Faaaogā Polosiua Ina ia Pāʻia ai le Mafaufau ma le Loto

¹ O le upu moni o le Tusi Paia, e tatau ona molioo atu i se auala e mafai ona pāʻia ai le loto ma le mafaufau o le tagata. Ina ua faamatala atu e Iesu le upu moni i lana au faalogologo, na ia filifilia ni mataupu sa fiafia ma uunaia ai i latou. (Luka 24:17, 27, 32, 45) O le taulau manuia o la tatou faiva, e faalagolago tele atu i taumafaiga tatou te fai, ina ia iloa ai manaoga faaleagaga o la tatou au faalogologo.

² O polosiua, e mafai ona avea o ni mea faigaluega aogā e pāʻia ai mafaufau ma loto o i latou tatou te feiloai atu i ai i le faiva. Ia muai mafaufau po o ai atonu o le a tali lelei mai i le feau lea o loo i polosiua taitasi ia o loo faatomuaina ia Aokuso:

—Po o Silasila Alofa mai ea le Atua ia i Tatou? O tagata o loo mafatia i tulaga tautamaoaiga po o i latou ua oo i ai se mala, atonu o le a talisapaia lenei feau faamafanafana e uiga i se lumanai o le a aunoa ma ni mafatiaga.

—Olioli i Le Ola i Le Lalolagi e Faavavau! O le tele o ata ma mau o le Tusi Paia o loo taʻua ai o le a fesoasoani i fanau talavou ma i latou e faalēlelei le faitau ina ia malamalama i fuafuaga a le Atua.

—O le Malo O le a na Aumaia Le Parataiso. So o se tasi lava e iai se fesootaiga ma le malo, e ono mafai ona tali mai i lenei feau e uiga i le Malo o le Atua lea o le a foia ai faafitauli faigata o le fanau a tagata.

—Pe a Maliu se Tasi e Pele i a te Oe. O i latou uma e iai o latou falemaliu e latou te talisapaia le mauaina o ni kopi o lenei polosiua mo aiga faavauvau. O tagata talaʻi e molimau atu i le nofoaga o fanuatanu e latou te faaaogaina lenei polosiua e faamafanafana atu ai i ē o faanoanoa. Na faalatalata atu ni tuafāfine se toalua i se aiga e toafitu o ē sa tatalo i se tuugamau. O le iuga o le tufaina atu o le feau faamafanafana mai le polosiua, na amataina ai se suesuega faale-Tusi Paia ma le tinā i le aso na sosoo ai!

—Pe Ao ona E Talitonu i le Tolutasi? O se tagata e malolosi ona faalogona faalotu, atonu o le a tali mai i le upu moni o loo maua i lenei polosiua ua faavaeina i mea moni e faaalialia ai lenei aʻoaʻoga faavae a Kerisinetoma.

³ Ia e faamasani lelei i polosiua taitasi, ma filifili i se auala e sili ona lelei e faaaogā ai i lau oganuu. Mo taulimaga ua fautuaina, tagai i le itulau i tua o le lomiga o La Tatou Faiva o le Malo o Iulai 1998. Tau ina ia faamanuia e Ieova au taumafaiga ina ia pāʻia uma mafaufau ma loto o tagata.—Mare. 6:34.