Le Auala e Maua Atili ai le Olioli Mai Sauniga
1 O sauniga e matuā tāua lava mo lo tatou lelei faaleagaga. O le olioli lea tatou te maua mai sauniga, e fesootaʻi tuusaʻo atu lava i mea e tatou te faia i le taimi a o leʻi amataina, a o faia, ma pe a maeʻa sauniga. E mafai faapefea ona tatou fesoasoani ia i tatou lava faapea ma isi ina ia tumau pea ona olioli i le auai i sauniga i se tulaga e sili ona maualuga?
2 A o Leʻi Amataina Sauniga: O le sauniuni o le a maua ai ni āuga tuusaʻo i le olioli lea tatou te maua mai sauniga. Pe afai tatou te sauniuni lelei, e sili atu lo tatou naunau e uaʻi atu ma faia se sao. E lē gata i lea, e so o se tofiga lava e tuuina mai ia i tatou i sauniga, e tatau ona sauniunia lelei, faatasi ma ni sini ina ia faaoo atu faamatalaga i se tulaga saʻo lelei e tusa ai ma faatonuga ma ia uaʻi mai ai le naunau o le aofia. E tatau ona faataʻitaʻi lelei a tatou vaega. Pe a faia so tatou sao ina ia olaola sauniga ma atiina aʻe ai ma aogā mo tagata uma, o le a iloa ai lo tatou agaʻigaʻi totino i luma ma sili atu ona tatou olioli ai.—1 Timo. 4:15, 16.
3 A o Faia Sauniga: O le faia o ni tali i sauniga, e mafai ona fesoasoani ia i tatou e fiafia atili ai i sauniga. O vaega ia e manaʻomia ona faia ai se sao o le aofia, e tatau ona manatu i ai o ni tofiga totino mo tagata uma i le faapotopotoga. O tali e saʻo ma tuusaʻo i le manatu, e masani lava ona sili ona aogā. O le faamatala puupuu atu o ni mea lelei na tutupu e mafai ona matuā faalaeiʻauina ai ma faagaee ai, ma e ao ona tatou mataala ina ia faaaofia ai nei mea i so o se taimi e talafeagai ai i le polokalame. (Faata. 15:23; Galu. 15:3) Pe a taulimaina se vaega i le sauniga, e tatau ona tatou tautala atu ma le aasa ma le mautinoa, ia faia o se tala e faaoso naunau, o se mea moni, ma e aogā.
4 Pe a Maeʻa Sauniga: O le feofoofoaʻi o upu agalelei ma isi, se faafeiloaʻiga faaleuō, ma ni nai manatu autū sa talanoaina i sauniga, o le a aogā mo i tatou uma. O le faaalia o lo tatou fiafia i le vaai atu i ē talavou, o ē matutua, ma ē fou o faia se sao, e faalolotoina ai le alofa faaleuso. Na i lo le tautala faitio i nisi atonu na misia sauniga, e tatau ona tatou faamatala atu ia i latou le olioli ua tatou maua mai le auai i sauniga, o iinā o le a faamalosiʻau ai ia i latou ina ia auai.—Epe. 10:24, 25.
5 Aua neʻi taofia i tatou mai lenei sauniuniga sili ona tāua mo le faia ai o ni feofoofoaʻiga o faalaeiʻauga. (Roma 1:11, 12) O le faia ma le matuā faaeteete o taumafaiga faamaoni uma, e mafai ai e i tatou uma ona faatumauina le olioli i le auai i sauniga faa-Kerisiano.