Le Auala e Faaalia ai e Ovasia o Suʻesuʻega Tautusi a le Faapotopotoga le Naunau Totino

¹ Ua fuafuaina le Suʻesuʻega Tautusi a le Faapotopotoga ina ia “mafai ai ona uaʻi totino atu i le tuputupu aʻe faaleagaga o tagata taʻitoʻatasi. . . . O se faaaliga lenei o le agalelei o Ieova ma lana tausiga alofa i ona tagata.” (om itu. 75; Isa. 40:11) E tāua tele i le ovasia o le suʻesuʻega tautusi ona faaalia sea naunau totino.

² I le Suʻesuʻega Tautusi: Talu ai ua faatoʻalaʻitiiti vaega o suʻesuʻega tautusi, ua mafai la e le ovasia o le suʻesuʻega ona iloa lelei tagata o lana vaega. (Faata. 27:23) E masani lava ona iai avanoa e talatalanoa faatasi ai a o leʻi amataina ma pe a uma foʻi le suʻesuʻega i vaiaso taʻitasi. A o faagasolo le masina, ua mafai ona ia talanoa atu i le toetoe lava o tagata uma o le vaega. Ua fesoasoani lenei faiga e faafaigofie ai i tagata o le vaega ona talanoa atu iā te ia pe a fesagaʻi ma ni tofotofoga ma pe a manaʻomia foʻi ni faalaeiauga.—Isa. 32:2.

³ E taumafai le ovasia o le suʻesuʻega tautusi e faamalosiau i tagata uma o le vaega ina ia faia se sao i le suʻesuʻega. O se tasi o auala e faia ai faapea, o le taulimaina lea o le suʻesuʻega i se uiga agalelei ma le agamalu. (1 Tesa. 2:7, 8) E saʻili e ia ni auala e faaaofia ai tagata uma i le talanoaga, e aofia ai ma tamaiti. Afai e matamumuli nisi e faia se sao, e mafai ona ia fesoasoani e ala i le faailoa muamua iā i latou o se mau e faitauina po o se palakalafa patino foʻi e faia ai se tali. E mafai foʻi ona ia faailoa atu iā i latou le auala e faia ai se tali i a latou lava upu.

⁴ Afai o le uso lea e fesoasoani i le ovasia o le suʻesuʻega tautusi o se auauna o le faiva, e fuafua la e le ovasia ina ia faia e le auauna o le faiva le suʻesuʻega e faatasi i le lua masina. O lenei faiga o le a mafai ona mataʻituina e le ovasia le auauna o le faiva ma avatu i ai ni fautuaga aogā. O se fuafuaga lelei tele lea e fesoasoani ai i uso ina ia faaleleia o latou tomai e aʻoaʻo atu ai!—Tito 1:9.

⁵ I le Faiva i le Fanua: O se tasi o tiute tauave autū a le ovasia o le suʻesuʻega tautusi, o le taʻimua lea i le galuega faaevagelia. (Nu. 27:16, 17) E na te faia ni fuafuaga tatau mo le vaega e ō ai e talaʻi ma taumafai e fesoasoani i tagata uma ina ia olioli i la latou faiva. (Efe. 4:11, 12) Ina ia taulau lenei fuafuaga, e avea ma ona sini le galulue i le auaunaga i le fanua ma tagata taʻitoʻatasi o le vaega. E galulue foʻi o ia ma le ovasia o le auaunaga i le faia o fuafuaga ina ia galulue i latou o loo mananaʻo e faaleleia nisi o vala o la latou faiva ma se tagata talaʻi e lava le poto masani.

⁶ O se Leoleo Mamoe Alofa: E naunau le ovasia o le suʻesuʻega tautusi iā i latou e laʻitiiti se sao e faia i le galuega talaʻi ona o o latou tulaga. E tatau ona ia faailoa atu le fuafuaga mo i latou ua lē o toe mafai ona fai ni mea se tele i le auaunaga i le fanua ona ua matutua i tausaga, ua lē toe mafai ona savavali, po ua faataotolia foʻi i maʻi tigāina po o ni manuʻa, ina ia lipoti atu le 15 minute pe afai e lē mafai ona lipotia se itula atoa i le masina. (O le Komiti o le Auaunaga a le Faapotopotoga e filifilia po o ai e tatau i ai lenei fuafuaga.) E tatau foʻi ona naunau o ia iā i latou ua tofia atu i lana vaega o ē atonu ua lē toe talaʻi, e fesoasoani iā i latou ina ia toe amata ona galulue faatasi ma le faapotopotoga.—Luka 15:4-7.

⁷ E tatou te matuā lotofaafetai ona o le naunau alofa mai o ovasia o suʻesuʻega tautusi! O lo latou naunau totino mai, ua fesoasoani iā i “tatou uma lava i le loto gatasi i la le faatuatua . . . , ia oo i le fua o lē ua matua, e tatau ma le tumu o Keriso.”—Efe. 4:13.