Po o E Mauaina ai e Oe Lava ni Aogā?
1 E faitau miliona tagata i aso nei o loo mananaʻo e fia iloa se auala e foʻia ai faafitauli ma olioli ai i ni olaga fiafia. Latou te matuā fiafia e saʻili atu i tusi taʻiala, pe vaavaai atu i ni vaega o ni tagata ma faalapotopotoga mo ni fautuaga i le auala e faaleleia ai o latou olaga. Atonu e faasino atu nisi i ni aogā e gata mai ua latou maua. Peitaʻi, i le faatusatusa atu i le tulaga o le olaga i aso nei, po o maua ai ea e tagata lautele se olaga olioli i le filemu, ma le matuā lotomalie e ala i polokalame a tagata e aumaia ai faatonuga? E matuā leai lava!—1 Kori. 3:18-20.
2 I le isi itu, ua saunia e Lē na Foafoaina i tatou se polokalame e maua fua o faatonuga e sili atu ona aogā mo i latou uma o le a faalogo. E finagalo Ieova ina ia maua e tagata uma ia aogā mai ana aʻoaʻoga. Ua ia saunia ma le limamafola lana Afioga faagaeeina ina ia taʻitaʻiina ai le fanau a tagata i le amio saʻo, ma ua ia faia foʻi ina ia faalauiloaina atu i le lalolagi atoa le tala lelei o lona Malo. (Sala. 19:7, 8; Mata. 24:14; 2 Timo. 3:16) O se olaga e fiafia moni lava, ua fesootaʻi saʻo atu ma le uaʻi totoʻa atu i poloaʻiga a Ieova.—Isa. 48:17, 18.
3 E sili mamao atu taʻiala a Ieova i lo taʻiala o loo aumaia i tusi po o taumafaiga ua ofoina mai e le lalolagi e faaleleia ai olaga o tagata. E mafai ona tatou maua le fesoasoani moni ma aogā tumau pe a tatou faaaogā atoatoa sauniuniga a Ieova na o loo faatulaga mai i lana Afioga ma aʻoaʻoina e lana faalapotopotoga.—1 Pete. 3:10-12.
4 Aogā e Mauaina e Oe Lava Mai Sauniga a le Faapotopotoga: I aso nei, ua faaalia ai e Ieova le naunau moni i le aʻoaʻoina o i tatou i ona ala, ma e tatou te maua ai aogā e ala i le uaʻi totoʻa atu i ana faatonuga. O a tatou sauniga faalevaiaso e lima ua faamaonia ai le manatu alofa mai o Ieova. Pe a tatou auai i sauniga a le faapotopotoga, e faateleina ai lo tatou poto e uiga i le Atua. Ua tatou aʻoaʻoina le auala e puipuia ai i tatou mai mea leaga e ala i lo tatou faalatalata atu ia Ieova. I lenei auala e faagaeetia ai o tatou agaga.
5 E iai foʻi ma isi mea. I sauniga a le faapotopotoga o le a mafai ai ona “faateleina atu” i tatou. (2 Kori. 6:13, LT) E aofia ai i lenei mea le taumafai ina ia iloa lelei isi i le faapotopotoga. E tatou te maua aogā mai le feofoofoaʻi o faalaeiauga, e pei o ia na tusi atu ai le aposetolo o Paulo i lana tusi i Kerisiano i Roma. (Roma 1:11, 12) Ina o tusi atu i Kerisiano Eperu, sa ia apoapoaʻi malosi atu ia i latou o ē atonu ua fai ma masani ona lafoaʻiina ia aufaatasiga faa-Kerisiano.—Epe. 10:24, 25.
6 O le mauaina o le olioli ma le lotomalie i le olaga ua fesootaʻi saʻo atu lava ma le faaalia o le naunau mo le lelei o isi. Ua faalaeiauina i tatou ina ia saʻili i ni auala e saosaolaumea ai i le mauaina e isi o le fiafia. O lea la, o a tatou sauniga faa-Kerisiano, e mautinoa e mo lo tatou lava lelei totino ma e aogā foʻi ia i latou o ē o loo tatou faia aʻe ai se aufaatasiga mamā faaleuso. O le mea o loo manaʻomia mai ia i tatou, o lo tatou auai ma le lotoatoa.
7 E faapena foʻi le manatu o le aposetolo o Paulo i lana fautuaga ia Timoteo ina ua ia tusi atu e faapea: “Ia e faamasani i le amio Atua.” (1 Timo. 4:7) E mafai ona tatou fesili ifo ia i tatou lava: ‘Po o oʻu toleniina aʻu lava? Po o oʻu aʻoaʻoina ina ia maua aogā mai mea o loo ou faalogo i ai i sauniga a le faapotopotoga?’ O le a tatou tali atu ioe pe afai tatou te uaʻi totoʻa atu i mea o faalogo i ai i sauniga ma taumafai e faatatauina mea ua tatou aʻoaʻoina. I mata o le faatuatua, e tatau ona tatou vaai e lē i uso o loo aʻoaʻoina i tatou, ae ia Ieova o Ia o le Faiaʻoga Sili o ona tagata.—Isa. 30:20.
8 Aʻoga o le Faiva Faatiokarate ma le Sauniga o le Auaunaga: Ua fuafuaina nei sauniga e lua e fesoasoani ai ia i tatou ina ia uigā i le faiva faa-Kerisiano. O le fuafuaga tonu lava lena o le Aʻoga o le Faiva Faatiokarate—o se aʻoga ma ni tagata aʻoga o ē e maua pea e lē aunoa faatonuga ma fautuaga. Ua e maua ai le avanoa e faatino ai lou agaʻigaʻi i luma e avea o se failauga mo le lautele ma o se faiaʻoga o le Afioga a le Atua. Ae ina ia maua mea sili mai le aʻoga, e tatau ona tusia ai lou igoa, auai, faia se sao e lē aunoa, ma ia tuu atu atoatoa lou loto i ou tofiga. O lou talia ma faatatauina o fautuaga e aumaia o le a fesoasoani ia te oe i lou agaʻigaʻi i luma.
9 O le Sauniga o le Auaunaga e aʻoaʻo ai i tatou i le tāua o le faiva faa-Kerisiano ma faailoa mai ai ia i tatou le auala e mafai ona tatou faia ai se sao i le galuega o le faia o soo. Po o e maua atoatoa ma lou aiga aogā mai mea o loo saunia mai i nei sauniga e lua? Ua faamatalaina e se ulugalii Kerisiano e faapea: “I se tasi Sauniga o le Auaunaga, na ma faalogo ai e faapea, e tatau ona tatou talanoaina le mau i aso taʻitasi i le avea o se aiga. E matou te leʻi faia lena mea, ae i le taimi nei o lea ua matou faia.” Na faapefea ona maua ai e i latou lava aogā? Ua la faapea mai: “Ua matou iloa ai o a matou talanoaga i le laulau i le taimi o le taumafataga, ua avea o se mea e sili ona fiafia ai. Ua lē toe iai ni fefinauaʻiga i le taimi o le taumafataga.” Pe sa maua ai ni aogā i sauniga e oo lava i la la fanau laiti? Ioe. Ua faaopoopo mai le tinā: “E manino mai lava le matuā aafia ai o la ma fanau i sauniga. I se tasi vaiaso na ma iloa ai la ma tama e ono tausaga o faia ni tala pepelo. Ae i le lauga e aʻoaʻo ai i le sauniga i lena vaiaso, sa faatatau i le pepelo. I le faaalia o ona foliga nofosala, na tilotilo atu ai la ma tama i lona tamā ma mimigi i lalo i luga o lona nofoa. Na aʻoaʻoina lana lesona, ma e leʻi toe iai lava ni o matou faafitauli ina ua uma lena mea.”
10 Fai mai se tuafafine paeonia ua fiafia lava o ia ona o le aumaia o fautuaga i le Sauniga o le Auaunaga e faaleleia ai la tatou faiva. Aiseā? Ua ia faamatala mai e faapea: “Ua ou masani lava aʻu i auala sa iai. I nisi taimi, ou te manatu ai e faapea o le a lē aogā mea ia o loo fautuaina mai i La Tatou Faiva o le Malo. Ae i le Sauniga o le Auaunaga, a ou faalogo atu o faapea mai e tatau ona tatou taumafai e faataʻitaʻi mea na, sa ou lagona le matuā naunau i le fia faatinoina o fautuaga. Na avea o se mea e matuā olaola ai le faiva!” Ina ua mavae ni nai vaiaso talu ona faatatauina le fautuaga ina ia taumafai e amata se suʻesuʻega faale-Tusi Paia i le uluaʻi asiasiga, na ia amataina ai se suʻesuʻega i le uluaʻi asiasiga ma se teine o lē sa tatalo mo se fesoasoani.
11 Pe a e faalogo i se lauga o loo faaaofia ai se fautuaga mai le Tusi Paia e uiga i filifiliga totino e te faia, pe e logo i ou tino o Ieova lea o loo fetalai tuusaʻo mai ia te oe? O le lagona lena sa iai i se uso. Na faapea mai o ia: “Talu ai nei lava i se tasi sauniga, sa iai se lauga na talanoaina ai e se uso po o ā ituaiga o faafiafiaga e tatau ma o ā ituaiga e lē tatau mo Kerisiano. Sa masani lava ona ou fiafia e matamata i faipelega i le televise. Ae ina ua uma lena sauniga, na ou iloa ai o lenei ituaiga o faafiafiaga e lē talafeagai mo Kerisiano. O lea ou te lē o toe matamata ai lava.” Ioe, e ui lava sa naunau fiafia lenei uso e matamata i se mea na faia ai faiga sauā, ae sa ia tali atu ma le lotomaulalo i le taʻitaʻiga a Ieova.—Sala. 11:5.
12 Sauniga mo le Lautele, le Suʻesuʻega o Le Olomatamata, ma le Suʻesuʻega Tautusi a le Faapotopotoga: O lauga lautele ia tatou te faalogo i ai i vaiaso taʻitasi o loo faaaofia ai le tele o mataupu eseese mai le Tusi Paia. O ā mea o e maua mai nei lauga? Na faamatala mai e se tasi tane Kerisiano aogā na ia maua mai ai: “O le tasi lauga lautele na faamatilatila mai ai fua uma o le agaga. Na taʻua e le failauga e faapea, e faatatau ia te ia lava, ina ia galue i le atiina aʻe o nei fua, e na te filifilia ai se uiga patino se tasi ma galue agaʻi i ai mo se vaiaso. I le faaiʻuga o le vaiaso, e na te toe manatunatu ai i tua pe na faapefea ona ia faaalia lena fua i ana gaoioiga i aso taʻitasi. Ona ia toe galue foʻi lea i se isi uiga mo le isi vaiaso. Sa ou fiafia i lena manatu ma sa amata loa ona ou faia e aʻu lava lena mea.” Maʻeu se faatatauina lelei o mea na aʻoaʻoina!
13 O le Suʻesuʻega o Le Olomatamata ua aʻoaʻoina ai i tatou e faatatauina mataupu silisili o le Tusi Paia i vala eseese o le olaga. Ua fesoasoani lenei mea ia i tatou ina ia tausisia le toʻafilemu o mafaufau ma loto e ui i popolega o le olaga. O le Suʻesuʻega o Le Olomatamata foʻi ua faaauiluma ai lo tatou agaʻigaʻi i luma e tusa ma le malamalamaga auiluma o le upu moni. Mo se faaaʻoaʻoga, pe na tatou leʻi maua ea ni aogā mai le suʻesuʻega o mataupu o Le Olomatamata o Me 1, 1999, ua faaulutalaina: “E Ao Ona Taunuu o Nei Mea,” “Ina Iloa ia e Lē Faitau,” ma le “Ia Mataala ma Finafinau!” Na faapefea ona aafia totino ai oe i nei suʻesuʻega? Po o faaalia i au gaoioiga o loo e teulotoina le lapataʻiga a Iesu e uiga i le lumanaʻi? Po o e sauniuni ea mo tofotofoga o loo i luma pe a tatou iloa “le mea e inosia e faatafunaina aʻi, . . . ua tu i le mea paia”? (Mata. 24:15-22) Po o faaalia i ou sini ma ala o le olaga lena mea, e lē o le faaputuina o mea faitino ae o le faapaiaina o le suafa o Ieova o le mea aupito sili lena ona tāua ia te oe? I le Suʻesuʻega o Le Olomatamata, pe tatou te lē o aʻoaʻoina ai ea ina ia maua e i tatou lava aogā i le taimi nei?
14 Manatu i le tele o mea ua tatou aʻoaʻoina mai i le Suʻesuʻega Tautusi a le Faapotopotoga i vaiaso taʻitasi. I le taimi lenei o loo tatou suʻesuʻe e faatatau i lo tatou faaaʻoaʻo, o Iesu Keriso, i le tusi o Le Tagata Silisili o Ē Uma na Soifua Mai. I le valu masina na tatou suʻesuʻeina ai lena tusi, pe tatou te lē o iloa ai ea le faatupuina o lo tatou faatuatua i vaiaso taʻitasi? I le pei o le Alo peleina o Ieova, ua faamalosia ai lo tatou faatuatua ina ia mafai ai ona tatou tumau.
15 Ua Aʻoaʻoina i Tatou e Ieova ia Ola Fiafia: E mafai ona tatou alofia le tele o le lototigā pe a tatou uaʻi atu i poloaʻiga a le Atua. E lē gata i lea, ua tatou tofo i le uiga o le ola i se olaga fiafia. O le mulimuli i le taʻitaʻiga a Ieova, ua oo ai ina faia so tatou sao i lana galuega, ae lē na ona avea o ni ē matamata. Ma o i latou o loo faia le galuega a le Atua, o i latou o ni tagata fiafia.—1 Kori. 3:9; Iako. 1:25.
16 Ia mafaufau ma le uigā i se auala o le a e faatatauina ai mea o loo e faalogo i ai i sauniga a le faapotopotoga. (Ioa. 13:7) Ia auauna ma le tiotio i le Atua ma lou lotoatoa. O le a faateleina ai lou olioli. O le a sili ona faatamaoaigaina ai lou olaga, ma sili atu ona uigā. Ioe, o le a e maua ai e oe lava aogā.