Pe Tatou te Leʻi Faalogo Muamua ea i Lena Mea?
1 O le mea moni ua tatou faalogo i ai! Ua taʻua pea lava e Ieova i lana Afioga le tele o mea e aogā mo ona tagata. E masani foʻi ona taʻua soo e Iesu ana aʻoaʻoga e uiga i vala eseese o le Malo. Na faaauau pea ona autaluina e ona aposetolo mataupu faaleagaga ma i latou o ē ua mausalī ona faavaeina i le upu moni.—Roma 15:15; 2 Pete. 1:12, 13; 3:1, 2.
2 I o tatou taimi, ua fuafuaina ai e le faalapotopotoga a Ieova mataupu tāua ina ia talanoaina pea lava pea i sauniga a le faapotopotoga. E iai nisi o lomiga ua suʻesuʻeina soo. Ioe, e tāua tele lo tatou toe faalogo i mea na tatou faalogo i ai muamua!
3 O le Toe Taʻu ua Faataunuuina ai se Manaʻoga Tāua: O faamanatuga a Ieova ua faalolotoina ai lo tatou malamalama, faalauteleina ai o tatou manatu, ma faamalosia ai la tatou filifiliga maumauaʻi ina ia tumau i le ala faaleagaga. (Sala. 119:129) O le toe autaluina o tapulaa ma mataupu silisili a le Atua, ua pei o le vaavaai atu i se faʻata. E fesoasoani lena mea ia i tatou e suʻesuʻe ifo ai i tatou lava ma tetee atu ai i le na o le avea ma “se faalogologo ma le faagalogalo.”—Iako. 1:22-25.
4 Afai tatou te lē faamanatu pea ia i tatou lava le upu moni, o le a iʻu ina taaʻina ese ai e isi mea o loo i o tatou loto. O faamanatuga a le Atua, e faamalosia ai i tatou e tetee atu i taaʻiga faapiopio o le lalolagi a Satani. (Sala. 119:2, 3, 99, 133; Fili. 3:1) O faamanatuga e lē aunoa ua tatou maua e faatatau i le faataunuuga o fuafuaga a le Atua, ua uunaʻia vave ai i tatou ina ia “mataala.” (Mare. 13:32-37) O le toe taʻua o upu moni o le Tusi Paia, ua fesoasoani ia i tatou e tumau ai i le ala i le ola e faavavau.—Sala. 119:144.
5 Le Auala e Maua ai Aogā Totino: E tatau ona ‘naunau o tatou loto i faamanatuga a le Atua.’ (Sala. 119:36) Pe a talanoaina i se sauniga a le faapotopotoga se mataupu ua e masani ai muamua, e tatau la ona tatou sauniuni mamao, faitau mau faasino, ma mafaufau i se auala e mafai ona tatou faatatauina ai lea faamatalaga. Seʻi aua neʻi o tatou lē sauniuni mo le autaluga tusia i le Aʻoga o le Faiva Faatiokarate, i le manatu e lē manaʻomia ona faia faapea. (Luka 8:18) Seʻi aua lava neʻi faalēano e faalogo ona e faapea, ua talanoaina soo upu moni faavae ia tatou sauniga.—Epe. 5:11.
6 Seʻi o tatou maua le uiga faaalia o le faisalamo: ‘Ua ou fiafia lava i le ala o au faamanatuga, e sili i le oloa uma lava.’ (Sala. 119:14) Ioe, ua uma ona tatou faalogo muamua i nei oloa, ma o le a faapena foʻi ona tatou toe faalogo atu i ai. Aiseā? Auā ua silafia e Ieova e manaʻomia ona tatou toe faalogo atu i ai!