E Tauia le Faamaoni
1 I le Eperu 11:6 ua taʻu mai ai ia i tatou e faapea o le Atua “na te tauia mai o e matuā saili ia te ia.” O le tasi o auala na te tauia ai ana auauna tuutoina atu ia te ia o ē na ‘faamaoni i mea iti’ o le ‘tofia lea o i latou e pule i mea e tele.’ (Mata. 25:23) I se isi faaupuga, e masani ona tauia e Ieova galuega maelega i le tuuina atu lea i ana molimau faamaoni ni faaeaga faaopoopo o le auaunaga.
2 Na tauia le faamaoni o le aposetolo o Paulo i le tofia lea o ia i se faiva na māfua ai ona ia oo atu i aai ma nuu o Europa ma Asia Itiiti. (1 Timo. 1:12) E ui lava i le tele o taumafaiga na aafia ai i le faataunuuina atoatoa o lana faiva, sa matuā maualuga le manatu o Paulo i le faaeaga lea na ia mauaina. (Roma 11:13; Kolo. 1:25) Sa ia faaalia lona loto talisapaia atoatoa e ala i le naunau e vaavaai mo ni avanoa e talaʻi ai. E ala i lana galuega maelega, na ia faaalia manino ai sa ola o ia e tusa ma lona faatuatua. O lana faaaoaoga ua uunaia ai i tatou e faapelepele i o tatou faaeaga o le auaunaga.
3 Ua Tuuina Mai e Ieova ia i Tatou se Faiva: E faapefea ona tatou faaalia lea lava manatu e uiga i lenei taui o le faaeaga na faaalia e Paulo? E tatou te vaavaai mo ni auala e faateleina ai le faia o so tatou sao i le faiva. E tatou te faaaogā avanoa uma e molimau atu ai lē fuafuaina faapea ma lea fale ma lea fale. E tatou te toe asia fale uma e lei maua atu i ai ni tagata, ma toe asia i latou uma na faaalia le fiafia. Ma e tatou te tausisia ni fuafuaga na tatou faia ina ia toe foi atu e faia suesuega faale-Tusi Paia i aiga.
4 E tusa ai ma la tatou faiva, na apoapoai mai Paulo: “Ia e uaʻi vave atu i ai.” (2 Timo. 4:2, NW) O se mea e faanatinati e manaomia ona uaʻi vave atu i ai. Po o tatou ō atu i la tatou faiva i se uiga faanatinati, i le faamuamua lea o le faiva i o tatou olaga? Mo se faaaoaoga, o le a tatou lē mananao e faatagaina a tatou faafiafiaga ma isi sini totino i le faaiuga o le vaiaso e faalavelave i le taimi e tatau ona tatou tuuina atu mo le faiva i le fanua. Talu ai ua tatou talitonu i le matuā latalata tele mai o le iuga o lenei faiga o mea, ua tatou mautinoa ai foi e faapea, o le talaʻia o le tala lelei o le Malo, o le galuega aupito sili lea ona tāua e mafai ona tatou faia.
5 O lo tatou faamaoni i le Atua, ua faaalia i lo tatou faamaoni ma alofa faamaoni ia te ia ma maumauai i le galuega ua ia tofia mai ia i tatou. Seʻi o tatou faataunuuina atoatoa la tatou faiva, ina ia tauia e Ieova lo tatou faamaoni i se tulaga e sili atu.