Ia Faia se Sao Atoatoa i le Seleselega
1 O perofeta a Ieova i aso anamua faapea ma Iesu Keriso lava ia sa talanoa e uiga i se galuega o le aoaoina. (Isa. 56:8; Eseki. 34:11; Ioa. 10:16) Ua faataunuuina nei lena galuega a o talaʻia le tala lelei o le Malo i le lalolagi aoao. (Mata. 24:14) Ua matuā iloa manino mai le eseesega i le vā o auauna a le Atua ma i latou e lē o auauna i a te ia. (Mala. 3:18) O le ā le uiga o lenei mea i a i tatou?
2 Se Tiute Tauave Totino: E mafai ona tatou aʻoaʻoina mai le faaaʻoaʻoga a Paulo, o lē sa matuā taulamua i le faiva faa-Kerisiano. Sa ia lagona lona nofo aitalafu i le tiute tauave o le talaʻi atu, ina ia mafai ona maua e tagata uma le avanoa e faalogo ai i le tala lelei ma faaolaina ai. Na uunaʻia o ia e lenei mea ina ia faaauau ona galue mamafa mo i latou. (Roma 1:14-17) I le vaai atu i le tulaga lamatia o loo fesagaʻi ma le fanau a tagata i aso nei, po ua lē i a i tatou ea se tiute tauave sili o le talaʻi atu i a i latou o loo i la tatou oganuu tofia?—1 Kori. 9:16.
3 Se Taimi mo Gaoioiga Faanatinati: O le galuega talaʻi, e mafai ona faatusatusa i se galuega o le suʻeina ma le faasaoina o tagata. E tatau ona suʻe tagata ma fesoasoani i ai ina ia oo i le tulaga saogalemu a o leʻi tuai. Ua puupuu lava le taimi. Ua lamatia ola! E lētioa ona uunaʻia e Iesu ona soo ina ia “aioi atu ai i le Alii e ana le saito e seleseleina, ina ia aauina mai e ia ni e galulue i lana saito e seleseleina.”—Mata. 9:38.
4 I le iloaina o le tulaga faanatinati o aso nei, e toʻatele tagata galulue o le Malo ua faateleina lo latou sao i lenei galuega faasaoola. O se tama talavou e igoa i a Hirohisa e nofo i se aiga e toʻatasi le matua ma nai ona tei laiti e toʻafā. Sa ia tausia lona aiga e ala i lona alapō i le tolu i le vaveao e alu e tiliva nusipepa. E ui lava i lena, ae sa manaʻo Hirohisa e faia se sao e sili atu i le faiva, o lea na amata ai ona ia paeonia sauatoa. Pe e iai ni auala e mafai ai ona e faia se sao atoatoa i lenei galuega o le a lē toe faia lava?
5 “Ua itiiti ona aso ua totoe.” (1 Kori. 7:29) O lea, seʻi o tatou faia mea uma tatou te mafaia i le galuega e sili ona tāua o loo faia i le lalolagi i aso nei—le talaʻia o le tala lelei o le Malo ma le faia o soo. Na faatusaina e Iesu lenei faiva i se galuega o le seleselega. (Mata. 9:35-38) O le faia o so tatou sao atoatoa i le seleselega, atonu e aofia ai i fua o a tatou galuega le fesoasoani atu i se tasi e avea ma vaega o le motu o tagata e toʻatele o le ʻautapuaʻi o loo faamatalaina i le Faaaliga 7:9, 10.