Pe E te Faitauina Mekasini?
1 O le tala lenei na fai e se ulugalii misionare i Aferika e uiga i a tatou mekasini: “Ua fesoasoani Le Olomatamata ia i maʻua e tausia ai pea lo ma mataala faaleagaga i la ma oganuu. E ma te maua mai ai faalaeiauga ma e faamalosia ai foi i lomiga taitasi.” Pe faapena foi lou talisapaia moni o a tatou mekasini? Ma po o e naunau e faitau i ai?
2 E matuā tele se taimi e faaalu i le sauniunia o mataupu i mekasini na e na o ni nai minute lava e mafai ona faitau ai. I le iloa o lenei mea, po o le a na ona e suʻe faatopetope ea i mataupu, matamata i ata, pe e na ona faitau foi i nisi taimi i se mataupu manaia na tosina i ai lau vaai? Tatou te atamamai pe afai tatou te faia e sili atu i lo o lena. E tatau ona tatou faaalu se taimi e faitau ma mafaufau loloto ai i mataupu uma i lomiga taitasi o a tatou mekasini. O Le Olomatamata o la tatou mekasini autū lena mo meaʻai faaleagaga i ona itu aso tatau. O le Ala Mai! o loo iai faamatalaga talafeagai e maua ai le poto e faatatau i le tele o mataupu eseese. O mea tatou te aʻoaʻoina e ala i le faitauina o nei mekasini, e lē gata ina faamalosia ai i tatou faaleagaga, ae ua saunia ai foi i tatou mo le faia o se sao uigā i le faiva. O le avea o i tatou lava o ni tagata faitau tusi sogasoga, o le a tatou matuā fiafia ai e ofoina atu mekasini i isi.
3 Le Auala e Faaleleia ai le Masani o le Faitautusi: Faamata e mafai ona e faaleleia lau masani o le faitauina o mekasini? O ni fautuaga se lua nei ua aogā mo le toatele. (1) Fai se faasologa faifai pea o le faitautusi. I le tau lava ina faaavanoa na o se 10 po o se 15 minute i aso taitasi e faitau ai, o le a e maofa ai i le tele o mea ua mafai ona e faitauina i se vaiaso. (2) Fai se faasologa e iloa ai mea na e faitauina. Atonu e mafai ona e faailoga le amataga o mataupu taitasi na e faitauina. A aunoa ma lea, e ono e misia ai la le faitauina o nisi mataupu pe misia foi se mekasini atoa. E tāua le ati ae o se masani o le faitau tusi o le a aogā mo oe ma ia pipii i ai.—Faatusatusa i le Filipi 3:16.
4 Ua tali mai ma le atamai “le auauna faamaoni ma le mafaufau” i le suiga o taimi e ala i le lomiaina o mataupu e talafeagai ma manaoga moni o tagata. (Mata. 24:45) O le mea moni, ua talafeagai lelei lava mekasini ma o tatou olaga. O lo tatou tuputupu aʻe faaleagaga, e tele lava ina faalagolago atu i le lelei o la tatou masani o le faitau tusi faatiokarate. O se oa o faamanuiaga faaleagaga o loo teuina mo i latou o ē e faaavanoa le taimi e faitau ai mekasini uma.