Amioga Faaaloalo—O se Uiga e Iloga ai Tagata Amio Atua

¹ Ua seāseā lava vaaia ni amioga faaaloalo i aso nei. Aiseā ua faapea ai? Ua pisi naʻuā tagata ma atonu ua seāseā ai ona manatu i uiga faavae o le faaaloalo, e pei o le faapea atu “Faamolemole,” “Faafetai,” po o le “Tulou lava.” Na valoia e le Afioga a le Atua le faateleina o le amio leaga i aso e gata ai i le faapea mai, o le a avea tagata ma ē ‘alolofa i latou ia i latou, o e loto vii, o e faamaualuga, o e le faafetai, o e le lotoaiga, o e le taofi manao o le tino, o e inoino i le amio lelei, ma e ua faafefeteina.’ (2 Timo. 3:1-4, LF) O uiga uma na ua fua i ai amioga leaga. I le avea ai o ni tagata amio Atua, e tatau la i Kerisiano ona leoleomaluina i latou ina neʻi pisia i uiga lē faaaloalo o lenei lalolagi mo isi.

² O ā Amioga Faaaloalo? O amioga faaaloalo e mafai ona faamatalaina i le matuā iloa lelei o faalogona o isi, le tomai e ola filemu ai faatasi ma isi. O vala o amioga faaaloalo, o le magafagafa, agalelei, faaaloalo, faautauta ma le manatunatu mo isi. O nei uiga e mapuna mai i faalogona alofa o se tagata mo le Atua ma tuaoi. (Luka 10:27) E lē faigatā le faatinoina o nei uiga, ae e matuā tāua tele i le faaleleia o a tatou fesootaʻiga ma isi.

³ Sa faataatia e Iesu Keriso le faaaʻoaʻoga lelei atoatoa. Sa ia faatinoina e lē aunoa le Tulafono Faaauro: “Pei ona outou loto i tagata ona ia latou faia ia te outou, ia faapea lava ona outou faia ia te i latou.” (Luka 6:31) Pe tatou te lē maofa ea i le magafagafa ma le alofa o Iesu i le auala na ia feutagaʻi ai ma ona soo? (Mata. 11:28-30) O ana amioga faaaloalo sa leʻi maua mai i tulafono na tusia i tusi e faamatalaina ai amioga faaaloalo. Sa mapuna aʻe mai se loto faamaoni ma le agaalofa. E tatau ona tatou taumafai e faataʻitaʻi i lana faaaʻoaʻoga lelei.

⁴ O fea le taimi e manaʻomia ai e Kerisiano amioga faaaloalo? Pe e na o faatasiga faapitoa lava, pe a mananaʻo ina ia taʻuleleia? Pe faatoʻā manaʻomia lava pe a taumafai e faatosina mai isi? E leai! E tatau ona tatou faaalia amioga faaaloalo i taimi uma lava. O ā auala patino e tatau ona tatou manatu mamafa ai i lenei mea i a tatou aufaatasiga ma isi i le faapotopotoga?

⁵ I le Maota o le Malo: O le Maota o le Malo, o le nofoaga lea o la tatou tapuaʻiga. Ua tatou iai i inā ona ua valaaulia i tatou e Ieova le Atua. E mafai la ona faapea atu, o tatou o mālō. (Sala. 15:1) Po o i tatou o ni mālō e fai ma faaaʻoaʻoga lelei pe a tatou ō mai i le Maota o le Malo? Po o tatou manatu mamafa ea i o tatou laʻei ma teuga? O le mea moni, e tatau ona tatou mananaʻo e ʻalofia teuga ma laʻei e lē talafeagai po o le soona teu anoaʻi foʻi. Po o auai i tauaofiaga po o sauniga faalevaiaso a le faapotopotoga, e mātauina lava tagata o Ieova i le onomea ma faaaloalo o o latou laʻei ma teuga, e talafeagai lelei ma i latou o faapea mai e ava ma migao i le Atua. (1 Timo. 2:9, 10) O lea, e tatou te faaalia ai le magafagafa ma le faaaloalo e tatau ai e lē gata mo Lē e Talimālō faalelagi mo i tatou, ae atoa foʻi ma isi mālō o loo valaaulia.

⁶ O le isi auala e tatou te faaalia ai amioga lelei i le taimi o sauniga, o le taunuu lea i le taimi tonu. E moni e lē faigofie i taimi uma lenei mea. O nisi atonu e mamao mea e nonofo ai pe e toʻatele foʻi le ʻauaiga e sauniuni. Ae peitaʻi ua mātauina i nisi faapotopotoga e faapea, e tusa ma le 25 pasene o le ʻautalaʻi ua fai ma masani le taunuu atu ae ua uma le pese ma le tatalo amata. O se mataupu lenei e ao ona manatu mamafa i ai. E lelei ona manatua, o amioga lelei, e aofia ai lo tatou amanaʻia o faalogona o isi. O Ieova la tatou Talimālō alofa, ua ia saunia nei faigaʻai faaleagaga e aogā mo i tatou. E faaalia lo tatou talisapaia ma le manatu mamafa mo ona faalogona e ala i le taunuu i le taimi tonu. E lē gata i lea, o le tuai ona taunuu i sauniga o le a fai lea ma faalavelave i le uaʻi atu a tagata, ma o se lē faaaloalo lenā mo i latou o ē ua leva ona nofoi.

⁷ Pe a tatou faapotopoto, pe tatou te mātauina ē fou o loo auai? O le talileleia o i latou o le isi foʻi lenā vaega o amioga lelei. (Mata. 5:47; Roma 15:7) O se faafeiloaʻiga alofa, se lūlū aao māfana, se laufofoga fiafia—o ni mea iti, ae e mafai ona faaopoopo i le mātauliaina o i tatou o ni Kerisiano moni. (Ioa. 13:35) Ina ua sau mo le uluaʻi taimi i se Maota o le Malo, na faapea mai ai se tamāloa: “Sa ou feiloaʻi atu i le toʻatele o tagata alolofa faamaoni, o ni tagata ese ou te lē masani ai i lenā aso, na i lo o tagata sa ou feiloaʻi i ai i le lotu na ou ola aʻe ai. Na manino mai ai lava i inā o le upu moni lea ua ou mauaina.” O le iʻuga, na ia suia ala o lona olaga, ma i le fitu masina mulimuli ane, na papatisoina ai o ia. Ioe, o amioga faaaloalo e mafai ona tele ni āuga lelei e iʻu i ai!

⁸ Afai e tatou te faaalia le amio lelei i tagata ese tatou te feiloaʻi , pe e lē tatau ea la ona tatou faia faapena “aemaise i le aiga o le faatuatua”? (Kala. 6:10, LF) Ua faatatauina ai i inei le mataupu silisili: “Ia e ava foi i luma o le toeaina [po o le loomatua].” (Levi. 19:32) Aua lava neʻi faagaloina i latou na i a tatou faatasitasiga.

⁹ Ia Uaʻi Totoʻa Atu: I le taimi o sauniga a le faapotopotoga, e lauga mai ai faifeʻau Kerisiano a le Atua e fofogaina mai nisi o meaalofa faaleagaga e atiina aʻe ai i tatou. (Roma 1:11) O le mea moni, o le a tatou faaalia se amioga e matuā lē faaaloalo pe afai e tatou te tautulemomoe, paʻō le lamuina po o le faapāpāina o pulu, femusuaʻi i taimi uma ma se tasi i ou tafatafa, ō soo i le fale lē taʻua ae e lē o manaʻomia, faitau o isi mataupu e lē fesootaʻi ma le sauniga, po o le faia o isi mea i le taimi o le sauniga. E tatau ona avea toeaina ma faaaʻoaʻoga lelei i lenei mea. O amioga faaaloalo faa-Kerisiano o le a uunaʻia ai i tatou e faaali atu le faaaloalo e tatau ai mo le failauga ma lana feʻau e faavae i le Tusi Paia e ala i lo tatou uaʻi atoatoa atu iā te ia.

¹⁰ E lē gata i lea, o lo tatou magafagafa mo le failauga faapea le aofia, e tatau ona taofia ai masini faailoilo ma telefoni feaveaʻi mai le faalavelave i a tatou sauniga.

¹¹ Amioga ma Tamaiti: E tatau i mātua ona mataala i taimi uma i amioga a a latou fanau. Pe afai e amata ona tau tagitagi se tamaitiiti po ua lē nofo filemu foʻi a o faia le sauniga ma ua avea ma faalavelave i isi, e sili ona lelei pe a vave ona ave i fafo le tamaitiiti mai le fale ina ia faafilemu ai. Atonu e faigatā lenei mea i nisi taimi, ae ia manatua, o lenei mea e faaalia ai lou mataalia mo faalogona o isi. O mātua e iai fanau laiti e foliga mai e lē nonofo filemu, e masani lava ona latou filifili e nonofo i le pito i tua o le fale ina ia toʻalaiti ai tagata e faalavelavea, e faigofie ai mo i latou ona ō i fafo a o faia le sauniga. O le mea moni, o isi uma o le aofia o loo auai, e mafai ona faaalia le magafagafa e tatau ai mo aiga i le faaavanoaina o laina nofoa i tua mo i latou e faaaogā, pe a mananaʻo i ai.

¹² E tatau foʻi i mātua ona vaai i amioga a a latou fanau a o leʻi amataina ma pe a tuua sauniga. E lē tatau ona fetaufetuliaʻi solo tamaiti i totonu o le fale ona e ono tutupu ai ni faalavelave. E mafai foʻi ona lamatia ai i le fetaufetuliaʻi solo i fafo o le Maota o le Malo, aemaise lava pe a oo ina pō ua tau lē lelei ai le vaai. O le talanoa leotetele i fafo e ono faalavelavea ai ia tuaoi, ma e mafai ona faalumaina ai la tatou tapuaʻiga. E tatau ona avatu le faamālō i mātua o ē o loo faia ni taumafaiga fitā i le vaavaaia o a latou fanau i totonu atoa ma fafo o le Maota o le Malo, auā e faaopoopo ai i le faamatagofieina o la tatou aufaatasiga autasi.—Sala. 133:1.

¹³ I le Suʻesuʻega Tautusi: E tatou te talisapaia le agaga talimālō o o tatou uso o ē o loo faaavanoaina o latou fale mo sauniga a le faapotopotoga. Pe a tatou auai i na sauniga, e manaʻomia ona faaalia le faaaloalo ma le magafagafa mo a latou meatotino. A o leʻi ulufale, e tatau ona solo mamā lelei o tatou seevae pe aveese foʻi, ina ia ʻalofia ai le faapalapalāina o le fola po o le kapeta. E tatau i mātua ona vaavaai a latou fanau, ia faanonofo i le vaipanoa o le fale lea ua faatagaina mo le suʻesuʻega tautusi. E ui atonu e toʻalaiti le vaega ma e foliga mai o se tulaga lē aloaʻia le siʻomaga, e lē tatau ona tatou soona soli vale ai meatotino a aiga. E tatau i se matua o se tamaitiiti laʻitiiti ona ō faatasi ma lana tama pe a fia faaaogā le fale lē taʻua. E lē gata i lea, ona o le suʻesuʻega tautusi o se sauniga a le faapotopotoga, e tatau lava la ona tatou laʻei e pei ona tatou faia pe a ō i sauniga i le Maota o le Malo.

¹⁴ E Tāua Tele Amioga Faaaloalo: O le faatinoina o amioga faaaloalo faa-Kerisiano, e lē gata e atagia lelei atu ai la tatou faiva, ae e atiina aʻe ai foʻi ni faiā lelei ma isi. (2 Kori. 6:3, 4, 6) Ona o ni tagata e tapuaʻi i le Atua fiafia, e tatau la ona avea ma a tatou masani le faaalia o le laufofoga fiafia, ia faigofie ona feutagaʻi, ma e oo lava i le faia o ni nai mea iti agalelei e maua ai e isi le fiafia. O nei uiga faaaloalo o le a faaleleia ai o tatou olaga i le avea o ni tagata amio Atua.