Afifio Mai i le Tauaofiaga Itumalo, o le “Faatuatua i le Afioga a le Atua”!

E FAITAU miliona o le a auai i le faitau selau o nofoaga mo tauaofiaga i le lalolagi aoao. I na o le Iunaite Setete lava ia, e 193 tauaofiaga ua faatulagaina e faia ai. O le uluai tauaofiaga o le a faia ia Me 23-25, ma o le tauaofiaga mulimuli, o Setema 12-14. O le a faapena foi ona faia ai se tasi o nei tauaofiaga mo aso e tolu—mai le Aso Faraile e oo i le Aso Sa—i se aai e lē mamao ma le mea o loo e nofo ai.

O le a e maua ai aogā mai le anoanoai o fautuaga aogā mai le Tusi Paia. I le tele o nofoaga, o le a amata ai le polokalame i taeao taitasi i le taina o musika i le 9:30. I le taeao o le Aso Faraile, o le a faatomua i ni faatalanoaga mo le 25 minute ma tagata na matuā aafia o latou soifua ona o lo latou faatuatua i le Afioga a le Atua. O le a faaiuina lena vaega muamua o le polokalame i le lauga autū, “Savavali i le Faatuatua, ae Lē o le Tino Mai o Mea.”

O le uluai lauga i le aoauli o le Aso Faraile, o le a talanoaina ai le vaega e matuā tāua o loo faia e talavou i le faapotopotoga Kerisiano. O le lauga faasolo e tolu vaega lea e sosoo mai, o le a talanoaina ai tapulaa faale-Tusi Paia e fesootai atu ma amioga faa-Kerisiano i upu e tāutala ai, amioga, ma teuga. Ona sosoo ai lea ma le lauga, “Ia Faaeteete i le Leai o se Faatuatua” ma le “O Loo Ola le Afioga a le Atua” e taulai atu i le apoapoaiga manaia o loo aumaia i le Eperu mataupu e 3 ma le 4. O le a faaiuina le polokalame o le Aso Faraile i le lauga “Se Tusi mo Tagata Uma.”

O le uluai lauga i le taeao o le Aso Toonai e faapea, “E Mate le Faatuatua pe a Leai ni Galuega.” O se isi lauga tāua i lena taeao e faapea, “Ia Mauaa ma Mautu i le Upu Moni,” e talanoaina ai le auala e mafai ai ona faatinoina le tuputupu aʻe faaleagaga. O le a faaiuina le polokalame i le taualumaga masani o le tauaofiaga, “Faatuatua i le Afioga a le Atua e Taʻitaʻi Atu ai i le Papatisoga,” lea o le a faia ai se sauniuniga mo soo fou o le a papatisoina pe a maeʻa le lauga.

O le lauga amata i le aoauli o le Aso Toonai e faapea, “Ia Faamalolosi Ona Finau mo le Faatuatua,” o le a talanoaina ai le apoapoaiga i le tusi o le Tusi Paia, o Iuta. O se lauga faasolo e tasi le itula le umi, o lona matua e faapea, “Seʻi o Tatou Gasolo Atu i le Fale o Ieova,” o le a talanoaina ai aogā o sauniga faa-Kerisiano. E faaiuina le polokalame i lena aso i le lauga, “Le Uigā o Lou Faatuatua—Ua Tofotofoina Nei.”

O le polokalame i le taeao o le Aso Sa e faatomua i se lauga faasolo e tolu vaega, o le a talanoaina ai le tusi o le Tusi Paia o Ioelu, faapea ma lona faatatauina i o tatou aso. Ona sosoo ai lea ma se tala faale-Tusi Paia, o lona matua e faapea, “Ia Faafaigofie Lau Vaai.” O le a taualuga le tauaofiaga i le afiafi i le lauga lautele e faapea, “Le Faatuatua ma Lou Lumanai.”

E mautinoa, o le a faatamaoaigaina oe i le itu faaleagaga i lou auai. O le a talisapaia ma le mafana oe i vaega uma o le polokalame. Fai nei loa ni fuafuaga ina ia auai. Mo le nofoaga o le tauaofiaga e latalata ane i lou alalafaga, ia faafesootai le Maota o le Malo o Molimau a Ieova i lou atunuu, pe tusi atu foi ia i latou o lomia lenei mekasini. E mafai foi ona e maua tuatusi o nofoaga o tauaofiaga i le Iunaite Setete, Kanata, Peretania, ma Aialani i le lomiga o le Awake! o Iuni 8.