Po o E Faaaogāina le Polosiua o le Manaomia e Amata ai ni Suʻesuʻega?
1 Pe na e iloa afai e fai ma au masani le faia e lē aunoa o ni talanoaga faale-Tusi Paia ma se tagata lotofiafia ma talanoa ai i se mataupu mai se tasi o lomiga ua fautuaina e tusa lava pe puupuu, ae o lenā lava ua e faia se suʻesuʻega faale-Tusi Paia? Ioe, o le mea moni lenā, e tusa lava pe fai i fafo le talanoaga pe talanoa foʻi i luga o le telefoni. Aiseā e lē faia ai se taumafaiga faapitoa iā Me ma Iuni ina ia amata se suʻesuʻega faapena e faaaogā ai le polosiua o le Manaomia?
2 O le Sauniuni e Taulau Ai: Pe a ofoina le polosiua o le Manaomia, ia manino lelei i lou mafaufau le mataupu lea e te manaʻo e talanoa i ai. Pe afai e te faia se toe asiga, mafaufau i le talanoaga na e faia i le uluaʻi asiasiga. Fesili ifo iā te oe lava: ‘O fea palakalafa i le polosiua o le a ou faatomuaina ina ia faaauau ai lenā talanoaga ma iʻu ai i le faia o se suʻesuʻega faale-Tusi Paia?’ Afai o loo e talaʻi atu mai lea fale i lea fale, mafaufau i ni mataupu o le a fetaui ma se talavou, se tagata matua, se tamāloa, po o se fafine. Ia autalu mataupu autū o le polosiua, ma fili se mataupu e te iloa e fiafia i ai tagata. Pe a uma ona filifilia ni upu tomua, ona faataʻitaʻi lea pe a ma le faalua taimi le faia o se suʻesuʻega. O se tasi lenei o vala autū e taulau manuia ai.
3 O loo aumaia i le faaopoopoga o La Tatou Faiva o le Malo o Ianuari 2002 ia “Fautuaga mo le Ofoina o le Polosiua o le Manaomia” e valu. Ua faaalia i le pusa, “Faafeiloaʻiga Tuusaʻo” le auala e faaaogā ai lenei polosiua e amata ai ni suʻesuʻega. E mafai ona e faaaogāina le fautuaga muamua e faapea:
◼ “Pe e te silafia e mafai ona e mauaina le tali o se fesili tāua faale-Tusi Paia i na o ni nai minute lava? Mo se faaaʻoaʻoga, aiseā ua tele naʻuā ai lotu ua faapea mai o Kerisiano? Pe sa e tau manatu e uiga i lenā mea?” Pe a uma ona tali mai le tagata, ona suʻe lea i le lesona e 13 ma talanoa ia uluaʻi palakalafa e lua. Pe a lava le taimi, faitau se mau se tasi pe lua, ma talanoa i ai. Ona faitau loa lea o le fesili mulimuli i le pito i luga o le itulau ma faapea atu: “Ua faamatilatila mai i le lesona atoa ia faailoga e lima e iloa ai le lotu moni. Ou te fiafia lava e toe foʻi mai e ta te talanoaina nei manatu.”
4 Ia Maumauaʻi: Ia faaaogā avanoa uma e faataʻitaʻia ai se suʻesuʻega faale-Tusi Paia i le polosiua o le Manaomia. Talosaga atu mo le faamanuiaga a Ieova. (Mata. 21:22) O le maumauaʻi i au taumafaiga, e mafai ai ona e maua le olioli i le fesoasoani atu i se tasi e talia le tala lelei!