‘Ia Oofu i le Tagata Fou’
1 E talisapaia e Kerisiano le iloaina o le upu moni! Ua tatou aʻoaʻoina le auala tatou te ola ai ina ia alofia ai le ala o i latou o i le lalolagi. O ‘le liliu ese mai le ola o i le Atua,’ ua ‘faapouliuligia ai o latou mafaufau.’ (Efe. 4:18) Ua aʻoaʻoina i tatou ina ia toe fuataiina o tatou manatu mai mafaufauga o le lalolagi e ala i le toeseina o le tagata tuai ma oofu i le tagata fou.—Efe. 4:22-24.
2 O le tagata tuai e taitaiina atu ai i le uia pea o se auala sese o amioga paʻū maulalo ma iu ai i le faaleagaina ma le oti. O le mea lea, tatou te aioi atu ai ma le faamaoni ia i latou o le a mafai ona faalogo mai i le feau o le Malo ina ia tuu ese le ita uma lava, le lotoa, le amioleaga, o upu leaga, ma upu masoā. O i latou e fia maua le finagalo malie o le Atua e tatau ona maumauai e toese atoatoa le tagata tuai—i le auala e pei ona latou tatala ese ai se ofu eleelea.—Kolo. 3:8, 9.
3 Se Malosi Fou e Faagaoioia ai le Mafaufau: O le ofuina o le tagata fou e aofia ai le faafouina o le malosi e faagaoioia ai o tatou mafaufau. (Efe. 4:23) E mafai faapefea e se tasi ona faafouina lena malosi, po o le tulaga faalemafaufau, ina ia tausisi atu ai pea i le ala saʻo? E faia lenei mea e ala i le suesueina e lē aunoa ma le filigā o le Afioga a le Atua ma mafaufau loloto i lona uiga. Ia ona tuputupu aʻe ai lea o ni mafaufauga fou, ma mafai ai ona vaai lea tagata i mea e pei ona silasila i ai le Atua ma Keriso. E faaliliuina le olaga o se tasi a o ia faaofuina o ia i le tele o uiga fou e pei o uiga o Keriso, e aofia ai le tiga alofa, agalelei, loto maulalo, agamalu, onosai, ma le alofa.—Kolo. 3:10, 12-14.
4 E ala i le ofuina o le tagata fou, ua tatou faaesea ai i tatou lava mai le lalolagi. O le auala o o tatou olaga ua faaesea ai i tatou. Tatou te tāutala i le upu moni ma faaaogā gagana e atoatoa ona mamā e ati ae ai isi. E tatou te pulea lo tatou ita, le faatiga, le leo tetele, o upu leaga, ma mea leaga uma, ma suia nei uiga i le amiotonu, ma uiga faaleatua. E tatou te faia le mea e sili atu na i lo o le mea masani lea e manaomia mai ia i tatou i lo tatou loto faamagalo. O nei mea uma e faia ma le loto malie.—Efe. 4:25-32.
5 Aua lava neʻi toeseina le tagata fou. E lē mafai ona tatou auauna ia Ieova i se tulaga e talileleia mai e Ia pe a aunoa ma lea uiga. Ia faataga le uiga lea e fesoasoani ai i le tataʻiina mai o tagata i le upu moni, ma ia faapea foi ona faatagaina lea uiga e faamamaluina ai Ieova, o Lē na Foafoaina lo tatou tagata fou matagofie.—Efe. 4:24.