Polokalame Fou o le Fonotaga Matagaluega

“Ia Manatua Pea le Aso o Ieova” o le matua lena o le polokalame o le fonotaga matagaluega e amataina ia Setema. (2 Pete. 3:12, NW) Ua fuafuaina ina ia faagaeeina ai lo tatou uiga lea o le faanatinati. Ua toeitiiti ona oo lea i ē o aināina le lalolagi ia faamasinoga a Ieova. O ai o le a faasaoina i “le aso tele o le Atua e ona le malosi uma lava”? E na o i latou e tumau ona mataala faaleagaga ma i latou e faavaeina le ituaiga olaga o “amio e tatau ai i le amio lelei ma le amio Atua.”—Faaa. 16:14; 2 Pete. 3:11.

E tāua le papatisoga mo se tagata ina ia faasaoina ai i le aso o Ieova. (1 Pete. 3:21) O tagata talaʻi o ē faanaunau ina ia papatiso i le fonotaga e ao ona taʻuina atu i le ovasia taimua, o lē o le a na faia ni faatulagaga talafeagai.

O se lauga faasolo e fa ona vaega, ‘O Ituaiga Amio e Tatau Ai,’ o le a faaalia manino ai ia gaoioiga e aafia i le teuina mau i mafaufau o le oo mai o le aso o Ieova. O le lauga lautele, “Gaoioi ma le Poto a o Lalata Mai le Aso o Ieova,” o le a faamatalaina ai le uiga o le ‘saili ia Ieova, le amiotonu, ma le agamalu,’ ina ia avea ai ma sē faasaoina.—Sefa. 2:3.

O le a faaiuina le fonotaga matagaluega i ni lauga se lua e faagaeeina ai e tauaaoina e ovasia femalagaai, e faamatuaina faapea: “Po o Faaautu ea Lou Olaga i le Upu Moni?” ma le “Ia Fuafua Mamao ma Manatua Pea le Aso o Ieova.” O nei lauga o le a faalaeiauina ai i tatou e suesueina o tatou olaga ma faia ni fetuutuunaiga manaomia. O valoaga o le Tusi Paia ma mea tutupu i le lalolagi ua faailoa manino ai ua latalata mai le aso o Ieova. O le polokalame o lenei fonotaga o le a uunaia ai i tatou ia ‘⁠faautauta ma mataala.’ (1 Pete. 5:8) Ia faia ni fuafuaga mautinoa ina ia auai i aso uma e lua.