Fesoasoani i Ē ua “Saunia”
1. O ai o loo aoaoina mai e Ieova i aso nei?
1 E tofu lava le tagata ma uiga ua mauaa i lona loto. (Mata. 12:35) O loo taʻua i le Tusi Paia le tagata “o i lona loto le taua.” (Sala. 55:21) O isi tagata e “lotoa.” (Faata. 29:22) Peitaʻi, e iai foʻi isi o “ē ua saunia i le ola faavavau.” (Galu. 13:48) I aso nei, ua aoaoina mai e Ieova ē ua saunia. (Ha. 2:7) E faapefea ona tatou fesoasoani iā i latou ina ia avea ma ē e tapuaʻi iā Ieova?
2. O le ā o loo aofia ai i le faataunuuina o la tatou tofiga o le faia o soo?
2 Ia Tinoū e Toe Foʻi: E tāua ona iai se vaaiga saʻo i toe asiga, ina ia mafai ai ona faataunuu la tatou tofiga o le faia o soo. (Mata. 28:19, 20) Po o tatou filigā ea e vave toe asia tagata tatou te feiloaʻi i ai o ē o faaalia le fiafia? Po o tatou asiasi atu i tagata uma e taliaina lomiga, po o ē e naunau i le tala lelei? Faamata tatou te vilivilitaʻi e fesoasoani iā i latou ina ia tuputupu aʻe faaleagaga? E ao ona tatou taumafai e toe asia tagata uma tatou te feiloaʻi i ai o ē e fiafia i le upu moni, ona o loo aafia ai o latou soifua.
3. O le ā e tatau ona tatou faia pe a māeʻa se talanoaga ma se tagata i le faiva?
3 Ia vave ona tusia i lalo le suafa ma le tuatusi o le tagata fiafia, manū o e manatuaina pea la oulua talanoaga. Ia faamau i lalo le mataupu na lua talanoa ai, o mau na faitauina ma lomiga na tuuina i ai. E lē gata i lea, ia fuafua e toe foʻi i le vave e mafai ai.
4. E faapefea ona tatou faia ni toe asiga uigā?
4 Le Auala e Fai ai se Toe Asiga: Pe a fai se toe asiga, o se mea lelei lou faaalia o ni uiga māfana ma faaleuō, ma ia uaʻi totoʻa atu i le tagata e ona le fale. Ia faafaigofie le talanoaga ma ia faaautū i se mataupu faale-Tusi Paia. Ia sauni se mataupu faale-Tusi Paia faaosonaunau e talanoa i ai, ma ia faatū se fesili i le faaiʻuga o le asiasiga e mafai ona tali i le asiasiga e sosoo ai. O se mea lelei ona ʻalofia le fefinauaʻi ma le tagata e ona le fale, e uiga i ona manatu e lē ōgatusa ma le Tusi Paia. Ia taumafai e faavae aʻe le talanoaga i mataupu e lua te tau fai ioe uma i ai.—Kolo. 4:6.
5. O ā taumafaiga na faia e se tasi o paeonia, ma o ā iʻuga?
5 O le faia o toe asiga e manaʻomia ai ni taumafaiga, ae o taui e maua mai ai, e faamalieloto. Na faatū e se paeonia i Iapani, se sini e faateleina le aofaʻi o ana toe asiga i masina taʻitasi. Na amata ona ia faamauina i lalo suafa o tagata uma na ia feiloaʻi i ai mai lea fale i lea fale, ma na ia toe foʻi e asi i latou a o leʻi atoa aso e fitu. Na sauniuni lelei o ia i faamatalaga e fai atu, ma na faatino lana faiva i se uiga mautinoa i le feaʻu o loo ia talaʻia. I se tasi o ana toe asiga, na mafai ona ia amataina se suʻesuʻega ma se tagata o lē na faapea ane: “Na masani lava ona ou lē taliaina a outou asiasiga. O le taimi muamua lenei ua ou faalogo ai.” Na tauia taumafaiga filigā a lenei paeonia. I le faaiʻuga o le masina muamua, na ia lipotia ai ni suʻesuʻega faale-Tusi Paia e sefulu.
6. Aiseā tatou te taumafai ai pea e fai toe asiga?
6 O loo faaauau pea ona suia tulaga o tagata. (1 Kori. 7:31) E masani ona asiasi soo ona faatoʻā maua lea o se tagata fiafia i le fale. E ala i lo tatou tinoū e fai toe asiga, o le a mafai ai ona tatou fesoasoani i ē ua saunia, ina ia savavali i le ala e tau i le ola e faavavau.—Mata. 7:13, 14.