Ia Talaʻitonuina le Afioga a le Atua
1 Ina ua molimau atu i se tagata maualuga, “Ona tautala atu lea o Filipo, ua afua i lea lava Tusi ona folafola ia te ia o le tala lelei ia Iesu.” (Galu. 8:35) Sa “talaʻitonuina [e Filipo] le upu moni.” (2 Timo. 2:15, LF) Ae peitaʻi, i aso nei, ua mātauina ai e ovasia femalagaaʻi e faapea, ua seāseā lava faaaogā e le toʻatele o le ʻautalaʻi le Tusi Paia pe a molimau atu. Pe e te faaaogāina ea le Tusi Paia i lau faiva?
2 O le Afioga a le Atua o le puna lenā o mea uma o loo tatou talitonu iai ma aʻoaʻo atu. (2 Timo. 3:16, 17) Ua mafai e le Tusi Paia ona tataʻiina mai tagata iā Ieova ma aʻoaʻo i latou i le olaga. O le pogai lenā e tāua ai lo tatou faaaogāina o le Tusi Paia i la tatou faiva na i lo o le tau ina talanoa i ni mataupu e tatou te fiafia i ai. (Epe. 4:12) Talu ai o le toʻatele o tagata e itiiti so latou iloa o le Tusi Paia, o lea e manaʻomia ai ona tatou faitau mai le Tusi Paia e faailoa atu ai iā i latou taʻiala aogā ua ofoina mai ai ma le lumanaʻi o loo faailoa mai ai mo le fanau a tagata.
3 Faitau Saʻo Mai le Tusi Paia: Faataʻitaʻi ona e taumafai e talaʻi atu e aunoa ma se ato tusi. E mafai lava ona tuu i se tamaʻi ato au lomiga o le ofo ia o loo fia faatomua , ae uʻu lau Tusi Paia i lou lima pe tuu foʻi i lau taga. Ia afai la e te lua talanoa ma se isi, e mafai lava ona ave ane lau Tusi Paia e aunoa ma le faapogaia o le tagata e manatu faapea o loo e taumafai e fai atu se lauga. Tū i se tulaga e mafai ai e lē o loo faalogologo mai iā te oe ona mulimuli mai a o faitau lau Tusi Paia. Atonu e te fesili atu foʻi iā te ia na te faitauina leotele mai se mau. E mafai ona tāmau ai i lona mafaufau pe afai e mafai ona ia iloaina mea ia o loo fai mai ai le Tusi Paia, na i lo o le na ona faalogo i ai mai iā te oe. O le mea moni, ina ia fesoasoani iā te ia e malamalama i le manatu o le mau, ia faamamafa upu o loo fesootaʻi ma le manatu.
4 Se Taulimaga e Faaaogā ai se Mau e Tasi: Pe a uma ona faailoa atu oe, e mafai ona e faapea atu: “O loo vaavaai atu tagata i puna eseese mo ni taʻiala i o latou olaga. O le ā sou manatu, o fea le puna e aupito sili ona aogā ana taʻiala? [Faatali mo se tali.] O le ā sou manatu e uiga i lenei faamatalaga? [Faitau le Faataoto 2:6, 7, ona faatali lea mo se tali.] O le poto o tagata ua faamaonia le matuā lē lava ma le lē aogā ona ua taʻitaʻiina atu ai le toʻatele o tagata i le matuā leai o se faamoemoe. A o le poto o le Atua, e faamaonia pea le maufaatuatuaina ma aogā.” Ona faaali lea i ai o le lomiga lea o loo e faatomuaina, ma faamatilatila atu i ai se faaaʻoaʻoga o le atamai aogā o le Atua.
5 Sa faaaogā e Iesu le Tusi Paia e fesoasoani ai i tagata loto faamaoni. (Luka 24:32) Sa faamaonia atu foʻi e Paulo mai le Tusi Paia mea na ia aʻoaʻo atu. (Galu. 17:2, 3) O lo tatou mautinoa ma le olioli i le faiva, o le a faateleina a o agaʻi ina sili atu ona tatou tomai i le talaʻitonuina o le Afioga a le Atua.