Auai i le Tauaofiaga Itumalo o le “Mataʻu i le Atua”!

Po ua faia ni au fuafuaga ina ia e auai i le Tauaofiaga Itumalo a Molimau a Ieova i le 1994, o le “Mataʻu i le Atua”? E mautinoa o le a e maua ai aogā e ala i lou auai mo aso uma e tolu! I le sili atu i le 165 tauaofiaga ua fuafuaina mo na o le Iunaite Setete lava ia, o le a faapena foi ona usuia se tauaofiaga e latalata ane i le mea o loo e alaala ai.

E iai se mataʻu faapitoa e mafai ona ōia ai le lototele ma faaumatia ai le faamoemoe; peitai o le a otootoina ai ma le manino i se lauga autū i le taeao o le Aso Faraile, le mataʻu faaleatua, ma faamatalaina ai le tele o ona aogā. O le mea moni, o le polokalama atoa o le tauaofiaga o le a faamatilatila ai ia aogā.

I le afiafi o le Aso Faraile, o le a e faafofoga ai i le auala e mafai ai e le mataʻu i le Atua ona faamalosia faaipoipoga ma olaga faaleaiga, faapea foi ma le auala e mafai ona fesoasoani ai i talavou ina ia tutumau i lo latou faamaoni i le Atua. O le a faaiuina le sauniga o le afiafi i se lauga faamafanafana loto e faapea, “Faamafanafanaga mo Ē Faanoanoa.” O le a e talisapaia faamatalaga aogā lava saunia a o faagasolo lena lauga, e fesoasoani ai ia i latou o ē ua lē iloa ē pele i le oti.

O le polokalama i le Aso Toonai, o le a faaalia ai pe mafai faapefea i le mataʻu i le Atua ona faamalosia lo tatou pipiimau atu i le taitaiga a Ieova, e tusa ai ma le faapotopotoga ma la tatou faiva. I le lauga “Faitau le Afioga a le Atua, le Tusi Paia i Aso Taitasi,” o le a maua ai e sui usufono fautuaga aogā mo le faitauina ma le suesueina o le Tusi Paia. O le a faaiuina le polokalama o le Aso Toonai i se lauga, o lona matua faatupu naunau e faapea, “Ua Latalata mai le Aso Tele ma le Matautia o Ieova.”

O le faatomuaga o le polokalama i le Aso Sa, o le lauga “O le a Iai se Toetutu mo Ē Amiotonu.” I le lauga e sosoo ai, “Faasaoolaina atu i le Puapuaga Tele,” o le a saunia ai se faamalamalamaga o le folafolaga ofoofogia a Iesu e faatatau ia i latou o ē o le a lē oo lava i ai le oti.—Ioane 11:26.

O le a faaiuina le polokalama o le taeao o le Aso Sa i se tala faatupu manatu e faia mo le 40 minute, o lona matua Filifiliga o Lua Feagai. O le a faamanatu atu ai i le aofia aso o Iosua, ma o le a vaaia ai le faaatagiaina o lana faaiuga maumauai e auauna ia Ieova. O le a aumaia ai foi le tofotofoga i le afi i aso o Elia, ma o lesona o le a maua mai i nei mea uma na tutupu, o le a fesoasoani i le au usufono e faaalia le mataʻu i le Atua i aso nei. I le afiafi, o le lauga lautele, o lona matua, “Aisea e Mataʻu ai Nei i le Atua Moni” o le a avea o se tumutumuga o le tauaofiaga.

Ia faia nei loa ni fuafuaga ina ia auai. Ina ia iloa le nofoaga e aupito i latalata i lou aiga, ia faafesootai le Maota o le Malo o Molimau a Ieova o i lou lava vaipanoa, pe tusi atu foi i ē o lomia lenei mekasini. O le a lisiina mai foi i le lomiga o le Awake! o Iuni 8, tuatusi o nofoaga uma o le a faia ai tauaofiaga i le Iunaite Setete, Kanata, Peretania, ma Aialani.

[Ē Ana le Ata i le itulau 32]

T. Rosenthal/SUPERSTOCK