E Aogā Sauniga mo Tagata Talavou

¹ Na taʻua e se teine talavou e faapea: “I nisi taimi, ou te manatu ai e sili atu ona faigatā le olaga o tagata talavou. O loo siʻomia i tatou e tagata o loo faia le faitaaga, faaaogā fualaau faasāina, ma inu ʻava malosi.” Po o lou lagona ea lena? Afai o lea, o le ā e te manatu e mafai ona fesoasoani ia te oe e tau faasaga i nei taʻaiga leaga? E te manaʻomia le faatuatua, le faatuatua malosi i le moni aʻiaʻi o ala o Ieova, auā a aunoa ma lea “e le mafai ona fiafia mai o ia.” (Epe. 11:6) O le auai i sauniga a le faapotopotoga o le a fesoasoani ia te oe e faamalosia ou talitonuga faa-Kerisiano ma maumauaʻi ai e ʻalofia mea leaga.

² E Tele Mea e Ofo Atu e Sauniga ia te Oe: O le ā le mea e mafai ona aumaia ai le olioli i se taumafataga manaia ma ni au uō mamae? Pe e lē o le tele ea o meaʻai lelei faapea ma se faatasiga fiafia i se siʻomaga toʻafilemu? Ia e ofoina atu foʻi e a tatou sauniga ia se lagona fiafia faapena, ae i se uiga faaleagaga.

³ O mea o loo talanoaina i sauniga e ati aʻe ai, e amata mai lava i mataupu tau i faafitauli o le olaga i aso faisoo e oo atu i le suʻesuʻeina o valoaga ofoofogia o le Tusi Paia. E aumaia ai faatonuga aogā e aʻoaʻo ai oe pe faapefea ona e ola i le auala aupito sili ona lelei o le olaga ma le faafetaiaʻia o luʻi o loo fesagaʻi ma oe. O aumea o loo maua i sauniga o aumea aupito sili ia e lē maua i so o se mea, ma e matagofie ma saogalemu le siʻomaga faaleagaga. (Sala. 133:1) E lētioa ona faapea mai se tasi talavou: “Ou te alu i le aʻoga i le aso atoa, ma e matuā omia ai lava aʻu. Ae o sauniga ua pei o se laufanua lauolaola i le toafa e mafai ona faafouina ai aʻu ina ia ou aulia ai le isi aso aʻoga e sosoo ai.” Na faapea mai se isi talavou: “Ua ou iloa o le auaumea vavalalata ma isi e alolofa ia Ieova ua fesoasoani ia te aʻu e tumau ai ona latalata atu ia te ia.”

⁴ O le tusia o le igoa i le Aʻoga o le Faiva Faatiokarate, ua e iloa ai ona aoaoina mai ia faamatalaga faale-Tusi Paia, ma faia aʻe ai se lauga, ona fai atu lea i se auala faatalanoa i se aofia i le Maota o le Malo. Seʻi manatu i le aogā o le toleniina ina ia aʻoaʻo atu ma le tomai upu moni faasaoola o le Afioga a le Atua! O fea se isi mea e mafai ona maua ai e tagata talavou sea toleniga tāua?

⁵ Le Auala e Maua ai Mea e Tele Mai Sauniga: Ina ia maua aogā sili mai sauniga, e tolu lava mea e matuā tāua o loo aofia ai. O nei mea, o sauniuniga, faia o se sao, ma le faatatauina, po o le faatinoina.

⁶ Sauniuni mo Sauniga: Faataatia ese e lē aunoa se taimi e sauniuni ai mo sauniga. Aua le faatagaina se galuega a le aʻoga, se galuega faavaitaimi, po o faafiafiaga e fāoa le taimi lea e te manaʻomia e autalu muamua ai le mataupu lea o le a talanoaina i sauniga taʻitasi. E aogā le iai o se faasologa masani. O le mea muamua ma e aupito sili, e tatau ona tausisia le faasologa o le faitau Tusi Paia faalevaiaso o le Aʻoga o le Faiva Faatiokarate. E na o sina taimi puupuu lava i aso taʻitasi e faitau ma mafaufau loloto ai i mataupu ua uma ona faatulagaina mo le faitau tusi. Ia faatulagaina ese se taimi e sauniuni ai mo le Suʻesuʻega Tautusi a le Faapotopotoga ma le Suʻesuʻega o Le Olomatamata. O nisi e faia faapenei i le tasi pe lua o ni aso a o leʻi oo i na sauniga. I le tele e mafai ai, ia fai foʻi faapena i isi vaega ia ua faatulagaina mo le Sauniga o le Auaunaga i vaiaso taʻitasi.

⁷ Ia Faia se Sao i Sauniga: Ua faapea mai le Tusi Paia, i le 12 o tausaga o Iesu, na maua atu ai o ia i le malumalu, o faalogologo, tuufesili, ma avatu foʻi ni tali. (Luka 2:46, 47) I se isi faaupuga, sa matuā aafia atoatoa ai o ia. O le a e maua atili aogā mai sauniga pe a e taumafai e fai ai sou sao.—Faata. 15:23.

⁸ Muamua lava, e manaʻomia ona e uaʻi totoʻa atu i mea o loo aʻoaʻoina atu i sauniga. I nisi taimi, e sili atu ona faigatā le faalogologo atu i se lauga na i lo o le faia o se lauga. Aiseā? Auā e ono tafaofao solo lou mafaufau a o talanoa mai se isi tagata. E mafai faapefea ona e faafetaiaʻia lenei mea? I le faia o ni faamaumauga. Ia tusi i lalo manatu tāua o le a e manaʻo e te uaʻi mulimuli atu iai. O le faia o faamaumauga o le a fesoasoani ia te oe e taulaʻi atu ai pea lou mafaufau i le polokalame. E lē gata i lena, suʻe mau, ma mulimuli iai a o faitauina e le failauga.

⁹ E lē gata i lea, ia avea foʻi ma se sini le faia o se sao i talanoaga e faia i fesili ma tali i sauniga. O le a sili atu ona e maua ai aogā pe a e mafaufau lelei i faamatalaga e te fia taʻua. Fai mai le Faataoto 15:23: “O loo i ai le fiafia i le tagata i le tali atu a lona gutu.”

¹⁰ Faatino Mea ua E Aʻoaʻoina: O le laasaga mulimuli, o le faamautinoa lea ‘ua matuā galue foi lea i totonu ia te oe’ mea ua e aʻoaʻoina. (1 Tesa. 2:13) A o e faatatauina manatu lelei ua e aʻoaʻoina i sauniga taʻitasi, o le a atili ai ona e tosina vavalalata atu ia Ieova le Atua. O le a moni ai o ia ia te oe, ma o le a e tofo ai i le olioli sili ma le lotomalie a o faaauau ona e ‘savali i le upu moni’ ma fai mo oe le upu moni.—3 Ioa. 4.

¹¹ Uso ma tuafāfine talavou e, a o e sauniuni e lē aunoa mo sauniga, ia faia ai sou sao, ma ia faatino mea ua e aʻoaʻoina, o le a e olioli atoatoa ai i sauniga. I le taimi lava e tasi, o le a e maua ai aogā uma e mafai ona e maua mai ai i na sauniga. O le a faamalosia ai lou faatuatua, faapea foʻi ma lau faaiʻuga ina ia tumau ona faamaoni i lou Tamā faalelagi, o Ieova.—Sala. 145:18.