Ia Fesoasoani i Lou Ovasia o Suʻesuʻega Tautusi a le Faapotopotoga
1 E mafai e i tatou uma lava taʻitoʻatasi ona mauaina mai le tele o aogā i le Suʻesuʻega Tautusi a le Faapotopotoga. I le itulau e 8 o lenei Faiva o le Malo, na tatou talanoaina ai pe faapefea e le ovasia o le Suʻesuʻega Tautusi a le Faapotopotoga ona faatinoina lana matafaioi. Ae, o le ā e mafai ona tatou faia e fesoasoani ai iā te ia ma mauaina ai aogā e lē gata mo i tatou ae faapea foʻi isi?
2 Ia Auai i Vaiaso Uma: Ona e toʻalaiti tagata i suʻesuʻega tautusi, e tāua tele la lou auai. Ia fai ma ou sini le auai i vaiaso uma. E mafai foʻi ona e fesoasoani i le lē tuai atu, o le faia faapea o le a fesoasoani ai i le ovasia ina ia amata le suʻesuʻega i se auala maopoopo.—1 Kori. 14:40.
3 Ia Faia se Sao Uigā e Faalaeiauina Ai: O le isi auala e te fesoasoani ai, o lou sauniuni lelei lea e ala i le suʻesuʻeina o lau tusi mo le suʻesuʻega ma faia se sao uigā e faalaeiauina ai. E sili ona lelei le tali i se manatu se tasi, ma e mafai foʻi ona faalaeiauina ai isi e faia sa latou sao. Ia ʻalofia le taumafai e taʻua uma manatu i le palakalafa. Afai ua aafia ou faalogona i le manatu o loo aumaia i le palakalafa, ia taumafai e faaali atu ina ia uigā atili ai le talanoaga.—1 Pete. 4:10.
4 Afai ua e maua le faaeaga o le faitauina o palakalafa, ia filigā i le faatinoina o lenā tofiga. E fesoasoani tele le manino ma le lelei o le faitau i le taulau manuia o le suʻesuʻega.—1 Timo. 4:13.
5 Galuega Talaʻi a le Vaega: O feiloaʻiga mo le auaunaga i le fanua e faia i le tele o nofoaga o suʻesuʻega tautusi, ma o lou lagolagoina o nei fuafuaga o le a fesoasoani ai i le ovasia a o ia taʻimua i le galuega talaʻi. Ia tagaʻi i nei fuafuaga o se avanoa e faalatalata atili atu ai i ou uso ma faalaeiau i latou.
6 Lipoti o le Auaunaga i le Fanua: O le vave tauaaoina atu o lau lipoti o le auaunaga i le fanua i le faaiʻuga o masina taʻitasi, o se tasi lea o auala e te fesoasoani ai i le ovasia o le Suʻesuʻega Tautusi a le Faapotopotoga. E mafai ona e avatu saʻo iā te ia lau lipoti po o le tuu foʻi i totonu o le pusa mo lipoti o le auaunaga i le fanua i le Maota o le Malo. E mafai ona faaaogāina e le failautusi lenā pusa e aoina ai lipoti mai i ovasia o suʻesuʻega tautusi.
7 O le a matuā talisapaia lava lou lagolagosua ma lou ovasia o le Suʻesuʻega Tautusi a le Faalapotopotoga. Ae sili atu i na mea uma o le a lagolagoina e Ieova ‘le agaga e te faaali atu.’—Fili. 4:23, NW.