea e sili ona tāua, o le taulai atu lea i lomiga ua saunia e “le auauna faamaoni ma le mafaufau.”—Mata. 24:45.
I nisi o tulaga, ua lipotia mai ai e faapea, ua tuu ai foi ma tusi e lē talafeagai i le potu tusi a le Aʻoga o le Faiva Faatiokarate. O le a lē talafeagai ona tuu ai tusi o tala fatu, tusi a le au faimanatu o le Tusi Paia o loo faatāuaina ai le tagata tusitala, po o tusi faafilosofia po o faiga faataulaitu. E tatau i le potu tusi a le Aʻoga o le Faiva Faatiokarate ona aofia ai na o tusi o le a mafai ai e i latou o faaaogaina ona agaigai pea i luma faaleagaga.—1 Timo. 4:15.
O le ovasia o le aʻoga e fitoi tonu i ai le tiute tauave mo le vaaia o le potu tusi, e tusa lava pe iai se uso ua tofia e fesoasoani ia te ia. E tatau ona ia tagai ia faafou pea le potu tusi i lomiga fou e faaopoopo i ai i le taimi lava e maua ai. E tatau ona makaina manino tusi taitasi i totonu o le faavaa i le igoa o le faapotopotoga e ona ia tusi. E tatau lava ona siakiina tusi i tausaga uma ia iloa ai pe iai ni tusi e manaomia ona faafou pe toe suia.
E mafai e tagata uma ona felagolagomai i le tausia o le potu tusi. E tatau ona matuā faaeteete i le umiaina ma le faaaogaina o tusi. E lē tatau ona faatagaina tamaiti e taaalo i tusi, e lē tatau foi i se tasi ona tusitusi pe vasevaseina tusi. E tatau ona tusia se faaaliga manino i totonu o le potu tusi, e faamanatu atu ai i tagata e faapea, e lē tatau ona aveesea tusi mai le Maota o le Malo.
Ona o le tele o faapotopotoga fou e amataina pea, e foliga mai ai e faatapulaaina le tetelē o potu tusi. O nisi o le au talaʻi atonu o iai pea ni a latou lomiga tuai, e mafai ona filifili e tuuina atu faameaalofa i le faapotopotoga. Atonu e mananao le autoeaina e otaina tusi ua toe lomia e le Sosaiete o tuufaatasiga o Le Olomatamata. I nei auala, o le a faamaonia ai le aogā tele o le potu tusi a le Aʻoga o le Faiva Faatiokarate e fesoasoani ai i tagata uma ina ia mauaina le oa o loo natia o le Afioga a le Atua, lea e aumaia ai le poto, le atamai, ma le malamalama.—Faata. 2:4-6.