Pe Iai Sau Lava Oganuu?

1. O le ā le uiga o le iai o sau lava oganuu?

¹ O sau lava oganuu, o le oganuu lea ua tofia atu iā te oe. Atonu o se oganuu e lata ane e vave ona e taunuu ma talaʻi ai, a lē na o oe ia pe faatasi foʻi ma se isi tagata talaʻi. E ui e aogā le lagolago i faatulagaga a le faapotopotoga mo talaʻiga a vaega pe a talafeagai, ae o le iai o sau lava oganuu e galue ai i isi taimi, e fesoasoani lea e avatu ai se molimau māeʻaeʻa aemaise lava i faapotopotoga e tetelē oganuu.—Galu. 10:42.

2. O ā nisi o aogā o le iai o sau lava oganuu?

² Aogā: Ua iloa e nisi aogā faaopoopo o le talaʻi i lana lava oganuu e lata ane i le mea e faigaluega ai pe a mālōlō i le aoauli, ia po o le taimi lava e mānava ai. Ua fiafia nisi e galulue faatasi o se aiga i lo latou lava siʻomaga mo se itula pe sili atu foʻi, a o leʻi faia le Suʻesuʻega Tautusi a le Faapotopotoga. O le iʻuga, e maua ai ni toe asiga ma suʻesuʻega faale-Tusi Paia e lata ane le mea e iai, lea o le a faasaoina ai le tele o taumafaiga, taimi, ma tupe faaalu. Ona e tele mea e mafai ona fai i se taimi itiiti, o le a fesoasoani la i nisi le iai o sana lava oganuu ina ia paeonia lagolago ai i isi taimi, ia po o le paeonia sauatoa foʻi. E lē gata i lea, o le galue i lau lava oganuu ma faamasani i tagata o aiga, e fesoasoani e latou te talitonuina ai i tatou ma fetuunaʻi ai a tatou taulimaga i mea o latou manatu mamafa i ai, ma atili uigā ai la tatou faiva.

3. O le ā na oo i se paeonia o lē na maua sana lava oganuu?

³ Ua taʻua e se tuafafine paeonia o lē sa faalaeiau e le ovasia o le matagaluega e talosaga sana lava oganuu: “Na ou talia le fautuaga, ma e leʻi umi ae ou masani lelei ma faauō atu i tagata o aiga i laʻu oganuu. Sa fetuunaʻi taimi o aʻu asiasiga e fua i taimi e fetaui ma i latou. O le iʻuga, na faateleina aʻu toe asiga mai le 35 i le sili atu i le 80 i masina taʻitasi, ma ua fitu aʻu suʻesuʻega faale-Tusi Paia.”

4. E faapefea ona maua ma galueaʻiina sau lava oganuu?

⁴ Le Auala e Maua ai Sau Lava Oganuu: Afai e te manaʻo e talosaga sau lava oganuu, talanoa atu i le auauna o oganuu. Aua le faatalatū e valaaulia se isi tagata talaʻi e lua te galulue, ma ia fai ni faamaumauga o aiga e lē o maua atu ai ni tagata. E ao ona e taumafai e faamāeʻa le oganuu a o leʻi uma le fā masina. Afai e faigatā, e te ono talosaga atu i la outou ovasia o le Suʻesuʻega Tautusi a le Faapotopotoga po o isi mo se fesoasoani. I le faaiʻuga o le fā masina, e ao ona toe faafoʻi le oganuu ua uma ona galueaʻiina po o le talosaga atu e toe galue ai. E lē tatau ona e taofia le oganuu, ae ia toe faafoʻi ina ia mafai ona talosagaina foʻi e isi. Afai o loo e i se faapotopotoga e utiuti oganuu, ma e lē mafai ona maua sau lava oganuu, e te ono talosaga la i se vaega o se oganuu mai le ovasia o le tou suʻesuʻega tautusi.

5. O le ā se mea e manaʻomia ina ia faataunuu ai le tofiga e talaʻi?

⁵ E lē faigofie lo tatou tofiga e talaʻi atu “i le atu laulau uma.” (Mata. 24:14) E manaʻomia ni taumafaiga maopoopo lelei. E ese mai i le ō faatasi o se vaega e molimau atu, e fesoasoani le talaʻi i lau lava oganuu ina ia oo atu ai ma le tala lelei i le tele o tagata e mafai ai.