O Sauniuniga—O le Vala Autū Lea e Taulau ai i le Faia o Toe Asiga
1. I le ā le auala na faalautele atu ai le auaunaga a uluaʻi Kerisiano?
1 Sa matuā lava saunia e Iesu ona soo ina ia avea i latou ma tagata talaʻi uigā o le “tala lelei o le malo.” (Mata. 4:23; 9:35) Na aʻoaʻoina i latou e Iesu a o galulue i totonu o Palesitina. Peitaʻi, a o leʻi afio atu i le lagi, na faailoa mai e Iesu o le a faalautele atu le auaunaga faa-Kerisiano, e aofia ai ma le ‘faia o tagata o nuu uma lava ma soo.’—Mata. 28:19, 20.
2. O le ā e aofia i le usiusitai i le faatonuga a Iesu ia ‘faia tagata ma soo’?
2 E aofia i lenā galuega le toe foʻi atu e asia i latou na faaalia le fiafia i le tala lelei o le Malo o le Atua, ma aʻoaʻo i latou e usiusitai i mea uma na faatonuina e Keriso. Ina ia uigā toe asiga, e tatau ona tatou sauniuni lelei.
3. E tusa lava po o le uluaʻi asiasiga, e faapefea ona e tatala le avanoa mo se toe asiga?
3 Fuafua Mamao: O nisi tagata talaʻi latou te faatūina se fesili i le faaiʻuga o le uluaʻi asiasiga, ma folafola e toe foʻi atu e taliina lenā fesili. Ua mafai ona latou amataina se suʻesuʻega faale-Tusi Paia, ona o le tuuina o ni manatu e fesootaʻi atu i le tusi o le Aʻoaʻoga a le Tusi Paia.
4. Aiseā e lē tatau ai ona tatou faatuatuai i le faia o toe asiga seʻia taunuu mai mekasini fou?
4 E lē faapea a na o le faatasi ona maua tatou mekasini i le masina ona tatou faatali ai lea i le isi masina mo nisi mekasini faatoʻā toe asia lea o i latou. E ono mafai ona faaosofia le naunau o le tagata e ala i le talanoaina o mataupu o loo iai i mekasini o loo iā te ia.
5. O le ā le aogā o le mafaufau i lou sini na fai?
5 O le ā Lou Sini: A o leʻi toe foʻi atu, ia faaalu ni nai minute e toe iloilo ai au faamaumauga, ma iloa ai po o le ā o le a talanoaina. O se faaaʻoaʻoga, ia talanoaina se manatu mai lomiga na e tuuina. Po o le tuuina o nisi lomiga e fesootaʻi i la oulua talanoaga muamua. Pe afai na faatū se fesili i le taimi ua sola, o le a faaaofia foʻi la ma le taliina o lenā fesili i lou sini na fai. A o faamatilatila se mau e faamanino ai le manatu na talanoaina, ia taumafai e faitau saʻo mai le Tusi Paia.
6. O le ā lo tatou sini e faia ai toe asiga?
6 O lo Tatou Sini: E mautinoa lava, o lo tatou sini o le amataina lea o se suʻesuʻega faale-Tusi Paia. Sa ofo atu e se uso se suʻesuʻega o le Tusi Paia i lana toe asiga, ae sa teena e le tamāloa. Ona toe foʻi atu lea o le uso ma mekasini fou ma faapea atu, “A o matou iai i inei, e tasi se fesili mai le Tusi Paia o loo matou taliina i le asō.” Ina ua tali mai lenā tamāloa, na faitau loa e le uso se mau ma se palakalafa e talafeagai mai le lomiga lea e faaaogā mo suʻesuʻega faale-Tusi Paia. Sa amata se suʻesuʻega faale-Tusi Paia ma faia e lē aunoa.
7. E faapefea ona fesoasoani le sauniuni lelei iā te oe e maua ai sau suʻesuʻega faale-Tusi Paia?
7 O se taimi alu aogā le taimi lea e faaalu e sauniuni ai mo toe asiga. O le a faatuputeleina lo tatou olioli, ma atonu tatou te maua le faaeaga o le fesoasoani i “ē ua saunia o latou loto” mo le ala i le ola e faavavau.—Galu. 13:48.