Talaʻi i se Lalolagi Fesuisuiaʻi
1 E mataʻutia le vave suia o tulaga o mea! O faalavelave e tutupu faafuaseʻi e pei o mala faalenatura, le paʻū maulalo o le tamaoaiga, se tulaga fesouaʻiina faalemalo po o se mea mataʻutia na tupu ua faasalalauina, e mafai ona avea ma mataupu o talanoaga. Peitaʻi e pei lava ona suia faafuaseʻi o tulaga o mea e faapena foʻi ona suia faafuaseʻi manatu o tagata i se isi mea. (Galu. 17:21; 1 Kori. 7:31) I lenei lalolagi fesuisuiaʻi e mafai faapefea ona tatou faauaʻi mai manatu o tagata ina ia talanoa ma i latou i le feʻau o le Malo?
2 Iloaina o Mea o Loo Atugalu ai Isi: O le isi auala e mafai ona faauaʻi mai ai manatu o tagata o le talanoa lea i mea o loo tutupu. I se tasi aso, a o pulunaunauina e Iesu lana ʻaufaalogologo ina ia manatunatu mamafa i lo latou tulaga ma le Atua, na ia taʻua ai ni mea mataʻutia na faatoʻā uma ona tutupu o loo latou iloaina. (Luka 13:1-5) I se tulaga tutusa pe a tatou talaʻi atu le tala lelei, e lelei pe a faaaofia ai ma se mea na tupu na faasalalauina po o se mataupu o loo vevesi ai tagata o lo tatou atunuu, lea e aafia ai tagata i le oganuu. Peitaʻi pe a talanoaina na mataupu, ia tatou faaeteete ina ia aua neʻi iai sa tatou vaega e lagolagoina ai tulaga faaupufai po o mataupu fai a tagata.—Ioa. 17:16.
3 E mafai faapefea ona tatou iloa po o ā mea o loo mafaufau i ai tagata? Atonu o le auala lelei lava o le fai atu lea o se fesili ona faalogologo lelei lea. (Mata. 12:34) O le faaalia o le naunau i tagata e uunaʻia ai i tatou e mātau manatu o isi ona taumafai lea e fai atu nisi fesili ina ia faalautele ai le talanoaga. O se manatu e ono faaalia e lē e ona le fale, atonu e faailoa mai ai le popole o isi o loo iai i lea vaipanoa ma maua ai le avanoa e avatu ai se molimau.
4 Ia Sauniuni se Taulimaga: Ina ia sauniuni i le galuega i le fanua i lenei lalolagi fesuisuiaʻi, e mafai ona tatou faaaogāina le tamaʻitusi Le Auala e Amata ma Faaauau ai Talanoaga Faale-Tusi Paia. O fautuaga aogā i le auala e faaaofia ai mea o loo tutupu i la tatou taulimaga o loo maua i le itulau e 3 i lalo o ulutala “Soligatulafono/Malupuipuia” ma “Mea Tutupu i Taimi Nei.” E maua foʻi faamatalaga faapea i La Tatou Faiva o le Malo iā Setema 2000, itulau e 4. Pe a sauniuni lau taulimaga, ia faamautinoa ua aofia ai ma se mau o le Tusi Paia e fetaui lelei i ai.
5 A o tatou uaʻi atu i le fesuisuiaʻi pea o mea e popole ai i latou o loo i la tatou oganuu, e manaʻomia ona faafetaui atu i ai la tatou taulimaga o le tala lelei. I lea tulaga, o le a tatou talanoa atu ai i tagata i mea o loo latou matuā aafia loloto ai. O le faia faapea o le a tatou fesoasoani ai i le toʻatele ina ia latou iloaina Lē e lē suia ona uiga ma ana tapulaa.—Iako. 1:17.