Po o E Faatatauina Mea na E Aʻoaʻoina i le Tauaofiaga Itumalo o “Faiaʻoga o le Afioga a le Atua”?
1 So o se tasi sa auai i tauaofiaga itumalo o lenei tausaga, sa mafai ona ia iloa le naunau o tagata o Ieova e faataunuu lo latou tofiga e avea o ni faiaʻoga o le Afioga a le Atua. (Mata. 28:19, 20) A o e foʻi atu i lou aiga, o ā ni faatonuga patino na e maumauaʻi e faatatauina i lou lava olaga faapea le faiva i le fanua?
2 E Aogā le Tusi Paia Faagaeeina mo le Aʻoaʻo Atu: O le matua o le aso muamua, na faamatilatilaina ai le 2 Timoteo 3:16. Na faaalia i le lauga autū e faapea, ina ia “Saunia Atoatoa e Avea o ni Faiaʻoga o le Afioga a le Atua,” e tatau ona tatou matuā faatāuaina le Afioga a le Atua, faaaloalo i ai na i lo o so o se manatu faaletagata po o uputuu, ma faaaogā e lē aunoa. E tatau foʻi ona tatou tatalo i aso faisoo mo le agaga paia e fesoasoani iā i tatou i la tatou faiva, ma galulue ina ia atiina aʻe lona fua aupito sili—o le alofa. E tatau foʻi ona tatou faatagaina le faalapotopotoga faalelalolagi a Ieova e toleniina i tatou e avea o ni faifeʻau e ala i sauniga uma lava a le faapotopotoga.
3 O le lauga faasolo i le Aso Faraile, “Aʻoaʻoina o i Tatou a o Tatou Aʻoaʻoina Atu Isi,” ua faamatala mai ai le tatau ona avea o i tatou ma faaaʻoaʻoga lelei i le (1) pipii i tulafono a le Atua i vala uma o amioga faa-Kerisiano, (2) tausisia o se masaniga o le faia o suʻesuʻega, ma (3) aveesea uiga o le loto ma le mafaufau e mafai ona faaaogā sesē e le Tiapolo. Ona sosoo ai lea ma lo tatou aʻoaʻoina o auala aogā e puipuia ai o tatou aiga mai le mala faalelalolagi, o ata ma faamatalaga o faiga matagā faaleituaiga. Na uunaʻia ai mātua ina ia faataatitia ni faaaʻoaʻoga ina ia ʻalofia le tau lava ina vaai mo sina taimi puupuu i se vaaiga i faiga faaleituaiga, ma ia mataʻia a latou fanau i le faaaogāina o le Initineti ma le matamata i le televise. O ā manatu mai le polokalame o le Aso Faraile ua amata ona e faatatauina?
4 O le lauga faaiʻu o le aso na faamalosia ai la tatou faaiʻuga ina ia naunau i le malamalama o Ieova, ia pipiimau atu i le vasega faamaoni faauuina a le Atua, ma ia saosaolaumea i le faaauilumaina o le filemu o tagata o Ieova. Po ua e faitau i le tusi fou na tatalaina, Isaiah’s Prophecy—Light for All Mankind II?
5 Ua Taʻuagavaaina Lelei e Aʻoaʻo Atu i Isi: O le mau na fai ma matua o le aso lona lua, o le 2 Timoteo 2:2. A o e faalogologo i le lauga faasolo i le taeao o le Aso Toonaʻi, pe sa e mātauina fautuaga i le auala e (1) saʻilia ai ē ua tatau ai, (2) atiina aʻe lo latou naunau, ma (3) aʻoaʻo i latou ia tausi i mea uma na poloaʻiina e Keriso? Po o e faatatauina mea na e aʻoaʻoina—i le faailoa atu i ē ona fale se manatu se tasi mai le Tusi Paia ma faataatia se faavae mo se isi asiasiga i le lumanaʻi?
6 O le lauga i le afiafi na faamamafaina ai le tāua o le faataʻitaʻi i le Faiaʻoga Sili, o Iesu. I ā auala o loo e taumafai ai ina ia e pei moni lava o ia? E mai mea na e aʻoaʻoina i le lauga faasolo lona lua o le aso, o le ā sou manatu, e faapefea ona e “Maua Atili Aogā Mai Aʻoaʻoga Faatiokarate”? O ā fautuaga ua e faatatauina ina ia faateleina ai le umi o le taimi e te uaʻi atu ai i au suʻesuʻega totino ma sauniga a le faapotopotoga?
7 E mautinoa lava, o le sauniuniga lea o loo fotuaʻi mai, Benefit From Theocratic Ministry School Education, o le a fesoasoani iā i tatou e tutupu aʻe i o tatou tomai i le avea o ni failauga ma ni faiaʻoga o le Afioga a le Atua. O le a sili ona uaʻi totoʻa atu ai i uiga sa iloga ai auauna faamaoni a le Atua i taimi o le Tusi Paia. I lesona taʻitasi i le tusi fou, e iai pusa e faailoa saʻo mai ai mea e manaʻomia ona tatou faia, le pogai e tāua ai, ma le auala e faia ai. O loo faaaofia ai ma ni faataʻitaʻiga aogā. E 29 faatulagaga mo tuafāfine e latou te filifili mai ai pe a faafoeina atu o latou tofiga. Mulimuli ane, o le a faia suiga sa faasilasilaina mai i faatulagaga masani o le aʻoga. Po o iai sau faasologa lelei e suʻesuʻe ma sauniuni ina ia maua atoatoa ai aogā mai le Aʻoga o le Faiva Faatiokarate i vaiaso taʻitasi?
8 Ua Tatau Ona Avea ma Faiaʻoga pe a Fua i le Taimi: Ua saunia e le Eperu 5:12 mafaufau o le aofia mo le Aso Sa. O le lauga faasolo o le taeao, “O le Valoaga a Malaki ua Sauniunia ai i Tatou mo le Aso o Ieova,” ua faalaeiauina ai i tatou ina ia avatu i le Atua le mea e aupito sili ona lelei ma ia ʻinoʻino i mea faaʻoleʻole uma lava ina ia mafai ai ona faasaoina i tatou mai le aso e silisili ma le mataʻutia o Ieova. O le tala, “Ia Faaaloalo i le Pule a Ieova,” ua matuā faaalia ai iā i tatou pe na faapefea i le faamaualuga, fiasili, lotoleaga, ma le tuu sesē o le faamaoni o Koru anamua ma ana aumea ona iʻu ai i le faia o ni gaoioiga tuusaʻo na faasagatau ai iā Ieova lava ia. O le lauga lea e mulimuli mai, e taulaʻi atu i le manaʻoga i aso nei ina ia gauaʻi i le pule a le Atua i totonu o le aiga faapea le faapotopotoga. O le lauga lautele, “O Ai o Loo Aʻoaʻoina Nuu Uma i le Upu Moni?,” e aumaia ai faamaoniga o loo faia faapea e Molimau a Ieova, pe a faatusatusa atu iā Kerisinetoma lea e na ona faapea mai o loo aʻoaʻoina upu moni o le Tusi Paia.
9 E manino lava, o loo toleniina i tatou e Ieova ina ia avea o ni faiaʻoga e sili ona lelei o lana Afioga. Seʻi o tatou faatatauina mea na tatou aʻoaʻoina, i le uaʻi totoʻa ‘ia i tatou lava ma la tatou aʻoaʻo atu, ina ia tatou faaolaina o i tatou lava atoa ma ē faalogologo mai ia i tatou.’—1 Timo. 4:16.