Pe Mafai Ona Tatou Avea Aperila 2000 ma Masina Aupito Sili Ona Mataʻina?
1 O le po o le Aso Lulu, Aperila 19, o le a avea ma tumutumuga o la tatou tausaga faaleauaunaga. I lena aso, a o agaʻigaʻi ina goto mālie ifo le la i le lalolagi atoa, o le a faia ai e faapotopotoga uma ma vaega a Molimau a Ieova i le lalolagi aoao le Faamanatuga o le maliu o Keriso. Po o fea lava le vaega o le lalolagi o loo tatou nonofo ai, ae o le faamanatuina o le taulaga a Iesu Keriso o le a avea ma mea matilatila o le tausaga. Ua faailogaina le aso o le Faamanatuga i le masina o Aperila i le 2000 Calender of Jehovahʻs Witnesses.
2 O le masina atoa o Aperila ua aumaia ai ia i tatou se avanoa mātagōfie e faailoa manino atu ai, i se auala ma le loto atoa, lo tatou talisapaia o le alofa tunoa o Ieova na faaalia e ala i le taulaga a lona Alo. E faapēfea? Na tusi le aposetolo o Paulo e faapea: “Ua pulunaunauina i matou i le alofa o Keriso; o loo manatu faapea i matou, na maliu le toʻatasi mo tagata uma, o lea ua oti ai tagata uma; na maliu foʻi o ia ona o tagata uma, ina ia le usiusitai pea o e ola ia te i latou lava, a o ia o le na maliu ma toe tu mai mo i latou.” (2 Kori. 5:14, 15, LF) Ioe, a o faagasolo Aperila, e mafai ona tatou faailoa atu, e tatou te lē o ola mo i tatou lava, ae mo ia o lē na maliu mo i tatou, i lo tatou avea o lenei masina ma masina aupito sili ona mataʻina i le avea o ni faifeʻau o le Malo!
3 Tusi Lou Igoa e Avea ma Paeonia Lagolago ia Aperila: Na faataatia e le aposetolo o Paulo se faaaʻoaʻoga mataʻina mo i tatou i lona faapea mai: “Ou te le manatua se tasi mea, o loʻu lava ola foi ou te le naunau i ai, seʻi ou faauma loʻu momoʻe ma le olioli, atoa ma le faiva ua ou maua mai le Alii o Iesu, ou te molitino [“molimau māeʻaeʻa,” NW] atu le tala lelei o le alofa tunoa o le Atua.” (Galu. 20:24) Ua ia i tatou lea lava faaeaga o le avatua lea o se molimau māeʻaeʻa e uiga ia Ieova le Atua. I lena itū, o le a tatou mananaʻo ai tatou te avea Aperila ma masina aupito sili ona mataʻina i le galuega o le paeonia lagolago!
4 Ona e lima faaiʻuga o vāiaso, o le a avea ai Aperila 2000 ma masina e aupito sili ona lelei mo le toʻatele o tagata e paeonia lagolago ai. I tuā ia Mati 1997, ina ua tatou ausia la tatou tumutumuga aupito sili ona maualuga o paeonia lagolago i Samoa, o le toʻa 98 o ē na auai na fai ma sui o le 28 pasene o le aofaʻiga atoa o le ʻautalaʻi. I le lua ma le ʻafa tausaga mulimuli ane, na faateleina ai le aofaʻi atoa o le ʻautalaʻi na lipotia mai ia Aokuso 1999 i le silia ma le 12 pasene. O le uiga o lenei mea, e matuā telē le avanoa mo i tatou e faasili atu ai i lo tatou tumutumuga talu ai o paeonia lagolago. E lē gata i lea, talu mai lena taimi na faaitiitia ai itula manaʻomia, ua mafai ai e le toʻatele i le faapotopotoga ona auai i lenei vala o le auaunaga. E manaʻomia e tagata talaʻi taʻitoʻatasi ona manatunatu faatasi ma le tatalo pe e mafai ona ia paeonia lagolago i lenei masina o Aperila.
5 I le faaaogāina o le masina o Aperila i le 2000 Calender, ia fuafua nei lau faasologa mo le masina o sosoo mai. Filifili po o fea aso o le a mafai ai ona e auai i le auaunaga i le fanua, ma faaopoopo itula uma e te lagona e mafai ona e tuuina atu i le galuega talaʻi a o faagasolo le masina. Ia faaaofia ai ma taimi e mafai ona e faaaluina e molimau fuafuaina pe lē fuafuaina atu ai i isi. Po o le a tai atoa ai le aofaʻiga o itula manaʻomia e 50 mo paeonia lagolago? Afai e te lē ausia itula manaʻomia, pe e mafai ona e faia nisi fetuunaʻiga i lau faasologa ina ia faaavanoa le taimi e paeonia lagolago ai? E manaʻomia ona e faaalu se faatatauga e tusa ma le tasi le itula ma le 40 minute i aso taʻitasi ina ia ausia ai le 50 itula mo le masina.
6 Ona o lea foʻi ua faaitiitia itula manaʻomia mo paeonia sauatoa, po o e manatunatu e ulu atu i le faiva faataimi atoa? Aiseā e te faatali ai seʻi oo i le tau māfanafana ona amata lea? Ona o lea ua faatoʻā uma le vaitau o timuga, o le a avea Aperila ma masina lelei e amata ai! Afai e te lē o mautinoa pe e te mafaia ona ausia le 70 itula manaʻomia mo paeonia sauatoa, aiseā e lē paeonia lagolago ai ia Aperila ae faataatia le 70 itula e fai ma ou sini? Afai e te iloa e mafai ona e faia, atonu o le a sili atu ona e naunau e talosaga atu ina ia auai i le muāʻau a paeonia sauatoa i le vave e mafai ai.—Tagaʻi i le Our Ministry, itūlau e 113-114.
7 Faia Atoatoa se Sao e Avea o se Tagata Talaʻi o le Tala Lelei: Mo i tatou uma lava, le ʻautalaʻi faapea paeonia, o lo tatou alofa moni mo le Atua ma tuāʻoi ua uunaʻia ai i tatou e faia mea uma tatou te mafaia ma le loto atoa i le auaunaga a Ieova e tusa ai ma o tatou tulaga tōtino. (Luka 10:27) E tatou te faailoa atu ai i lea e “tatou te galulue ma finafinau ai, auā tatou te faamoemoe i le Atua soifua, o ia o le Faaola o tagata uma, aemaise lava o e ua faatuatua.” (1 Timo. 4:10, LF) O le māfuaʻaga lena e ao ai ona tatou faatalitalia le vaʻaia o se sao atoatoa e 100-pasene ia Aperila, faatasi ma le faia e tagata uma o se sao atoatoa i le galuega o le Malo.
8 Seʻi aua neʻi o tatou faagaloina le apoapoaʻiga a Iesu: “E tele le saito e seleseleina, a o le au fai galuega e toaitiiti ia; o lea ia outou aioi atu ai i le Alii e ana le saito e seleseleina, ina ia aauina mai e ia ni e galulue i lana saito e seleseleina.” Ina ua uma loa ona fetalai atu i nei mea, ona talo loa lea e Iesu ona aposetolo e toʻa 12 ma aauina atu i latou e talaʻi. (Mata. 9:37, 38; 10:1, 5, 7) Pe tusa ma se tausaga mulimuli ane, ina ua uma ona toleniina lelei e Iesu le toʻa 12 i le galuega talaʻi, sa ia “tofia . . . nisi e toafitugafulu, ua aauina atu o i latou,” i le tuuina atu ia i latou o na lava faatonuga e faapea: “E tele le saito e seleseleina, . . . o lea ia outou aioi ai i le Alii e ana le saito e seleseleina, ina ia aauina mai e ia ni e galulue i lana saito e seleseleina.” (Luka 10:1, 2) Ua lipotia mai e le tusi o le Tusi Paia o Galuega le auala na tali atu ai Ieova i na tatalo. E oo atu i le Penetekoso o le 33 T.A., ua faatuputeleina le aofaʻi o soo pe tusa ma le 120. Ona iai lea ma tumutumuga sosoo na ausia, e 3,000 ma le 5,000 o soo. (Galu. 1:15; 2:41; 4:4) Ina ua mavae lena, sa “matuā faatoateleina le au soo.” (Galu. 6:7) E faapena foʻi i aso nei, e tatau ona tatou ʻaiʻoi atu pea i le Alii mo nisi tagata talaʻi o le Malo! Ina ia ōgatusa ma a tatou tatalo, e ao i tagata talaʻi taʻitoʻatasi i faapotopotoga ona faia ni fuafuaga maʻoti ina ia auai i le faiva i masina uma.
9 Faamolemole seʻi toe tagaʻi lelei ane ia Aperila i le 2000 Calendar. Talu ai o uluaʻi aso e lua o le masina e paʻū i le Aso Toonaʻi ma le Aso Sa, pe mafai la ona e fuafua e faia se sao i le auaunaga i lena faaiʻuga o le vāiaso, e vave amata ai i le masina? Pe e mafai ona e lagolagoina “Aso Mekasini” uma o le masina faatasi ma lau vaega o Suʻesuʻega Tautusi a le Faapotopotoga? Ae faapēfea le faaaluina o se itula pe sili atu foʻi i Aso Sa taʻitasi i le faiva? Pe e mafai ona e fuafua e faia se sao i le molimau atu i afiafi? Ma aua neʻi galo e faaaogā avanoa uma e te maua e molimau atu ai lē fuafuaina i le galuega, i le aʻoga, po o le faia foʻi faapea a o faia nisi mea i lea aso ma lea aso. Faailoga aso na e mafai ona e faaalu ai se taimi i le faiva, ma faaaogā le kalena e faamaumau ai itula o lau auaunaga mo le masina.
10 O le a avea Aperila ma taimi talafeagai mo i latou uma o ē ua agavaa ma ua faamaonia e toeaina ina ia amata ona auauna o ni tagata talaʻi e leʻi papatisoina. Afai o e suʻesuʻeina le Tusi Paia ma se tasi, po ua lava le agaʻigaʻi i luma o lena tagata e talanoa atu ai i le ovasia taʻimua e talosaga atu i ai ina ia avea o se tagata talaʻi o le tala lelei? Afai o iai sau fanau e leʻi papatisoina, po ua e talanoaina lo latou agaʻigaʻi i luma faaleagaga ma le ʻautoeaina? Pe e lē o se taimi lelei ea lenei mo i latou e amata ai ona talaʻi atu?—Tagaʻi i le Our Ministry, itūlau 97-100.
11 Ia tatou taumafaiga e avea Aperila 2000 ma masina aupito sili ona mataʻina, e manaʻomia ai e i tatou uma ona faia se sao i le faiva, ona tuuina atu lea o a tatou lipoti mo le auaunaga i le fanua i le faaiʻuga o le masina. (Faatusatusa i le Mareko 6:30.) O tagata talaʻi fou e leʻi papatiso e auai i le auaunaga i le fanua mo le uluaʻi taimi, e ao ona faalāʻeiʻau i ai ina ia vave ona tuuina atu a latou lipoti o le auaunaga. O le faia o la tatou vaega, ua tatou faia ai se sao lelei i le lipoti o Aperila faapea ma le alaga sili o viiga o le a ofoina atu ia Ieova e ala i a tatou taumafaiga e molimau atu.
12 Aumai Isi Faatasi ma Oe i le Faamanatuga: Pe e lē o se mea ea tatou te fiafia ai i le vaʻai atu i se tumutumuga fou o tagata o le a auai i le Faamanatuga o le maliu o Keriso i le tausaga e 2000? Ioe! O le uiga o lena mea, o le a pito i toʻatele tagata i se tulaga sa leʻi faapea ona iai muamua o le a aufaatasi mai e faaalia lo latou talisapaia mo le faaaliga aupito sili o le alofa ua faia e Ieova le Atua ma Iesu Keriso ona o i tatou! (Ioa. 3:16; 15:13) Ia faia po o ā lava ni fuafuaga e manaʻomia ona fai ina ia leai se mea e taofia ai oe ma lou ʻāiga mai le auai i le Faamanatuga.
13 O le taimi foʻi lenei e amata ai ona valaʻaulia isi tagata i le Faamanatuga. Fai se lisi o tagata uma e te manaʻo e te vaʻai atu o auai. Ia faaaofia ai ma so o se tasi o ē sa suʻesuʻeina le Tusi Paia i aso ua mavae, i latou o loo suʻesuʻe i le taimi nei, ma au toe asiga uma. Ia faaopoopo i le lisi i latou tou te masani i le galuega, i le aʻoga, ma tuāʻoi, faapea ma tagata uma tou te fai pisinisi faatasi. Aua neʻi galo ona faaaofia ai ma isi tou te masani ma ou tauʻāiga. Pe a uma ona tusi lau lisi, ona amata loa lea ona e valaʻaulia ma le māfana i latou taʻitoʻatasi. Ia faamanino i ai po āfea ma o fea o le a fai ai le Faamanatuga. A o lalata mai Aperila 19, ona faamanatu lea ia i latou o i lau lisi le aso ma le taimi o le Faamanatuga pe e te alu i ai ia pe telefoni i ai. Fai i ai tou te ō faatasi i le Faamanatuga i lena po.
14 I le ōgatasi ma taʻiala ua uma ona tuuina mai e le Sosaiete, o le a faia e le ʻautoeaina se taumafaiga faapitoa ina ia faalāʻeiʻau tagata talaʻi uma ua lē o toe talaʻi i le oganuu ina ia auai i le Faamanatuga. (Mata. 18:12-14) O le a naunau le ʻautoeaina e autalu le tusi a le Sosaiete o Fepuari 2, 1999. O le failautusi o le faapotopotoga na te faia se lisi o tagata talaʻi uma ua lē o toe talaʻi, ona tofia lea e le ovasia o le auaunaga ni toeaina e asia i latou ma valaʻaulia i le Faamanatuga. Atonu o le vave oo atu i ai o se asiasiga faaleoleo mamoe faalāʻeiʻau, e mafai ai ona fesoasoani i nei tagata talaʻi ua lē o toe talaʻi ina ia toe tiotio i le faia o se sao i le faiva i le fanua e tusa lava po ua oo ia Aperila. O le a avea o se mea e atiina aʻe ai i latou le valaʻaulia ina ia faia se sao faatasi ma se tagata talaʻi tomai i le auaunaga i le fanua.
15 Faalāʻeiʻau le Lagolagosua Atoatoa o Aperila! E tatau i toeaina, auauna o le faiva ma ulu o ʻāiga ona felagolagomaʻi lelei ina ia tatou avea Aperila 2000 ma masina e aupito sili ona mataʻina. O le a filigā toeaina i le faamaopoopoina lelei o mea uma ma i le avea o ni taʻimua. (Epe. 13:7) E manaʻomia ona faia ni fuafuaga talafeagai mo faatasiga o le auaunaga i le fanua i aso o le vāiaso ma faaiʻuga o vāiaso. E mafai foʻi ona fuafuaina nisi faatasiga faaopoopo mo le auaunaga i afiafi ma afiafipo. O se faasologa atoa o fuafuaga uma mo Aperila, e tatau ona faapipii i luga o le laupapa o faasilasilaga. E manaʻomia ona tofia se tasi e taulimaina ia faatasiga o le auaunaga taʻitasi ua fuafuaina. E tatau foʻi ona saunia ma le talafeagai se oganuu ina ia lava mo manaʻoga o vaega taʻitasi.
16 Ia Aperila, o le a faatomua ai le mekasini o Le Olomatamata ma le Ala Mai! I se taumafaiga e amataina ni suʻesuʻega faale-Tusi Paia i ʻāiga, e tatau ona ofoina le polosiua o le Manaomia ia i latou uma e faaalia le naunau. I lea, e manaʻomia ai ona lava ma totoe se sapalai o mekasini ma polosiua.
17 I le faaiʻuga o le masina, o le a manaʻomia i faisuʻesuʻega uma o suʻesuʻega tautusi ma o latou fesoasoani ona faalāʻeiʻau tagata taʻitoʻatasi i a latou vaega ina ia tuuina atu vave se lipoti o le auaunaga pe a uma le masina. Atonu e mafai lava ona faia foʻi lenei mea i le Aso Sa, Aperila 30. A oo loa i le taimi e faitau ai e le failautusi ia lipoti, ma afai e na te mātauina ai nisi o tagata talaʻi e leʻi tuuina atu a latou lipoti, e mafai ona ia faamanatu atu ma le agalelei ia i latou ina ia faia faapea a o leʻi oo ia Me 6 o le aso lea e tatau ona ia auina atu le lipoti a le faapotopotoga i le Sosaiete. E mafai ona ia talosaga atu i faisuʻesuʻega o suʻesuʻega tautusi ina ia fesoasoani atu ia te ia i le faafesootaʻia o tagata talaʻi taʻitoʻatasi.
18 O le vaitaimi o le Faamanatuga, o le taimi sili lea ona tāua o le tausaga mo tagata o le Atua. E ao ona avea o se taimi matuā pisi mo i tatou uma i le auaunaga a Ieova. O le a faapena pe afai e auai atoatoa tagata uma i le faia o le mea e mafai i le avea o ni tagata talaʻi o le tala lelei, pe afai e mafai ona faia faapea e i latou e fia tusia o latou igoa e avea o ni paeonia lagolago, ma pe afai e tatou te filigā e aumaia isi faatasi ma i tatou i le Faamanatuga o le maliu o Keriso. Seʻi o tatou tatalo faatauanau mo faamanuiaga e tele a Ieova a o tatou taumafai ia avea Aperila 2000 ma masina aupito sili ona mataʻina, i le viiviia ma faamamaluina ai o Ieova!—Epe. 13:15.
[Faamatalaga faaopoopo i le itulau 3]
Paeonia Lagolago
Tumutumuga Sili mo Samoa: 98
(Mati 1997)
Tumutumuga Sili mo Amerika Samoa: 44
(Aperila 1998)
[Pusa i le itulau 4]
Aofaʻi o le ʻAutalaʻi
Tumutumuga Sili mo Samoa: 399
(Aokuso 1999)
Tumutumuga Sili mo Amerika Samoa: 204
(Fepuari 1993)
[Pusa i le itulau 4]
Ē na Auai i le Faamanatuga
Tumutumuga Sili mo Samoa: 1,406
Tumutumuga Sili mo Amerika Samoa: 659
(Atunuu uma e lua: 1997)