“Ua Galueaʻiina Soo la Tatou Oganuu!”
1 Pe na oo i a te oe se lagona e faapea ua galueaʻiina soo la outou oganuu ma ua leai ni tagata e pei ni mamoe o toe iai? Atonu e te manatu e faapea: ‘Ou te iloa lava le auala o le a tali mai ai tagata. Aiseā e ō soo ai i na tagata e lē fiafia?’ E moni lava o le tele o oganuu ua galueaʻiina soo. Ae peitaʻi, e tatau ona iai se vaaiga mautinoa i lenei mea moni, ae e lē o se vaaiga sesē. Aiseā? Mātau māfuaaga e fā ia e mulimuli mai.
2 Ua Talia a Tatou Tatalo: Na fetalai Iesu: “E tele le saito e seleseleina, a o le au faigaluega e toʻaitiiti ia; o lea ia outou aioi ai i le Alii e ana le saito e seleseleina, ina ia aauina mai e ia ni e galulue i lana saito e seleseleina.” (Luka 10:2) Mo le faitau sefulu o tausaga, sa tatou aioi atu ai i a Ieova mo nisi fesoasoani faaopoopo. I le tele o nofoaga, ua iai nei se ʻaufaigaluega faaopoopo o loo manaʻomia, ma ua tatou galueaʻiina soo foʻi le oganuu. Pe tatou te lē olioli ea ona o le mea moni faapea o loo tali mai Ieova i a tatou tatalo?
3 O le Maumauaʻi e Fua Mai ai Fua Lelei: E oo lava i oganuu e galueaʻiina soo, o loo tali lelei mai ai tagata i le feʻau o le Malo ma ua oo ina latou iloa le upu moni. O le mea lea, e tatau ai lava ona tatou asiasi atu pea lava pea ma le faamoemoe e maua atili ai nisi tagata lotofaamaoni. (Isa. 6:8-11) E pei ona sa faia e uluaʻi soo o Iesu, ia “ō atu pea lava pea” i tagata i la outou oganuu tofia, ma taumafai e faagaee lo latou naunau i le Malo o le Atua.—Mata. 10:6, 7, NW.
4 I Potukali, e galueaʻiina ai e le tele o faapotopotoga a latou oganuu i vaiaso uma, ae o loo latou maua ai pea ē e pei o ni mamoe. E iai se tasi o tuafafine patino lava sa iai se vaaiga mautinoa. Fai mai a ia: “I taeao uma lava ae ou te leʻi alu i le auaunaga, ou te tatalo ai i a Ieova ina ia fesoasoani mai i a te aʻu ina ia maua se tagata e fiafia e suʻesuʻe i le Tusi Paia.” I se tasi aso, sa ia fuafuaina ai e faia se suʻesuʻega ma ni tagata e faigaluega i se fale ʻoti ulu. Ae peitaʻi, mulimuli ane, e na o le toʻatasi le tagata na alu ane mo le suʻesuʻega. Na faapea mai lena tagata: “E lē fiafia isi, ae ou te fiafia.” E leʻi atoa se masina ae ua faia ni ana ia lava suʻesuʻega se lua. E leʻi pine lava mulimuli ane ae papatisoina loa o ia, ma mulimuli ane ulu atu ai o ia i le auaunaga paeonia!
5 Ua Faataunuuina le Galuega: Ua talaʻia nei le tala lelei i le auala e pei lava ona valoia e Iesu o le a faia ai. (Mata. 24:14) E oo lava i nofoaga ‘e le fia faalogo mai ai tagata i a i tatou,’ ae ua lapataʻia lava i latou e ala i le galuega talaʻi. E tatou te faatalitalia o le a lē tali mai nisi pe oo foʻi ina tetee i le upu moni. Ae peitaʻi, e tatau lava ona lapataʻia lelei na tagata e uiga i le faamasinoga o loo faaloloʻi mai a Ieova.—Eseki. 2:4, 5; 3:7, 8, 19, faatusatusa i le NW.
6 E Leʻi Uma la Tatou Galuega: E lē o tatou e filifilia po o afea e faamuta ai le galuega talaʻi. Ua silafia lelei lava e Ieova le taimi e tatau ona faaiʻuina ai. O loo ia silafia po o iai ni tagata i la tatou oganuu o ē atonu o le a tali mai i le tala lelei. I aso nei, ua faapea mai nisi tagata, latou te lē fiafia, ae e iai ni mea e tutupu faafuaseʻi i o latou olaga—po ua vāea mai le galuega, maʻi tigāina, po o le maliu o se tasi e pele—atonu o le a latou tali lelei mai ai i se isi taimi. Ona o le faailoga tagata po ona o le tele lava o le pisi ua lē faalogo ai, ae toʻatele lava tagata e leʻi faalogo lelei i mea o loo tatou talaʻia. O le faia e lē aunoa o asiasiga faaleuō atonu o le a latou iloa ai ma faalogo.
7 O i latou na tutupu aʻe ma avea ma tagata matutua i tausaga talu ai nei, ma ua faia nei ni o latou lava aiga, ua matuā uigā i a i latou le olaga ma ua lāgā ai ni fesili e na o le Afioga lava a le Atua e mafai ona taliina. Na valaaulia e se tasi tinā talavou ni Molimau se toʻalua i lona fale ma faapea atu: “A o oʻu laʻitiiti lava, ou te leʻi malamalama i le pogai na tutuli ai e loʻu tinā Molimau ma fai atu i ai o ia e lē fiafia, ae e na o le pau lava le mea sa latou mananaʻo i ai o le talanoa lea e uiga i le Tusi Paia. O lea na tonu ai i loʻu mafaufau e faapea, pe a ou matua, faaipoipo ma fai soʻu lava fale, o le a ou talosaga atu i Molimau a Ieova ina ia ō mai i totonu ma faamatala mai i a te aʻu le Tusi Paia.” O le mea lena na ia faia, na matuā faafiafiaina ai Molimau na asiasi atu i a te ia.
8 Pe Mafai Ona E Uigā Atili? E foliga mai atonu e lē o tagata ia tatou te asiasi atu i ai ua faafaigatā ai pea i taimi uma ona galueaʻiina e lē aunoa le oganuu. I nisi taimi, o i tatou lava. Pe e tatou te ō atu i le auaunaga ma ni manatu lē mautinoa? E mafai i lena mea ona aafia ai o tatou uiga, faapea foʻi o tatou leo ma o tatou foliga vaaia. Ia faaalia se agaga mautinoa ma ni foliga fiafia. Faataʻitaʻi se faafeiloaʻiga fou. Ia fesuisuiaʻi au upu tomua, ma taumafai e faaleleia. Atonu e mafai ona sui lau fesili amata pe faaaogā foʻi se isi mau e ese mai i le talanoaga. Fesili i isi uso ma tuafāfine po ua latou iloa, o le ā e mafai ona taulau ai i le galueaʻiina o le oganuu. Galulue i le auaunaga ma tagata talaʻi ma paeonia eseese, ma mātau po ua faapefea ona uigā la latou faiva.
9 O loo iai le faamaoniga ma le faamanuiaga a Ieova i le galuega talaʻi o le Malo, ma o lo tatou auai i lea galuega, ua faamaonia ai lo tatou alofa mo ia ma o tatou tuaoi. (Mata. 22:37-39) O lea seʻi o tatou faia pea la tatou galuega seʻia oo ina faaiʻuina, ae ia aua neʻi faavaivai e galueaʻiina le oganuu mai i lea taimi i lea taimi.